ਨਿਊਜ਼ੀਲੈਂਡ ‘ਚ ਘਰਾਂ ‘ਚ ਕਿਰਾਏ ‘ਤੇ ਰਹਿੰਦੇ ਲੋਕਾਂ ਵੱਲੋਂ ਕਾਫੀ ਵਾਰ ਘਰਾਂ ਦੀ ਖਸਤਾ ਹਾਲਤ ਦੀ ਸ਼ਕਾਇਤ ਕੀਤੀ ਜਾਂਦੀ ਸੀ। ਪਰ ਹੁਣ ਇਸ ਦੌਰਾਨ ਦੇਸ਼ ਭਰ ‘ਚ ਭਲਕੇ ਤੋਂ ਯਾਨੀ ਕਿ 1 ਜੁਲਾਈ 2025 ਤੋਂ ਕਿਰਾਏ ‘ਤੇ ਦਿੱਤੇ ਜਾਂਦੇ ਸਾਰੇ ਘਰਾਂ ਲਈ Healthy Homes Standard ਲਾਗੂ ਕੀਤੇ ਜਾ ਰਹੇ ਹਨ। ਸਰਕਾਰ ਨੇ ਇਹ ਕਾਨੂੰਨ 2019 ਵਿੱਚ ਪਾਸ ਕੀਤਾ ਸੀ ਅਤੇ ਕਈ ਸਾਲਾਂ ਤੋਂ ਇਸ ਦੀ ਲਾਗੂ ਹੋਣ ਦੀ ਪ੍ਰਕਿਰਿਆ ਜਾਰੀ ਸੀ। ਹੁਣ ਹਰੇਕ ਕਿਰਾਏ ਵਾਲੀ ਥਾਂ ਨੂੰ ਇਹ ਮਾਪਦੰਡ ਪੂਰੇ ਕਰਨੇ ਲਾਜ਼ਮੀ ਹੋਣਗੇ। ਇੰਨਾਂ ਹੀ ਜੇਕਰ ਕਿਸੇ ਦੇ ਵੱਲੋਂ ਉਲੰਘਣਾ ਕੀਤੀ ਜਾਂਦੀ ਹੈ ਤਾਂ ਉਸਨੂੰ $7200 ਤੱਕ ਦਾ ਜੁਰਮਾਨਾ ਲੱਗ ਸਕਦਾ ਹੈ। ਕਿਰਾਏਦਾਰ ਨੂੰ ਮੁਆਵਜ਼ਾ ਵੀ ਮਿਲ ਸਕਦਾ ਹੈ ਜੇਕਰ ਉਹ ਟੈਨੈਂਸੀ ਟਰਾਈਬਿਊਨਲ ਵਿੱਚ ਮਾਮਲਾ ਲੈ ਜਾਂਦੇ ਹਨ।
ਨਵੇਂ ਨਿਯਮਾਂ ਦੇ ਮੁਤਾਬਿਕ ਹਰ ਘਰ ਵਿੱਚ ਅੱਗੇ ਲਿਖੀਆਂ ਸਹੂਲਤਾਂ ਹੋਣੀਆਂ ਜ਼ਰੂਰੀ ਹਨ – ਠੰਢ ਤੋਂ ਬਚਾਅ ਲਈ ਹੀਟਿੰਗ, ਇੰਸੂਲੇਸ਼ਨ (ਛੱਤ ਅਤੇ ਫਰਸ਼), ਹਵਾਬੰਦ ਬਾਥਰੂਮ ਅਤੇ ਰਸੋਈਆਂ ਲਈ ਵੈਂਟਿਲੇਸ਼ਨ, ਗੀਲਾਪਨ ਅਤੇ ਨਮੀ ਤੋਂ ਬਚਾਅ ਅਤੇ ਨਿਕਾਸੀ ਜਮ੍ਹਾਂ ਹੋਣ ਤੋਂ ਰੋਕਥਾਮ।