ਵੈਲਿੰਗਟਨ ਵਿੱਚ ਕੋਵਿਡ-19 ਰਾਹਤ ਸਕੀਮਾਂ ਦਾ ਗਲਤ ਫਾਇਦਾ ਚੁੱਕਣ ਦੇ ਦੋਸ਼ ਵਿੱਚ ਭਾਰਤੀ ਮੂਲ ਦੀ ਇਕ ਮਹਿਲਾ ਨੂੰ ਅਦਾਲਤ ਵੱਲੋਂ ਸਜ਼ਾ ਸੁਣਾਈ ਗਈ ਹੈ। ਮਹਿਲਾ ਨੇ ਜਾਲਸਾਜ਼ੀ ਕਰਦੇ ਹੋਏ ਸਰਕਾਰ ਤੋਂ ਹਜ਼ਾਰਾਂ ਡਾਲਰ ਦੀ ਮਦਦ ਹਾਸਿਲ ਕੀਤੀ ਸੀ। ਅਦਾਲਤੀ ਕਾਰਵਾਈ ਦੌਰਾਨ ਸਾਹਮਣੇ ਆਇਆ ਕਿ ਸੋਨਮ ਗੋਦਾਰਾ ਨੇ ਫਰਜ਼ੀ ਬੈਂਕ ਸਟੇਟਮੈਂਟ ਬਣਾਕੇ ਇਕ ਅਜਿਹੀ ਕੰਪਨੀ ਦੇ ਨਾਂ ‘ਤੇ ਲੋਨ ਅਤੇ ਹੋਰ ਸਹਾਇਤਾ ਲਈ ਅਰਜ਼ੀਆਂ ਦਿੱਤੀਆਂ, ਜੋ ਕਾਫ਼ੀ ਸਮੇਂ ਤੋਂ ਬੰਦ ਪਈ ਸੀ। ਉਸ ਨੇ ਸਮਾਲ ਬਿਜ਼ਨਸ ਕੈਸ਼ਫਲੋ ਸਕੀਮ (SBCS) ਅਤੇ ਰਿਸਰਜੈਂਸ ਸਪੋਰਟ ਪੇਮੈਂਟ (RSP) ਦੇ ਤਹਿਤ ਉਹ ਰਕਮ ਵੀ ਹਾਸਿਲ ਕੀਤੀ, ਜਿਸ ਦੀ ਉਹ ਹੱਕਦਾਰ ਨਹੀਂ ਸੀ।
ਇਹ ਧੋਖਾਧੜੀ ਕਰੀਬ ਦੋ ਸਾਲ ਤੱਕ ਜਾਰੀ ਰਹੀ ਅਤੇ ਇਸ ਦੌਰਾਨ ਉਸ ਨੇ ਆਪਣੀ ਮਾਂ ਦੀ ਗੈਰ-ਸਕ੍ਰਿਯ ਕੰਪਨੀ ਦਾ ਇਸਤੇਮਾਲ ਕੀਤਾ। ਮਾਮਲੇ ਦੀ ਸੁਣਵਾਈ ਕਰਦਿਆਂ ਅਦਾਲਤ ਨੇ ਇਸ ਗੰਭੀਰ ਅਪਰਾਧ ਨੂੰ ਧਿਆਨ ਵਿੱਚ ਰੱਖਿਆ, ਪਰ ਉਸ ਨੂੰ ਕੈਦ ਦੀ ਸਜ਼ਾ ਦੇਣ ਦੀ ਬਜਾਏ ਕਮਿਊਨਿਟੀ ਡਿਟੈਨਸ਼ਨ ਦੀ ਸਜ਼ਾ ਸੁਣਾਈ। ਇਸ ਕੇਸ ਨੂੰ ਸਰਕਾਰੀ ਯੋਜਨਾਵਾਂ ਦੇ ਦੁਰਪਯੋਗ ਵੱਜੋਂ ਇਕ ਵੱਡੀ ਚਿਤਾਵਨੀ ਮੰਨਿਆ ਜਾ ਰਿਹਾ ਹੈ ਅਤੇ ਅਧਿਕਾਰੀਆਂ ਨੇ ਲੋਕਾਂ ਨੂੰ ਅਜਿਹੀਆਂ ਧੋਖਾਧੜੀਆਂ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਹੈ।