ਨਿਊਜ਼ੀਲੈਂਡ ਦੇ ਆਕਲੈਂਡ ਅਤੇ ਨਾਰਥਲੈਂਡ ਖੇਤਰਾਂ ਵਿੱਚ ਮੈਥਐਮਫੈਟਾਮੀਨ (ਮੈਥ) ਦੀ ਤਿਆਰੀ ਅਤੇ ਸਪਲਾਈ ਖ਼ਿਲਾਫ਼ ਚਲਾਈ ਗਈ ਵੱਡੀ ਪੁਲਿਸ ਕਾਰਵਾਈ ਦੌਰਾਨ ਇੱਕ ਬੱਚੇ ਦੇ ਸੌਣ ਵਾਲੇ ਕਮਰੇ ਵਿੱਚ ਰੱਖੇ ਬੈਗ ਵਿੱਚੋਂ ਲੋਡਡ ਪਿਸਤੌਲ ਬਰਾਮਦ ਹੋਈ ਹੈ। ਇਹ ਕਾਰਵਾਈ “ਓਪਰੇਸ਼ਨ ਫੀਨਿਕਸ” ਤਹਿਤ ਨੈਸ਼ਨਲ ਆਰਗਨਾਈਜ਼ਡ ਕਰਾਈਮ ਗਰੁੱਪ ਵੱਲੋਂ ਨਾਰਥਲੈਂਡ ਪੁਲਿਸ ਦੇ ਸਹਿਯੋਗ ਨਾਲ ਚਲਾਈ ਗਈ। ਨੈਸ਼ਨਲ ਆਰਗਨਾਈਜ਼ਡ ਕਰਾਈਮ ਗਰੁੱਪ ਦੇ ਡਾਇਰੈਕਟਰ ਡਿਟੈਕਟਿਵ ਸੁਪਰਿੰਟੈਂਡੈਂਟ ਗ੍ਰੈਗ ਵਿਲੀਅਮਜ਼ ਨੇ ਦੱਸਿਆ ਕਿ ਫਾਰ ਨਾਰਥ ਖੇਤਰ ਵਿੱਚ ਮਾਰੇ ਗਏ ਛਾਪਿਆਂ ਦੌਰਾਨ ਕੁੱਲ ਨੌਂ ਹਥਿਆਰ ਬਰਾਮਦ ਹੋਏ, ਜਿਨ੍ਹਾਂ ਵਿੱਚ ਇੱਕ ਲੋਡਡ ਪਿਸਤੌਲ ਬੱਚੇ ਦੇ ਕਮਰੇ ਵਿੱਚ ਰੱਖੇ ਬੈਕਪੈਕ ਵਿੱਚੋਂ ਮਿਲੀ।
ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੀ ਘਟਨਾ ਬਹੁਤ ਚਿੰਤਾਜਨਕ ਹੈ। ਅਗਸਤ 2025 ਵਿੱਚ ਸ਼ੁਰੂ ਹੋਏ ਇਸ ਆਪਰੇਸ਼ਨ ਦਾ ਮੁੱਖ ਉਦੇਸ਼ ਮੈਥਐਮਫੈਟਾਮੀਨ ਦੀ ਵਿਕਰੀ ਅਤੇ ਸਪਲਾਈ ਵਿੱਚ ਸ਼ਾਮਲ ਗਿਰੋਹਾਂ ਨੂੰ ਨਿਸ਼ਾਨਾ ਬਣਾਉਣਾ ਸੀ। ਨਾਰਥਲੈਂਡ ਵਿੱਚ ਚਾਰ ਹਫ਼ਤਿਆਂ ਦੌਰਾਨ 37 ਤਲਾਸ਼ੀ ਵਾਰੰਟ ਜਾਰੀ ਕੀਤੇ ਗਏ ਅਤੇ 21 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਇਸ ਤੋਂ ਬਾਅਦ ਕੈਟਾਇਆ ਖੇਤਰ ਵਿੱਚ ਹੋਰ 34 ਛਾਪੇ ਮਾਰੇ ਗਏ।
ਹੁਣ ਤੱਕ ਕੁੱਲ 14 ਲੋਕਾਂ ਉੱਤੇ ਦੋਸ਼ ਲਗਾਏ ਜਾ ਚੁੱਕੇ ਹਨ। ਇਸ ਮੁਹਿੰਮ ਲਈ ਆਕਲੈਂਡ ਤੋਂ 70 ਅਤੇ ਨਾਰਥਲੈਂਡ ਤੋਂ 21 ਪੁਲਿਸ ਕਰਮਚਾਰੀ ਤਾਇਨਾਤ ਕੀਤੇ ਗਏ ਸਨ। ਛਾਪਿਆਂ ਦੌਰਾਨ ਪੁਲਿਸ ਨੇ ਮੈਥ ਬਣਾਉਣ ਵਾਲੀਆਂ ਗੁਪਤ ਲੈਬੋਰਟਰੀਆਂ ਨਾਲ ਸੰਬੰਧਤ ਰਸਾਇਣ, ਹਥਿਆਰ ਅਤੇ ਮੈਥਐਮਫੈਟਾਮੀਨ ਵੀ ਬਰਾਮਦ ਕੀਤੇ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਇਸ ਗਿਰੋਹ ਦੇ ਸੰਬੰਧ ਟ੍ਰਾਈਬਜ਼ਮੈਨ ਅਤੇ ਹੈਡ ਹੰਟਰਜ਼ ਗੈਂਗਾਂ ਨਾਲ ਸਨ।
ਵਿਲੀਅਮਜ਼ ਨੇ ਕਿਹਾ ਕਿ ਨਿਊਜ਼ੀਲੈਂਡ ਵਿੱਚ ਅਜੇ ਵੀ ਮੈਥ ਦੀ ਗੈਰਕਾਨੂੰਨੀ ਤਿਆਰੀ ਹੋ ਰਹੀ ਹੈ। ਉਨ੍ਹਾਂ ਅਨੁਸਾਰ ਵਿਦੇਸ਼ਾਂ ਤੋਂ ਆਉਣ ਵਾਲੀ ਮੈਥ ਦੀ ਗੁਣਵੱਤਾ ਵਿੱਚ ਕਮੀ ਕਾਰਨ ਦੇਸ਼ ਅੰਦਰ ਇਸ ਦੀ ਉਤਪਾਦਨ ਵਿੱਚ ਵਾਧਾ ਦੇਖਿਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਫਾਰ ਨਾਰਥ ਦਾ ਇਹ ਗਿਰੋਹ ਖੁਦ ਮੈਥ ਤਿਆਰ ਕਰਕੇ ਸਥਾਨਕ ਭਾਈਚਾਰੇ ਵਿੱਚ ਵੇਚ ਰਿਹਾ ਸੀ। ਆਕਲੈਂਡ ਨੂੰ ਮੈਥ ਦੇ ਕਾਰੋਬਾਰ ਦਾ ਮੁੱਖ ਕੇਂਦਰ ਦੱਸਦਿਆਂ ਉਨ੍ਹਾਂ ਕਿਹਾ ਕਿ ਇੱਥੇ ਵੱਡੇ ਪੱਧਰ ‘ਤੇ ਮਨੀ ਲਾਂਡਰਿੰਗ ਵੀ ਦੇਖਣ ਨੂੰ ਮਿਲਦੀ ਹੈ।
ਨਾਰਥਲੈਂਡ ਦੇ ਸੁਪਰਿੰਟੈਂਡੈਂਟ ਮੈਥਿਊ ਸ੍ਰੋਹਜ ਨੇ ਕਿਹਾ ਕਿ ਮੈਥ ਦੀ ਲਤ ਨਾਲ ਜੂਝ ਰਹੇ ਲੋਕਾਂ ਲਈ ਸਹਾਇਤਾ ਉਪਲਬਧ ਹੈ ਅਤੇ ਭਾਈਚਾਰੇ ਨੂੰ ਅਜਿਹੀਆਂ ਗਤੀਵਿਧੀਆਂ ਬਾਰੇ ਜਾਣਕਾਰੀ ਪੁਲਿਸ ਨਾਲ ਸਾਂਝੀ ਕਰਨੀ ਚਾਹੀਦੀ ਹੈ। ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀਆਂ ‘ਤੇ ਮੈਥਐਮਫੈਟਾਮੀਨ ਦੀ ਤਿਆਰੀ, ਸਪਲਾਈ ਲਈ ਰੱਖਣ, ਮੈਥ ਦੀ ਸਪਲਾਈ ਕਰਨ ਅਤੇ ਸੰਗਠਿਤ ਅਪਰਾਧਿਕ ਗਰੁੱਪ ਵਿੱਚ ਸ਼ਾਮਲ ਹੋਣ ਵਰਗੇ ਦੋਸ਼ ਲਗਾਏ ਗਏ ਹਨ।
ਵਿਲੀਅਮਜ਼ ਨੇ ਕਿਹਾ ਕਿ ਗ੍ਰਿਫ਼ਤਾਰੀਆਂ ਤੋਂ ਬਾਅਦ ਹੁਣ ਪੁਲਿਸ ਦਾ ਧਿਆਨ ਸਥਾਨਕ ਭਾਈਚਾਰੇ ਦੀ ਮਦਦ ਕਰਨ ਅਤੇ ਨਸ਼ੇ ਦੀ ਲਤ ਤੋਂ ਪੀੜਤ ਲੋਕਾਂ ਨੂੰ ਸਹਾਇਤਾ ਮੁਹੱਈਆ ਕਰਵਾਉਣ ‘ਤੇ ਕੇਂਦ੍ਰਿਤ ਹੈ। ਉਨ੍ਹਾਂ ਦੱਸਿਆ ਕਿ 2024 ਤੋਂ ਬਾਅਦ ਨਿਊਜ਼ੀਲੈਂਡ ਵਿੱਚ ਮੈਥ ਦੀ ਸਥਾਨਕ ਤਿਆਰੀ ਵਿੱਚ ਲਗਾਤਾਰ ਵਾਧਾ ਹੋਇਆ ਹੈ, ਜਿਸ ਦਾ ਇੱਕ ਕਾਰਨ ਮੰਗ ਵਿੱਚ ਵਾਧਾ ਵੀ ਹੈ। ਮੈਥ ਦੀ ਤਸਕਰੀ ਡਾਕ ਪ੍ਰਣਾਲੀ, ਸਮੁੰਦਰੀ ਕੰਟੇਨਰਾਂ, ਛੋਟੀਆਂ ਕਿਸ਼ਤੀਆਂ, ਹਵਾਈ ਕਾਰਗੋ ਅਤੇ ਕੂਰੀਅਰ ਸੇਵਾਵਾਂ ਰਾਹੀਂ ਕੀਤੀ ਜਾ ਰਹੀ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ ਅੰਤਰਰਾਸ਼ਟਰੀ ਅਪਰਾਧਿਕ ਗਿਰੋਹ ਨਿਊਜ਼ੀਲੈਂਡ ਵਿੱਚ ਵੱਡੇ ਪੱਧਰ ‘ਤੇ ਮੈਥ ਪਹੁੰਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਜਿਸ ਕਾਰਨ ਇਸ ਨਸ਼ੇ ਖ਼ਿਲਾਫ਼ ਕਾਰਵਾਈ ਜਾਰੀ ਰਹੇਗੀ।