ਨਿਊਟਾਊਨ ਵਿੱਚ ਹੋਏ Newtown Festival ਦੌਰਾਨ ਇਕ ਦਿਲਚਸਪ ਪਰ ਇਮਾਨਦਾਰੀ ਭਰੀ ਘਟਨਾ ਸਾਹਮਣੇ ਆਈ। ਇਕ ਗਾਹਕ ਨੇ ਕੌਫੀ ਖਰੀਦਣ ਸਮੇਂ ਗਲਤੀ ਨਾਲ $7 ਦੀ ਥਾਂ $700 ਦਾ ਭੁਗਤਾਨ ਕਰ ਦਿੱਤਾ। ਦਰਅਸਲ ਕੌਫੀ ਦੀ ਕੀਮਤ ਸਿਰਫ $7 ਸੀ ਪਰ ਮੋਬਾਈਲ ਕੌਫੀ ਕਾਰਟ Bean Here Coffee Cart ‘ਤੇ ਬੈਂਕ ਟ੍ਰਾਂਸਫਰ ਕਰਦੇ ਸਮੇਂ ਗਲਤੀ ਨਾਲ ਵੱਧ ਰਕਮ ਭੇਜੀ ਗਈ।
ਕਾਰਟ ਦੇ ਮਾਲਕ ਸੈਮ ਸੋਮਰਜ਼ ਨੇ ਜਦੋਂ ਆਪਣੇ ਬੈਂਕ ਖਾਤੇ ਵਿੱਚ ਇਹ ਵੱਡੀ ਰਕਮ ਦੇਖੀ ਤਾਂ ਉਹ ਹੈਰਾਨ ਰਹਿ ਗਿਆ। ਉਸਨੇ ਤੁਰੰਤ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰਕੇ ਉਸ ਗਾਹਕ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਜੋ ਉਸਦੇ ਪੈਸੇ ਵਾਪਸ ਕੀਤੇ ਜਾ ਸਕਣ।
ਸੈਮ ਸੋਮਰਜ਼ ਦਾ ਕਹਿਣਾ ਹੈ ਕਿ ਉਸ ਨੇ ਇਕ ਪਲ ਲਈ ਵੀ ਉਹ ਪੈਸੇ ਆਪਣੇ ਕੋਲ ਰੱਖਣ ਬਾਰੇ ਨਹੀਂ ਸੋਚਿਆ ਕਿਉਂਕਿ ਇਹ ਉਸਦੀ ਮਿਹਨਤ ਦੀ ਕਮਾਈ ਨਹੀਂ ਸੀ। ਬਾਅਦ ਵਿੱਚ ਬੈਂਕ ਨਾਲ ਸੰਪਰਕ ਕਰਕੇ ਸਹੀ ਪ੍ਰਕਿਰਿਆ ਰਾਹੀਂ $700 ਵਿੱਚੋਂ $693 ਗਾਹਕ ਨੂੰ ਵਾਪਸ ਕਰ ਦਿੱਤੇ ਗਏ, ਜਦਕਿ $7 ਕੌਫੀ ਦੀ ਅਸਲ ਕੀਮਤ ਵਜੋਂ ਰੱਖੇ ਗਏ।
ਇਹ ਘਟਨਾ ਹੁਣ ਨਿਊਜ਼ੀਲੈਂਡ ਵਿੱਚ “ਸਭ ਤੋਂ ਮਹਿੰਗੀ ਕੌਫੀ” ਵਜੋਂ ਚਰਚਾ ਦਾ ਵਿਸ਼ਾ ਬਣ ਗਈ ਹੈ ਅਤੇ ਲੋਕ ਕੈਫੇ ਮਾਲਕ ਦੀ ਇਮਾਨਦਾਰੀ ਦੀ ਖੂਬ ਪ੍ਰਸ਼ੰਸਾ ਕਰ ਰਹੇ ਹਨ।