ਨਿਊਜ਼ੀਲੈਂਡ ਸਰਕਾਰ ਨੇ ਲੋਕਾਂ ਨੂੰ ਆਪਣੇ ਅਦਾਲਤੀ ਜੁਰਮਾਨੇ ਭਰਨ ਲਈ ਮਜਬੂਰ ਕਰਨ ਦਾ ਇੱਕ ਨਵਾਂ ਤਰੀਕਾ ਲੱਭਿਆ ਹੈ – ਦਰਅਸਲ ਪ੍ਰਸ਼ਾਸਨ ਹੁਣ ਕਾਰਾਂ ਕਲੈਂਪ ਜਾਂ ਟੋ ਕਰੇਗਾ। ਨਿਆਂ ਮੰਤਰੀ ਪਾਲ ਗੋਲਡਮਿਥ ਨੇ ਚੈੱਕਪੁਆਇੰਟ ਨੂੰ ਦੱਸਿਆ ਕਿ 100 ਮਿਲੀਅਨ ਡਾਲਰ ਤੋਂ ਵੱਧ ਦਾ ਅਦਾਲਤੀ ਜੁਰਮਾਨੇ ਨਹੀਂ ਭਰੇ ਹੋਏ ਹਨ ਅਤੇ ਲੱਖਾਂ ਦੇ ਮੁਆਵਜ਼ੇ ਦਾ ਭੁਗਤਾਨ ਨਹੀਂ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ, “ਸਾਨੂੰ ਇਸ ਬਾਰੇ ਕੁਝ ਕਰਨਾ ਪਵੇਗਾ, ਇਹ ਸਹੀ ਨਹੀਂ ਹੈ।” ਗੋਲਡਸਮਿਥ ਨੇ ਕਿਹਾ ਕਿ, “ਅਸੀਂ ਉਨ੍ਹਾਂ ਜੁਰਮਾਨਿਆਂ ਬਾਰੇ ਗੱਲ ਕਰ ਰਹੇ ਹਾਂ ਜੋ ਅਦਾਲਤਾਂ ਦੁਆਰਾ ਲਗਾਏ ਗਏ ਹਨ ਅਤੇ ਮੁਆਵਜ਼ੇ ਬਾਰੇ ਵੀ, ਜਿੱਥੇ ਅਦਾਲਤ ਨੇ ਕਿਹਾ ਹੈ ਕਿ ਤੁਹਾਨੂੰ ਕਿਸੇ ਅਪਰਾਧ ਦੇ ਪੀੜਤ ਨੂੰ ਇੱਕ ਨਿਸ਼ਚਿਤ ਰਕਮ ਦਾ ਭੁਗਤਾਨ ਕਰਨ ਦੀ ਲੋੜ ਹੈ।”
ਗੋਲਡਸਮਿਥ ਨੇ ਕਿਹਾ ਕਿ ਜਦੋਂ ਤੁਹਾਡੀ ਕਾਰ ਫੜੀ ਜਾਂਦੀ ਹੈ ਤਾਂ ਤੁਹਾਨੂੰ ਤੁਰੰਤ ਪੂਰਾ ਜੁਰਮਾਨਾ ਅਦਾ ਨਹੀਂ ਕਰਨਾ ਪਵੇਗਾ, ਜਦੋਂ ਤੱਕ ਤੁਹਾਡੇ ਕੋਲ ਇਸਦਾ ਭੁਗਤਾਨ ਸ਼ੁਰੂ ਕਰਨ ਦੀ ਯੋਜਨਾ ਹੈ। ਹਾਲਾਂਕਿ ਸਰਕਾਰ ਨੇ ਇਹ ਨਹੀਂ ਦੱਸਿਆ ਕਿ ਕਿੰਨੀ ਰਕਮ ਦੇ ਬਕਾਇਆ ‘ਤੇ ਕਾਰਵਾਈ ਹੋਵੇਗੀ।ਜੇਕਰ ਤੁਹਾਡੇ ਉੱਤੇ ਵੀ ਕੋਈ ਅਦਾਲਤੀ ਜੁਰਮਾਨਾ ਜਾਂ ਮੁਆਵਜ਼ਾ ਬਕਾਇਆ ਹੈ, ਤਾਂ ਤੁਰੰਤ ਨਿਆਂ ਮੰਤਰਾਲੇ ਨਾਲ ਸੰਪਰਕ ਕਰੋ, ਨਹੀਂ ਤਾਂ ਤੁਹਾਡੀ ਕਾਰ ਕਲੈਂਪ ਜਾਂ ਟੋ ਹੋ ਸਕਦੀ ਹੈ।