ਤਕਾਪੁਨਾ: ਨਿਊਜ਼ੀਲੈਂਡ ਦੇ ਤਕਾਪੁਨਾ ਇਲਾਕੇ ਵਿੱਚ ਇੱਕ ਕੁੜੀ ਨਾਲ ਦੋ ਵਾਰ ਹੋਈ ਹਿੰਸਕ ਲੁੱਟ ਦੇ ਮਾਮਲੇ ਵਿੱਚ ਪੁਲਿਸ ਨੇ ਦੋ 14 ਸਾਲਾ ਲੜਕੀਆਂ ਨੂੰ ਹਿਰਾਸਤ ਵਿੱਚ ਲਿਆ ਹੈ। ਦੋਵੇਂ ਘਟਨਾਵਾਂ ਇੱਕ ਮਹੀਨੇ ਤੋਂ ਵੀ ਘੱਟ ਸਮੇਂ ਦੇ ਅੰਤਰਾਲ ਵਿੱਚ ਵਾਪਰੀਆਂ।
ਪਹਿਲੀ ਘਟਨਾ 22 ਅਗਸਤ ਨੂੰ ਵਾਪਰੀ ਸੀ, ਜਦੋਂ ਦੋ ਲੜਕੀਆਂ ਨੂੰ ਉਨ੍ਹਾਂ ਦੇ ਜਾਣ-ਪਛਾਣ ਵਾਲੇ ਨੌਜਵਾਨਾਂ ਦੇ ਇੱਕ ਸਮੂਹ ਨੇ ਕਥਿਤ ਤੌਰ ’ਤੇ ਘੇਰ ਕੇ ਕੁੱਟਿਆ। ਇੱਕ ਸਥਾਨਕ ਕਮਿਊਨਿਟੀ ਪੋਸਟ ਵਿੱਚ ਲਗਾਏ ਦੋਸ਼ਾਂ ਮੁਤਾਬਕ ਲੜਕੀਆਂ ਨੂੰ ਲੱਤਾਂ ਮਾਰੀਆਂ ਗਈਆਂ ਅਤੇ ਕੁੱਟਮਾਰ ਕਰਨ ਤੋਂ ਬਾਅਦ ਉਨ੍ਹਾਂ ਦੇ ਕੱਪੜੇ ਉਤਾਰ ਕੇ ਅੰਦਰਲੇ ਕੱਪੜਿਆਂ ਤੱਕ ਛੱਡ ਦਿੱਤਾ ਗਿਆ। ਉਨ੍ਹਾਂ ਦੇ ਮੋਬਾਈਲ ਫੋਨ, ਕੱਪੜੇ ਅਤੇ ਹੋਰ ਸਮਾਨ ਵੀ ਕਥਿਤ ਤੌਰ ’ਤੇ ਲੁੱਟ ਲਿਆ ਗਿਆ।
ਦੂਜੀ ਘਟਨਾ 13 ਸਤੰਬਰ ਨੂੰ ਵਾਪਰੀ, ਜਿਸ ਵਿੱਚ ਪਹਿਲੀ ਘਟਨਾ ਦੀ ਇੱਕ ਪੀੜਤਾ ਮੁੜ ਸ਼ਿਕਾਰ ਬਣੀ। ਪੁਲਿਸ ਮੁਤਾਬਿਕ ਇਸ ਮਾਮਲੇ ਵਿੱਚ ਸ਼ਾਮਲ ਇੱਕ 14 ਸਾਲਾ ਲੜਕੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।
ਇੰਸਪੈਕਟਰ ਐਰੋਨ ਮੈਕਕਿਊਨ ਨੇ ਕਿਹਾ ਕਿ ਦੂਜੀ ਘਟਨਾ ਵਿੱਚ ਪੀੜਤਾ ਅਤੇ ਕਥਿਤ ਦੋਸ਼ੀ ਉਹੀ ਸਨ ਜੋ ਅਗਸਤ ਦੀ ਘਟਨਾ ਨਾਲ ਜੁੜੇ ਹੋਏ ਸਨ। ਅਗਸਤ ਵਾਲੇ ਮਾਮਲੇ ਵਿੱਚ ਪਹਿਲਾਂ ਹੀ ਇੱਕ 14 ਸਾਲਾ ਲੜਕੀ ਨੂੰ ਹਿਰਾਸਤ ਵਿੱਚ ਲਿਆ ਜਾ ਚੁੱਕਾ ਹੈ। ਉਹ ਇਸ ਸਮੇਂ ਹਿਰਾਸਤ ਵਿੱਚ ਹੈ ਅਤੇ ਉਸ ’ਤੇ ਅਗਰੇਵੇਟਿਡ ਰੌਬਰੀ (ਗੰਭੀਰ ਲੁੱਟ) ਦਾ ਦੋਸ਼ ਹੈ, ਜਦਕਿ ਹੋਰ ਦੋਸ਼ ਵੀ ਲਗਾਏ ਜਾਣ ਦੀ ਸੰਭਾਵਨਾ ਹੈ।
ਪੁਲਿਸ ਨੇ ਹੁਣ ਦੂਜੀ 14 ਸਾਲਾ ਲੜਕੀ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਨੂੰ 30 ਸਤੰਬਰ ਨੂੰ ਨੌਰਥ ਸ਼ੋਰ ਯੂਥ ਕੋਰਟ ਵਿੱਚ ਪੇਸ਼ ਕੀਤਾ ਜਾਣਾ ਹੈ। ਉਸ ’ਤੇ ਅਗਰੇਵੇਟਿਡ ਰੌਬਰੀ, ਜ਼ਖ਼ਮੀ ਕਰਨ ਦੀ ਨੀਅਤ ਨਾਲ ਹਮਲੇ ਦੇ ਦੋ ਮਾਮਲੇ, ਦੁਕਾਨ ਤੋਂ ਚੋਰੀ ਅਤੇ ਬੇਈਮਾਨੀ ਨਾਲ ਦਸਤਾਵੇਜ਼ ਲੈਣ ਦੇ ਦੋਸ਼ ਲਗਾਏ ਗਏ ਹਨ।
ਪੁਲਿਸ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਪੀੜਤ ਲੜਕੀਆਂ ਤੇ ਉਨ੍ਹਾਂ ਦੇ ਪਰਿਵਾਰਾਂ ਨਾਲ ਲਗਾਤਾਰ ਸੰਪਰਕ ਬਣਾਇਆ ਹੋਇਆ ਹੈ।
ਮੈਕਕਿਊਨ ਨੇ ਕਿਹਾ ਕਿ ਇਨ੍ਹਾਂ ਘਟਨਾਵਾਂ ਕਾਰਨ ਪੀੜਤਾਂ, ਉਨ੍ਹਾਂ ਦੇ ਪਰਿਵਾਰਾਂ ਅਤੇ ਪੂਰੇ ਭਾਈਚਾਰੇ ਵਿੱਚ ਚਿੰਤਾ ਪੈਦਾ ਹੋਈ ਹੈ। ਪੁਲਿਸ ਮੁਤਾਬਿਕ ਤਕਾਪੁਨਾ ਦੇ ਨੌਜਵਾਨਾਂ ਦੇ ਇੱਕ ਸਮੂਹ ਨਾਲ ਜੁੜੀਆਂ ਕਈ ਘਟਨਾਵਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਜਿਨ੍ਹਾਂ ਵਿੱਚ ਲੁੱਟ, ਹਮਲੇ ਅਤੇ ਦੁਕਾਨਾਂ ਤੋਂ ਚੋਰੀ ਦੇ ਮਾਮਲੇ ਸ਼ਾਮਿਲ ਹਨ।
ਜਾਂਚ ਦੌਰਾਨ ਪੁਲਿਸ ਨੇ ਅਗਸਤ ਦੀ ਘਟਨਾ ਨੂੰ ਹੋਰ ਕਥਿਤ ਘਟਨਾਵਾਂ ਨਾਲ ਜੋੜਿਆ, ਜਿਸ ਤੋਂ ਬਾਅਦ ਜਾਂਚ ਦਾ ਦਾਇਰਾ ਵਧਾਇਆ ਗਿਆ। 13 ਸਤੰਬਰ ਦੀ ਘਟਨਾ ਵਿੱਚ ਸ਼ਾਮਲ ਇੱਕ ਹੋਰ ਵਿਅਕਤੀ ਦੀ ਹਾਲੇ ਤੱਕ ਗ੍ਰਿਫ਼ਤਾਰੀ ਨਹੀਂ ਹੋਈ।
ਹੁਣ ਤੱਕ 14 ਤੋਂ 16 ਸਾਲ ਦੀ ਉਮਰ ਦੇ ਚਾਰ ਨੌਜਵਾਨਾਂ ਨੂੰ ਯੂਥ ਏਡ ਕੋਲ ਰੈਫਰ ਕੀਤਾ ਗਿਆ ਹੈ।