ਸਪੀਡ ਕੈਮਰਿਆਂ ਨਾਲ ਲੈਸ ਟ੍ਰੇਲਰ ਹੁਣ ਨਿਊਜ਼ੀਲੈਂਡ ਦੀਆਂ ਸੜਕਾਂ ਦੇ ਕਿਨਾਰਿਆਂ ‘ਤੇ ਤਾਇਨਾਤ ਕਰ ਦਿੱਤੇ ਗਏ ਹਨ। ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ ਨੇ ਪਹਿਲਾ ਟ੍ਰੇਲਰ ਆਕਲੈਂਡ ਵਿੱਚ ਤਾਇਨਾਤ ਕੀਤਾ ਹੈ। ਆਉਣ ਵਾਲੇ ਮਹੀਨਿਆਂ ਵਿੱਚ ਨੌਂ ਹੋਰ ਟ੍ਰੇਲਰ ਫਲੀਟ ਵਿੱਚ ਸ਼ਾਮਿਲ ਹੋਣ ਲਈ ਤਿਆਰ ਹਨ। ਉਹ SUV ਤੋਂ ਪਹਿਲਾਂ ਹੀ ਕੰਮ ਕਰ ਰਹੇ 34 ਮੋਬਾਈਲ ਕੈਮਰਿਆਂ ਵਿੱਚ ਸ਼ਾਮਿਲ ਕੀਤੇ ਗਏ ਹਨ। NZTA ਨੇ ਕਿਹਾ ਕਿ ਟ੍ਰੇਲਰ ਦੇ ਨਾਲ, ਮੋਬਾਈਲ ਕੈਮਰੇ ਮਹੀਨੇ ਵਿੱਚ ਕੁੱਲ 6500 ਘੰਟੇ ਕੰਮ ਕਰਨਗੇ।
NZTA ਦੇ ਰੈਗੂਲੇਟਰੀ ਰਣਨੀਤਕ ਪ੍ਰੋਗਰਾਮਾਂ ਦੇ ਮੁਖੀ ਤਾਰਾ ਮੈਕਮਿਲਨ ਨੇ ਕਿਹਾ ਕਿ, “ਟ੍ਰੇਲਰਾਂ ਵਿੱਚ ਕੈਮਰਾ ਤਕਨਾਲੋਜੀ ਉਹੀ ਹੈ ਜੋ ਅਸੀਂ ਆਪਣੀਆਂ SUV ਵਿੱਚ ਵਰਤ ਰਹੇ ਹਾਂ, ਪਰ ਦੋਵੇਂ ਤਰ੍ਹਾਂ ਦੇ ਵਾਹਨ ਹੋਣ ਨਾਲ ਸਾਨੂੰ ਉੱਚ-ਜੋਖਮ ਵਾਲੇ ਸਥਾਨਾਂ ਵਿਚਕਾਰ ਕੈਮਰਿਆਂ ਨੂੰ ਤੇਜ਼ੀ ਅਤੇ ਆਸਾਨੀ ਨਾਲ ਲਿਜਾਣ ਲਈ ਵਧੇਰੇ ਲਚਕਤਾ ਮਿਲਦੀ ਹੈ, ਇਹ ਯਕੀਨੀ ਬਣਾਉਂਦੇ ਹੋਏ ਕਿ ਅਸੀਂ ਸੜਕ ਦੇ ਉਨ੍ਹਾਂ ਹਿੱਸਿਆਂ ਨੂੰ ਨਿਸ਼ਾਨਾ ਬਣਾ ਰਹੇ ਹਾਂ ਜਿੱਥੇ ਤੇਜ਼ ਰਫ਼ਤਾਰ ਵਾਲੇ ਡਰਾਈਵਰ ਆਪਣੇ ਆਪ ਨੂੰ ਅਤੇ ਦੂਜਿਆਂ ਨੂੰ ਜੋਖਮ ਵਿੱਚ ਪਾ ਰਹੇ ਹਨ।”
ਮੈਕਮਿਲਨ ਨੇ ਕਿਹਾ ਕਿ “ਸਾਡੇ ਟ੍ਰੇਲਰ ਅਤੇ SUV ਦੋਵੇਂ ਦਿਨ-ਰਾਤ ਕੰਮ ਕਰਨਗੇ, ਜਿੱਥੇ ਵੀ ਅਤੇ ਜਦੋਂ ਵੀ ਕੋਈ ਹਾਦਸਾ ਹੁੰਦਾ ਹੈ, ਜਾ ਫਿਰ ਤੇਜ਼ ਰਫ਼ਤਾਰ ਦਾ ਪਤਾ ਕਰਨਾ ਹੋਵੇ।” NZTA ਨੇ ਕਿਹਾ ਕਿ ਮੋਬਾਈਲ ਕੈਮਰੇ ਹਾਦਸਿਆਂ ਦੀ ਰੋਕਥਾਮ ਵਿੱਚ ਦੋ ਗੁਣਾ ਜ਼ਿਆਦਾ ਪ੍ਰਭਾਵਸ਼ਾਲੀ ਹਨ। ਇਸ ਤਕਨਾਲੋਜੀ ਨਾਲ ਸੜਕਾਂ ‘ਤੇ ਸੁਰੱਖਿਆ ਵਧੇਗੀ ਅਤੇ ਗਤੀ ਸੀਮਾ ਤੋਂ ਉੱਤੇ ਗੱਡੀਆਂ ਚਲਾਉਣ ਵਾਲਿਆਂ ਨੂੰ ਟਿਕਟ ਮਿਲਣਗੀਆਂ। ਇਸ ਦੇ ਨਾਲ-ਨਾਲ, ਨਵੇਂ ਐਵਰੇਜ ਸਪੀਡ ਕੈਮਰੇ ਵੀ ਲਗਾਏ ਜਾ ਰਹੇ ਹਨ, ਜੋ ਦੋ ਕੈਮਰਿਆਂ ਦੀ ਮਦਦ ਨਾਲ ਕਿਸੇ ਖਾਸ ਰਸਤੇ ‘ਚ ਡ੍ਰਾਈਵਰ ਦੀ ਗਤੀ ਦੀ ਔਸਤ ਪਤਾ ਕਰਦੇ ਹਨ। ਕੇਵਲ ਜੇ ਉਹ ਔਸਤ ਗਤੀ ਸੀਮਾ ਤੋਂ ਵੱਧ ਹੋਵੇਗੀ, ਤਦ ਹੀ ਟਿਕਟ ਜਾਰੀ ਕੀਤਾ ਜਾਵੇਗਾ।
SUVs ਵਾਂਗ, ਟ੍ਰੇਲਰ ‘ਤੇ ਸਾਈਨ ਪੋਸਟ ਨਹੀਂ ਕੀਤੇ ਜਾਣਗੇ, ਅਤੇ ਉਹ ਸੜਕ ਦੇ ਦੋਵੇਂ ਪਾਸੇ ਤੋਂ ਤੇਜ਼ ਰਫ਼ਤਾਰ ਵਾਲੇ ਵਾਹਨਾਂ ਦਾ ਪਤਾ ਕਰ ਸਕਦੇ ਹਨ। ਉਹ ਤੇਜ਼ ਰਫ਼ਤਾਰ ਵਾਲੇ ਵਾਹਨਾਂ ਦਾ ਵੀ ਪਤਾ ਲਗਾ ਸਕਦੇ ਹਨ ਜੋ ਉਨ੍ਹਾਂ ਵੱਲ ਆ ਰਹੇ ਹੋਣ ਜਾ ਫਿਰ ਭਾਵੇਂ ਉਨ੍ਹਾਂ ਤੋਂ ਦੂਰ ਜਾ ਰਹੇ ਹੋਣ। NZTA ਦੀ ਸਪੀਡ ਕੈਮਰੇ ਚਲਾਉਣ ਦੀ ਪੂਰੀ ਜ਼ਿੰਮੇਵਾਰੀ ਹੈ।
NZTA ਦਾ ਅੰਦਾਜ਼ਾ ਹੈ ਕਿ ਇਹ ਨਵੀਂ ਤਕਨਾਲੋਜੀ ਸੜਕ ਮੌਤਾਂ ਅਤੇ ਗੰਭੀਰ ਸੱਟਾਂ ਦੇ ਮਾਮਲਿਆਂ ਨੂੰ ਲਗਭਗ 48% ਘਟਾ ਦੇਵੇਗੀ। NZTA ਨੇ ਇਹ ਵੀ ਕਿਹਾ ਕਿ ਟਿਕਟਾਂ ਤੋਂ ਆਉਣ ਵਾਲੀ ਰਕਮ ਸਰਕਾਰ ਦੇ Consolidated Fund ਵਿੱਚ ਜਾਵੇਗੀ, ਨਾ ਕਿ NZTA ਨੂੰ। ਇਹ ਸਪੀਡ ਕੈਮਰੇ ਨਾਰਥਲੈਂਡ, ਆਕਲੈਂਡ, ਬੇ ਆਫ ਪਲੇਂਟੀ ਅਤੇ ਵੈਕਾਟੋ ਵਿੱਚ ਲਗਾਏ ਜਾ ਰਹੇ ਹਨ। ਦੱਸ ਦੇਈਏ SUV ਅਤੇ ਟ੍ਰੇਲਰ ਦੋਵਾਂ ਵਿੱਚ ਸੁਰੱਖਿਆ ਅਤੇ ਟਰੈਕਿੰਗ ਸਿਸਟਮ ਹਨ ਅਤੇ ਇਹ CCTV ਕੈਮਰੇ ਅਤੇ ਅਲਾਰਮ ਸਿਸਟਮ ਨਾਲ ਲੈਸ ਹਨ। ਉਹਨਾਂ ਦੀ ਨਿਗਰਾਨੀ 24 ਘੰਟੇ, ਹਫ਼ਤੇ ਦੇ ਸੱਤੇ ਦਿਨ ਕੀਤੀ ਜਾਂਦੀ ਹੈ।