ਨਿਊਜ਼ੀਲੈਂਡ ਦੇ ਥੇਮਜ਼ ਸਥਿਤ Four Square Martina ਸਟੋਰ ਅਤੇ ਇਸ ਦੇ ਮਾਲਕ ਜਸਵਿੰਦਰ ਸਿੰਘ ‘ਤੇ ਪ੍ਰਵਾਸੀ ਕਰਮਚਾਰੀਆਂ ਤੋਂ ਨੌਕਰੀ ਦੇ ਬਦਲੇ ਵੱਡੀ ਰਕਮ ਲੈਣ ਦੇ ਮਾਮਲੇ ਵਿੱਚ ਕੁੱਲ $44,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ।
ਮਾਮਲੇ ਅਨੁਸਾਰ, ਭਾਰਤ ਨਾਲ ਸਬੰਧਿਤ ਦੋ ਪ੍ਰਵਾਸੀ ਕਰਮਚਾਰੀਆਂ ਨੇ ਨਿਊਜ਼ੀਲੈਂਡ ਵਿੱਚ ਨੌਕਰੀ ਹਾਸਿਲ ਕਰਨ ਲਈ $60,000-60,000, ਯਾਨੀ ਕੁੱਲ $1.20 ਲੱਖ ਅਦਾ ਕੀਤੇ ਸਨ। ਦੋਵੇਂ ਕਰਮਚਾਰੀ Accredited Employer Work Visa ‘ਤੇ ਜੁਲਾਈ ਅਤੇ ਅਗਸਤ 2023 ਵਿੱਚ ਨਿਊਜ਼ੀਲੈਂਡ ਪਹੁੰਚੇ ਸਨ। ਇਹ ਰਕਮ ਭਾਰਤ ਵਿੱਚ ਸੱਤ ਕਿਸ਼ਤਾਂ ਰਾਹੀਂ ਦਿੱਤੀ ਗਈ ਸੀ।
Employment Relations Authority (ERA) ਦੀ ਮੈਂਬਰ ਹੈਲਨ ਵੈਨ ਡਰੂਟਨ ਨੇ A Dharni Enterprises Ltd, ਜੋ Four Square Martina ਦੇ ਨਾਮ ਨਾਲ ਕਾਰੋਬਾਰ ਕਰਦੀ ਸੀ, ਨੂੰ $32,000 ਅਤੇ ਮਾਲਕ ਜਸਵਿੰਦਰ ਸਿੰਘ ਨੂੰ $12,000 ਦਾ ਜੁਰਮਾਨਾ ਭਰਨ ਦੇ ਹੁਕਮ ਦਿੱਤੇ ਹਨ।
ERA ਨੇ ਆਪਣੇ ਫ਼ੈਸਲੇ ਵਿੱਚ ਕਿਹਾ ਕਿ ਕੰਪਨੀ ਨੇ ਕਰਮਚਾਰੀਆਂ ਤੋਂ ਲਈ ਗਈ ਰਕਮ ਦਾ ਇਸਤੇਮਾਲ ਉਨ੍ਹਾਂ ਦੀਆਂ ਆਪਣੀਆਂ ਤਨਖ਼ਾਹਾਂ ਦੇ ਭੁਗਤਾਨ ਲਈ ਕੀਤਾ, ਜਿਸ ਨਾਲ ਕੰਪਨੀ ਨੂੰ ਗੈਰ-ਵਾਜਬ ਵਿੱਤੀ ਫ਼ਾਇਦਾ ਮਿਲਿਆ। ਅਥਾਰਟੀ ਨੇ ਇਹ ਵੀ ਮੰਨਿਆ ਕਿ ਵਰਕ ਵੀਜ਼ਾ ਮਾਲਕ ਨਾਲ ਜੁੜਿਆ ਹੋਣ ਕਾਰਨ ਇਹ ਕਰਮਚਾਰੀ ਖ਼ਾਸ ਤੌਰ ‘ਤੇ ਅਸੁਰੱਖਿਅਤ ਸਥਿਤੀ ਵਿੱਚ ਸਨ।
ਦੋਵੇਂ ਕਰਮਚਾਰੀਆਂ ਨੇ ਕੁਝ ਸਮੇਂ ਬਾਅਦ ਨੌਕਰੀ ਛੱਡ ਦਿੱਤੀ। ਜਸਵਿੰਦਰ ਸਿੰਘ ਦਾ ਦਾਅਵਾ ਸੀ ਕਿ ਭਰਤੀ ਦੌਰਾਨ ਕਰਮਚਾਰੀਆਂ ਨੇ ਆਪਣੀ ਅੰਗਰੇਜ਼ੀ ਭਾਸ਼ਾ ਦੀ ਯੋਗਤਾ ਬਾਰੇ ਗਲਤ ਜਾਣਕਾਰੀ ਦਿੱਤੀ ਸੀ।
ਇਸ ਮਾਮਲੇ ਦੀ ਜਾਂਚ ਸਤੰਬਰ 2023 ਵਿੱਚ ਕਰਮਚਾਰੀਆਂ ਦੀ ਸ਼ਿਕਾਇਤ ਤੋਂ ਬਾਅਦ ਸ਼ੁਰੂ ਹੋਈ। ਪਹਿਲਾਂ Immigration Compliance and Investigations ਨੇ ਜਾਂਚ ਕੀਤੀ ਅਤੇ ਬਾਅਦ ਵਿੱਚ ਮਾਮਲਾ Labour Inspectorate ਨੂੰ ਸੌਂਪਿਆ ਗਿਆ।
Labour Inspectorate ਦੀ Migrant Exploitation Manager ਨੈਟਲੀ ਗਾਰਡੀਨਰ ਨੇ ਕਿਹਾ ਕਿ ਨੌਕਰੀ ਦੇ ਬਦਲੇ ਪ੍ਰਵਾਸੀ ਕਰਮਚਾਰੀਆਂ ਤੋਂ ਪੈਸੇ ਮੰਗਣਾ ਰੁਜ਼ਗਾਰ ਕਾਨੂੰਨਾਂ ਦੀ ਗੰਭੀਰ ਉਲੰਘਣਾ ਹੈ ਅਤੇ ਨਿਊਜ਼ੀਲੈਂਡ ਵਿੱਚ ਅਜਿਹੇ ਵਿਵਹਾਰ ਲਈ ਕੋਈ ਥਾਂ ਨਹੀਂ ਹੈ।
ERA ਦੀ ਸੁਣਵਾਈ ਤੋਂ ਪਹਿਲਾਂ ਕੰਪਨੀ ਨੇ ਦੋਵੇਂ ਕਰਮਚਾਰੀਆਂ ਨੂੰ ਉਨ੍ਹਾਂ ਵੱਲੋਂ ਦਿੱਤੀ ਗਈ ਪੂਰੀ ਰਕਮ ਵਾਪਸ ਕਰ ਦਿੱਤੀ ਸੀ। ਇਸ ਤੋਂ ਇਲਾਵਾ, ਜੁਰਮਾਨੇ ਵਿੱਚੋਂ ਹਰ ਕਰਮਚਾਰੀ ਨੂੰ $1,000 ਵੀ ਦਿੱਤੇ ਜਾਣਗੇ। ਕੰਪਨੀ ਅਤੇ ਮਾਲਕ ਨੂੰ ਸਾਂਝੇ ਤੌਰ ‘ਤੇ Labour Inspectorate ਦੇ $7,000 ਤੋਂ ਵੱਧ ਦੇ ਖਰਚੇ ਵੀ ਅਦਾ ਕਰਨ ਦੇ ਹੁਕਮ ਦਿੱਤੇ ਗਏ ਹਨ।
ਇਸ ਦੌਰਾਨ Foodstuffs North Island ਨੇ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਸੰਬੰਧਿਤ ਸਟੋਰ ਹੁਣ Four Square ਬ੍ਰਾਂਡ ਦਾ ਹਿੱਸਾ ਨਹੀਂ ਹੈ ਅਤੇ ਇਸ ਦਾ ਫ੍ਰੈਂਚਾਈਜ਼ ਹੱਕ ਰੱਦ ਕੀਤਾ ਜਾ ਚੁੱਕਾ ਹੈ। ਕੰਪਨੀ ਨੇ Employment Relations Authority ਦੇ ਫ਼ੈਸਲੇ ‘ਤੇ ਗੰਭੀਰ ਚਿੰਤਾ ਜ਼ਾਹਿਰ ਕਰਦਿਆਂ ਕਿਹਾ ਕਿ ਅਜਿਹਾ ਵਿਵਹਾਰ ਉਸ ਦੇ ਮਾਪਦੰਡਾਂ ਦੇ ਬਿਲਕੁਲ ਉਲਟ ਹੈ ਅਤੇ ਭਵਿੱਖ ਵਿੱਚ ਵੀ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਜਾਰੀ ਰਹੇਗੀ।