ਦੁਨੀਆ ਦੀ ਪ੍ਰਸਿੱਧ ਇਲੈਕਟ੍ਰਿਕ ਵਾਹਨ ਨਿਰਮਾਤਾ ਕੰਪਨੀ Tesla ਨੇ ਆਪਣੀ ਡਰਾਈਵਰ-ਰਹਿਤ Cybercab ਦੀ ਨਿਊਜ਼ੀਲੈਂਡ ਦੀਆਂ ਜਨਤਕ ਸੜਕਾਂ ‘ਤੇ ਪਹਿਲੀ ਵਾਰ ਟੈਸਟਿੰਗ ਸ਼ੁਰੂ ਕਰ ਦਿੱਤੀ ਹੈ। ਇਹ ਪ੍ਰੋਟੋਟਾਈਪ ਵਾਹਨ ਦੱਖਣੀ ਟਾਪੂ ਦੇ ਕਾਰਡਰੋਨਾ ਵੈਲੀ ਰੋਡ ਅਤੇ Southern Hemisphere Proving Grounds ਵਿੱਚ ਸਰਦੀਆਂ ਅਤੇ ਬਰਫ਼ੀਲੇ ਮੌਸਮ ਦੌਰਾਨ ਇਸ ਦੀ ਕਾਰਗੁਜ਼ਾਰੀ ਪਰਖਣ ਲਈ ਚਲਾਇਆ ਜਾ ਰਿਹਾ ਹੈ।
ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈਆਂ ਤਸਵੀਰਾਂ ਵਿੱਚ ਸੁਨਹਿਰੀ ਰੰਗ ਦੀ Cybercab ਬਰਫ਼ ਨਾਲ ਢੱਕੇ ਇਲਾਕੇ ਵਿੱਚ ਟੈਸਟਿੰਗ ਕਰਦੀ ਦਿਖਾਈ ਦੇ ਰਹੀ ਹੈ। ਜਾਣਕਾਰੀ ਮੁਤਾਬਿਕ, ਪਿਛਲੇ ਮਹੀਨੇ Tesla ਦੀਆਂ ਦੋ Cybercab ਗੱਡੀਆਂ ਨਿਊਜ਼ੀਲੈਂਡ ਪਹੁੰਚੀਆਂ ਸਨ, ਜਿਨ੍ਹਾਂ ‘ਤੇ ਹੁਣ ਠੰਢੇ ਮੌਸਮ ਵਿੱਚ ਵੱਖ-ਵੱਖ ਤਕਨੀਕੀ ਜਾਂਚਾਂ ਕੀਤੀਆਂ ਜਾ ਰਹੀਆਂ ਹਨ।
Tesla ਨੇ ਪੁਸ਼ਟੀ ਕੀਤੀ ਹੈ ਕਿ ਇਹ ਕੰਪਨੀ ਦੇ ਆਪਣੇ ਪ੍ਰੋਟੋਟਾਈਪ ਵਾਹਨ ਹਨ ਅਤੇ ਇਨ੍ਹਾਂ ਨੂੰ ਬਰਫ਼, ਘੱਟ ਤਾਪਮਾਨ ਅਤੇ ਮੁਸ਼ਕਿਲ ਸੜਕ ਹਾਲਾਤਾਂ ਵਿੱਚ ਪਰਖਿਆ ਜਾ ਰਿਹਾ ਹੈ। ਕਵੀਨਸਟਾਊਨ ਨੇੜੇ ਸਥਿਤ Southern Hemisphere Proving Grounds ਦੁਨੀਆ ਦੀਆਂ ਕਈ ਵਾਹਨ ਨਿਰਮਾਤਾ ਕੰਪਨੀਆਂ ਲਈ ਸਰਦੀਆਂ ਦੀ ਟੈਸਟਿੰਗ ਦਾ ਪ੍ਰਮੁੱਖ ਕੇਂਦਰ ਮੰਨਿਆ ਜਾਂਦਾ ਹੈ।
ਹਾਲਾਂਕਿ Cybercab ਦੇ ਅੰਦਰ ਯਾਤਰੀ ਮੌਜੂਦ ਸਨ, ਪਰ ਅਜੇ ਇਹ ਸਪੱਸ਼ਟ ਨਹੀਂ ਹੋਇਆ ਕਿ ਵਾਹਨ ਪੂਰੀ ਤਰ੍ਹਾਂ ਸੈਲਫ-ਡ੍ਰਾਈਵਿੰਗ ਮੋਡ ਵਿੱਚ ਚੱਲ ਰਿਹਾ ਸੀ ਜਾਂ ਕਿਸੇ ਵਿਅਕਤੀ ਵੱਲੋਂ ਇਸ ਦੀ ਨਿਗਰਾਨੀ ਕੀਤੀ ਜਾ ਰਹੀ ਸੀ। ਫਿਲਹਾਲ ਇਸ ਨੂੰ ਨਿਊਜ਼ੀਲੈਂਡ ਦੀਆਂ ਜਨਤਕ ਸੜਕਾਂ ‘ਤੇ Cybercab ਦੀ ਪਹਿਲੀ ਦਰਜ ਟੈਸਟਿੰਗ ਮੰਨਿਆ ਜਾ ਰਿਹਾ ਹੈ।