ਨਿਊਜ਼ੀਲੈਂਡ ‘ਚ ਕੀਤੇ ਗਏ ਇੱਕ ਤਾਜ਼ਾ ਸਰਵੇਖਣ ਨੇ ਸੜਕ ਸੁਰੱਖਿਆ ਨੂੰ ਲੈ ਕੇ ਚਿੰਤਾਜਨਕ ਤਸਵੀਰ ਪੇਸ਼ ਕੀਤੀ ਹੈ। Automobile Association (AA) ਵੱਲੋਂ ਕਰਵਾਈ ਗਈ ਖੋਜ ਮੁਤਾਬਿਕ ਜ਼ਿਆਦਾਤਰ ਲਾਇਸੈਂਸਸ਼ੁਦਾ ਡਰਾਈਵਰ ਬੁਨਿਆਦੀ ਟ੍ਰੈਫਿਕ ਨਿਯਮਾਂ ਦੀ ਪ੍ਰੀਖਿਆ ਵਿੱਚ 70 ਫ਼ੀਸਦੀ ਤੋਂ ਵੱਧ ਅੰਕ ਵੀ ਹਾਸਿਲ ਨਹੀਂ ਕਰ ਸਕੇ।
AA ਨੇ 535 ਡਰਾਈਵਰਾਂ ‘ਤੇ ਕੀਤੇ ਸਰਵੇ ਵਿੱਚ ਪਾਇਆ ਕਿ ਇੱਕ ਵੀ ਵਿਅਕਤੀ 24 ਵਿੱਚੋਂ ਸਾਰੇ ਸਵਾਲਾਂ ਦੇ ਸਹੀ ਜਵਾਬ ਨਹੀਂ ਦੇ ਸਕਿਆ। ਹੈਰਾਨੀ ਦੀ ਗੱਲ ਇਹ ਵੀ ਰਹੀ ਕਿ 40 ਸਾਲ ਤੋਂ ਵੱਧ ਸਮੇਂ ਤੋਂ ਗੱਡੀ ਚਲਾ ਰਹੇ ਡਰਾਈਵਰਾਂ ਦੇ ਨਤੀਜੇ ਲਗਭਗ ਉਹਨਾਂ ਲੋਕਾਂ ਵਰਗੇ ਹੀ ਸਨ, ਜਿਨ੍ਹਾਂ ਨੇ ਸਿਰਫ਼ ਇੱਕ ਸਾਲ ਪਹਿਲਾਂ ਲਾਇਸੈਂਸ ਲਿਆ ਸੀ। ਜਦਕਿ ਨਿਊਜ਼ੀਲੈਂਡ ਵਿੱਚ ਲਰਨਰ ਲਾਇਸੈਂਸ ਪ੍ਰਾਪਤ ਕਰਨ ਲਈ ਥਿਊਰੀ ਟੈਸਟ ਵਿੱਚ 90 ਫ਼ੀਸਦੀ ਅੰਕ ਲਾਜ਼ਮੀ ਹੁੰਦੇ ਹਨ, ਸਰਵੇ ਵਿੱਚ ਸਿਰਫ਼ ਕੁਝ ਹੀ ਲੋਕ ਇਸ ਪੱਧਰ ਤੱਕ ਪਹੁੰਚ ਸਕੇ।
AA ਦੇ ਰਿਸਰਚ ਅਤੇ ਰੋਡ ਸੇਫਟੀ ਮੈਨੇਜਰ ਡਿਲਨ ਥੌਮਸਨ ਨੇ ਕਿਹਾ ਕਿ ਡਰਾਈਵਰਾਂ ਨੂੰ ਸਭ ਤੋਂ ਵੱਧ ਮੁਸ਼ਕਿਲ ਉਹਨਾਂ ਨਿਯਮਾਂ ਵਿੱਚ ਆਈ ਜੋ ਪਿਛਲੇ ਕੁਝ ਸਾਲਾਂ ਦੌਰਾਨ ਲਾਗੂ ਕੀਤੇ ਗਏ ਹਨ। ਇਨ੍ਹਾਂ ਵਿੱਚ ਬੱਸ ਲੇਨਾਂ, ਸਾਈਕਲ ਲੇਨਾਂ, ਨਵੇਂ ਵੇਰੀਏਬਲ ਸਪੀਡ ਸਾਈਨਾਂ ਅਤੇ ਰਾਊਂਡਅਬਾਊਟ ‘ਤੇ ਸਹੀ ਢੰਗ ਨਾਲ ਇੰਡੀਕੇਟਰ ਦੇਣ ਦੇ ਨਿਯਮ ਸ਼ਾਮਿਲ ਹਨ। ਸਿਰਫ਼ 60 ਫ਼ੀਸਦੀ ਡਰਾਈਵਰਾਂ ਨੂੰ ਇਹ ਪਤਾ ਸੀ ਕਿ ਸਾਈਕਲ ਸਵਾਰ ਨੂੰ ਸੁਰੱਖਿਅਤ ਢੰਗ ਨਾਲ ਓਵਰਟੇਕ ਕਰਨ ਦੇ ਨਿਯਮ ਕੀ ਹਨ।
ਇਸ ਸਥਿਤੀ ਨੂੰ ਸੁਧਾਰਨ ਲਈ AA ਨੇ ਸਰਕਾਰ ਨੂੰ ਸੁਝਾਅ ਦਿੱਤਾ ਹੈ ਕਿ ਜਦੋਂ ਲੋਕ ਆਪਣਾ ਡਰਾਈਵਿੰਗ ਲਾਇਸੈਂਸ ਰੀਨਿਊ ਕਰਵਾਉਣ, ਉਸ ਵੇਲੇ ਉਨ੍ਹਾਂ ਨੂੰ ਟ੍ਰੈਫਿਕ ਨਿਯਮਾਂ ਬਾਰੇ ਇੱਕ ਵਿਕਲਪਿਕ ਰਿਫ੍ਰੈਸ਼ਰ ਕੋਰਸ ਕਰਨ ਦਾ ਮੌਕਾ ਦਿੱਤਾ ਜਾਵੇ। ਜਿਹੜੇ ਡਰਾਈਵਰ ਇਹ ਕੋਰਸ ਪੂਰਾ ਕਰਨ, ਉਨ੍ਹਾਂ ਨੂੰ ਲਾਇਸੈਂਸ ਫੀਸ ਵਿੱਚ ਛੂਟ ਦਿੱਤੀ ਜਾ ਸਕਦੀ ਹੈ। AA ਦਾ ਮੰਨਣਾ ਹੈ ਕਿ ਇਸ ਨਾਲ ਡਰਾਈਵਰਾਂ ਦੀ ਜਾਣਕਾਰੀ ਅੱਪਡੇਟ ਹੋਵੇਗੀ, ਸੜਕਾਂ ਹੋਰ ਸੁਰੱਖਿਅਤ ਬਣਨਗੀਆਂ ਅਤੇ ਹਰ ਰੋਜ਼ ਵਾਪਰਨ ਵਾਲੇ ਸੈਂਕੜੇ ਛੋਟੇ ਹਾਦਸਿਆਂ ਨੂੰ ਰੋਕਣ ਵਿੱਚ ਮਦਦ ਮਿਲੇਗੀ।