ਨਿਊਜ਼ੀਲੈਂਡ ਦੇ ਆਕਲੈਂਡ ਸ਼ਹਿਰ ਵਿੱਚ ਅੱਜ ਸਵੇਰੇ ਸੰਘਣੀ ਧੁੰਦ ਕਾਰਨ ਹਵਾਈ ਆਵਾਜਾਈ ਪ੍ਰਭਾਵਿਤ ਹੋਈ। ਆਕਲੈਂਡ ਹਵਾਈ ਅੱਡੇ ‘ਤੇ ਲਗਾਈਆਂ ਗਈਆਂ ਧੁੰਦ ਸੰਬੰਧੀ ਪਾਬੰਦੀਆਂ ਹੁਣ ਹਟਾ ਦਿੱਤੀਆਂ ਗਈਆਂ ਹਨ, ਪਰ ਇਸ ਦੌਰਾਨ ਦਰਜਨਾਂ ਉਡਾਣਾਂ ਰੱਦ ਅਤੇ ਦੇਰੀ ਦਾ ਸ਼ਿਕਾਰ ਹੋਈਆਂ। ਹਵਾਈ ਅੱਡਾ ਪ੍ਰਬੰਧਕਾਂ ਅਨੁਸਾਰ ਸਵੇਰੇ ਕਰੀਬ 4:30 ਵਜੇ ਪਾਬੰਦੀਆਂ ਲਾਗੂ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਨੂੰ ਦੁਪਹਿਰ 12:19 ਵਜੇ ਹਟਾ ਦਿੱਤਾ ਗਿਆ। ਧੁੰਦ ਕਾਰਨ ਲਗਭਗ 28 ਘਰੇਲੂ ਖੇਤਰੀ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ, ਜਦਕਿ 18 ਹੋਰ ਖੇਤਰੀ ਉਡਾਣਾਂ ਦੇਰੀ ਨਾਲ ਚੱਲੀਆਂ।
ਇਸ ਤੋਂ ਇਲਾਵਾ ਕਵੀਨਸਟਾਊਨ ਲਈ ਅਤੇ ਉਥੋਂ ਆਉਣ ਵਾਲੀਆਂ 5 ਉਡਾਣਾਂ, ਵੈਲਿੰਗਟਨ ਲਈ 3 ਅਤੇ ਕ੍ਰਾਈਸਟਚਰਚ ਲਈ 3 ਉਡਾਣਾਂ ਵੀ ਦੇਰੀ ਨਾਲ ਚੱਲੀਆਂ। ਹਾਲਾਂਕਿ ਅੰਤਰਰਾਸ਼ਟਰੀ ਉਡਾਣਾਂ ‘ਤੇ ਧੁੰਦ ਦਾ ਕੋਈ ਅਸਰ ਨਹੀਂ ਪਿਆ। ਹਵਾਈ ਅੱਡੇ ਵੱਲੋਂ ਯਾਤਰੀਆਂ ਨੂੰ ਅਪੀਲ ਕੀਤੀ ਗਈ ਕਿ ਉਹ ਤਾਜ਼ਾ ਆਗਮਨ ਅਤੇ ਰਵਾਨਗੀ ਜਾਣਕਾਰੀ ਲਈ ਹਵਾਈ ਅੱਡੇ ਦੀ ਵੈੱਬਸਾਈਟ ਚੈੱਕ ਕਰਦੇ ਰਹਿਣ।