ACT ਪਾਰਟੀ ਦੇ ਨੇਤਾ ਅਤੇ ਨਿਊਜ਼ੀਲੈਂਡ ਦੇ ਡਿਪਟੀ ਪ੍ਰਧਾਨ ਮੰਤਰੀ David Seymour ਨੂੰ ਮੰਗਲਵਾਰ ਨੂੰ ਸੰਸਦ ਵਿਚੋਂ ਬਾਹਰ ਕੱਢ ਦਿੱਤਾ ਗਿਆ, ਜਦੋਂ ਉਹਨਾਂ ਦੀ ਸਪੀਕਰ Gerry Brownlee ਨਾਲ ਤਿੱਖੀ ਬਹਿਸ ਹੋ ਗਈ। ਮਾਮਲਾ ਉਸ ਵੇਲੇ ਸ਼ੁਰੂ ਹੋਇਆ ਜਦੋਂ ਲੇਬਰ ਪਾਰਟੀ ਦੇ ਸੰਸਦ ਮੈਂਬਰ Dan Rosewarne ਸਵਾਲ ਪੁੱਛ ਰਹੇ ਸਨ। ਇਸ ਦੌਰਾਨ ACT ਦੇ ਸੰਸਦ ਮੈਂਬਰ Simon Court ਨੇ “ਪੋਇੰਟ ਆਫ ਆਰਡਰ” ਉਠਾਇਆ। ਸਪੀਕਰ ਬ੍ਰਾਊਨਲੀ ਨੇ ਕਿਹਾ, “ਇਹ ਵਧੀਆ ਪੋਇੰਟ ਆਫ ਆਰਡਰ ਹੋਣਾ ਚਾਹੀਦਾ ਹੈ ਅਤੇ ਇਹ ਸਟੈਂਡਿੰਗ ਆਰਡਰਜ਼ ਦੇ ਖਿਲਾਫ ਨਹੀਂ ਹੋਣਾ ਚਾਹੀਦਾ।”
ਸਾਇਮਨ ਕੋਰਟ ਨੇ ਕਿਹਾ ਕਿ ਉਹਨਾਂ ਨੂੰ ਲੱਗਿਆ ਕਿ ਇੱਕ ਹੋਰ ਮੈਂਬਰ ਦੇ ਸਪਲੀਮੈਂਟਰੀ ਸਵਾਲ ਦਾ ਜਵਾਬ ਨਹੀਂ ਦਿੱਤਾ ਗਿਆ। ਇਸ ’ਤੇ ਸਪੀਕਰ ਨੇ ਤੰਜ ਭਰੇ ਅੰਦਾਜ਼ ਵਿੱਚ ਕਿਹਾ, “ਹਾਂ? ਫਿਰ ਤਾਂ ਤੁਹਾਡੇ ਨਾਲ ਨਿਆਂ ਨਹੀਂ ਹੋਇਆ।” ਇਸ ਤੋਂ ਬਾਅਦ ਡੇਵਿਡ ਸੀਮੋਰ ਖੜ੍ਹੇ ਹੋਏ ਅਤੇ ਕਿਹਾ, “ਇਸ ਹਾਊਸ ਦੇ ਮੈਂਬਰਾਂ ਨੂੰ ਪੋਇੰਟ ਆਫ ਆਰਡਰ ਉਠਾਉਣ ਦਾ ਹੱਕ ਹੈ, ਬਿਨਾਂ ਉਸ ‘ਕ੍ਰੈਪ’ ਦੇ ਜੋ ਸਪੀਕਰ ਨੇ ਹੁਣ ਕਿਹਾ।”
ਇਸ ਉੱਤੇ ਸਪੀਕਰ ਗੈਰੀ ਬ੍ਰਾਊਨਲੀ ਨੇ ਤੁਰੰਤ ਕਾਰਵਾਈ ਕਰਦਿਆਂ ਕਿਹਾ, “ਮੈਂਬਰ ਹਾਊਸ ਛੱਡ ਦੇਵੇ,” ਅਤੇ ਡੇਵਿਡ ਸੀਮੋਰ ਨੂੰ ਬਾਹਰ ਜਾਣ ਲਈ ਕਿਹਾ ਗਿਆ। ਬਾਅਦ ਵਿੱਚ ਮੀਡੀਆ ਨਾਲ ਗੱਲ ਕਰਦਿਆਂ ਸੀਮੋਰ ਨੇ ਕਿਹਾ ਕਿ ਸਪੀਕਰ “ਸਪੱਸ਼ਟ ਤੌਰ ’ਤੇ ਗੁੱਸੇ ਵਿੱਚ ਸਨ।” ਉਹਨਾਂ ਨੇ ਕਿਹਾ, “ਹਰ ਮੈਂਬਰ ਨੂੰ ਪੋਇੰਟ ਆਫ ਆਰਡਰ ਉਠਾਉਣ ਦਾ ਹੱਕ ਹੈ ਅਤੇ ਉਸ ਨਾਲ ਸਤਿਕਾਰ ਨਾਲ ਵਤੀਰਾ ਹੋਣਾ ਚਾਹੀਦਾ ਹੈ। ਮੈਂ ਆਪਣੇ ਮੈਂਬਰਾਂ ਲਈ ਖੜ੍ਹਾ ਰਹਿੰਦਾ ਹਾਂ।” ਹਾਲਾਂਕਿ, ਸੀਮੋਰ ਨੇ ਇਹ ਵੀ ਕਿਹਾ ਕਿ ਉਹਨਾਂ ਨੂੰ ਸਪੀਕਰ ’ਤੇ ਭਰੋਸਾ ਹੈ, ਪਰ “ਅੱਜ ਉਹਨਾਂ ਦਾ ਦਿਨ ਠੀਕ ਨਹੀਂ ਸੀ।”