Wānaka ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਥੇ ਕੈਂਸਰ ਦੇ ਝੂਠੇ ਦਾਅਵਿਆਂ ਰਾਹੀਂ ਇੱਕ ਜੋੜੇ ਦੇ ਵੱਲੋਂ ਇੱਕ ਮਿਲੀਅਨ ਡਾਲਰ ਦੀ ਧੋਖਾਧੜੀ ਕੀਤੀ ਗਈ ਹੈ। ਇਸ ਦੌਰਾਨ ਜੋੜੇ ਨੇ ਜ਼ਮਾਨਤ ਦੀ ਅਰਜ਼ੀ ਲਗਾਈ ਸੀ ਜਿਸ ਨੂੰ ਖਾਰਜ ਕਰ ਦਿੱਤਾ ਗਿਆ ਹੈ। ਦੋਸ਼ੀ ਵਾਨਾਕਾ ਵਾਸੀ ਹੁਣ ਪੁਲਿਸ ਹਿਰਾਸਤ ਵਿੱਚ ਰਹੇਗਾ। 28 ਸਾਲ ਦੇ ਐਂਡਰਿਊ ਜੋਨਸ ਅਤੇ ਉਸਦੀ 30 ਸਾਲ ਦੀ ਪਤਨੀ ਸੇਪਿਉਟਾ ਵੇਵ ‘ਤੇ ਇੱਕ ਫਰਜ਼ੀ ਕੈਂਸਰ ਘੁਟਾਲੇ ਰਾਹੀਂ ਇੱਕ ਦਰਜਨ ਤੋਂ ਵੱਧ ਪਰਿਵਾਰ, ਦੋਸਤਾਂ ਅਤੇ ਸਹਿਯੋਗੀਆਂ ਨਾਲ ਧੋਖਾਧੜੀ ਕਰਨ ਦਾ ਦੋਸ਼ ਲਗਾਇਆ ਗਿਆ ਸੀ।
ਜੋਨਸ ਬੁੱਧਵਾਰ ਨੂੰ ਕ੍ਰਾਈਸਚਰਚ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਹੋਇਆ ਸੀ ਪਰ ਉਸ ਨੇ ਧੋਖਾਧੜੀ ਦੇ ਕਈ ਦੋਸ਼ਾਂ ਨੂੰ ਮੰਨਣ ਤੋਂ ਇੰਨਕਾਰ ਕਰ ਦਿੱਤਾ। ਹਲਾਂਕਿ ਜੱਜ ਸਟੀਫਨ ਓ’ਡ੍ਰਿਸਕੋਲ ਨੇ ਸ਼ੁੱਕਰਵਾਰ ਨੂੰ ਉਸਦੀ ਜ਼ਮਾਨਤ ਅਰਜ਼ੀ ਨੂੰ ਰੱਦ ਕਰ ਦਿੱਤਾ। ਜ਼ਮਾਨਤ ਦੇ ਫੈਸਲੇ ਨਾਲ ਸਬੰਧਤ ਬੇਨਤੀਆਂ ਨੂੰ ਗੁਪਤ ਰੱਖਿਆ ਗਿਆ ਸੀ, ਨਾਲ ਹੀ ਕਥਿਤ ਪੀੜਤਾਂ ਦੇ ਵੇਰਵਿਆਂ ਨੂੰ ਵੀ ਗੁਪਤ ਰੱਖਿਆ ਗਿਆ ਸੀ। ਵੇਵ ਨੇ ਪਿਛਲੇ ਮਹੀਨੇ ਦੋਸ਼ੀ ਨਹੀਂ ਹੋਣ ਦੀ ਬੇਨਤੀ ਕੀਤੀ ਸੀ ਅਤੇ ਉਸਨੂੰ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਸੀ। ਜੋੜੇ ਨੂੰ ਇਸ ਮਹੀਨੇ ਦੇ ਅੰਤ ਵਿੱਚ ਦੁਬਾਰਾ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।