ਨਿਊਜ਼ੀਲੈਂਡ ਵਿੱਚ ਮਸ਼ਹੂਰ ਫੂਡ ਕੰਪਨੀ Heinz Wattie’s ਨੇ ਆਪਣੇ ਚਾਰ ਆਪਰੇਸ਼ਨ ਬੰਦ ਕਰਨ ਦਾ ਵੱਡਾ ਐਲਾਨ ਕੀਤਾ ਹੈ, ਜਿਸ ਨਾਲ ਲਗਭਗ 300 ਤੋਂ ਵੱਧ ਕਰਮਚਾਰੀਆਂ ਦੀਆਂ ਨੌਕਰੀਆਂ ਖਤਰੇ ਵਿੱਚ ਆ ਗਈਆਂ ਹਨ। ਕੰਪਨੀ ਦੇ ਇਸ ਫੈਸਲੇ ਨਾਲ ਕ੍ਰਾਈਸਟਚਰਚ, ਡੁਨੇਡਿਨ ਅਤੇ ਆਕਲੈਂਡ ਵਿੱਚ ਸਥਿਤ ਮੈਨੂਫੈਕਚਰਿੰਗ ਪਲਾਂਟਾਂ ਦੇ ਨਾਲ-ਨਾਲ ਹੇਸਟਿੰਗਜ਼ ਦੇ ਫਰੋਜ਼ਨ ਪੈਕਿੰਗ ਯੂਨਿਟ ‘ਤੇ ਵੀ ਅਸਰ ਪਵੇਗਾ। ਇਹ ਫੈਸਲਾ ਕਰਮਚਾਰੀਆਂ ਅਤੇ ਯੂਨੀਅਨਾਂ ਨਾਲ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਲਿਆ ਗਿਆ ਹੈ। ਕੰਪਨੀ ਇਸਦੇ ਨਾਲ ਨਿਊਜ਼ੀਲੈਂਡ ਵਿੱਚ ਆਪਣੇ ਫਰੋਜ਼ਨ ਸਬਜ਼ੀਆਂ, ਕੌਫੀ ਅਤੇ ਡਿਪਸ ਦੇ ਕਾਰੋਬਾਰ ਤੋਂ ਵੀ ਹੱਥ ਖਿੱਚ ਰਹੀ ਹੈ।
ਕੰਪਨੀ ਦੇ ਮੈਨੇਜਿੰਗ ਡਾਇਰੈਕਟਰ ਐਂਡਰੂ ਡੋਨੇਗਨ ਨੇ ਕਿਹਾ ਕਿ ਇਹ ਕਦਮ ਲੰਬੇ ਸਮੇਂ ਲਈ ਕੰਪਨੀ ਦੇ ਭਵਿੱਖ ਨੂੰ ਮਜ਼ਬੂਤ ਕਰਨ ਲਈ ਲਿਆ ਗਿਆ ਹੈ, ਪਰ ਇਸ ਨਾਲ ਕਰਮਚਾਰੀਆਂ ‘ਤੇ ਪੈਣ ਵਾਲਾ ਅਸਰ ਚਿੰਤਾਜਨਕ ਹੈ। ਕੰਪਨੀ ਮੁਤਾਬਕ, ਇਹ ਬੰਦਸ਼ਾਂ ਇੱਕਦਮ ਨਹੀਂ, ਸਗੋਂ ਸਾਲ ਭਰ ਦੌਰਾਨ ਹੌਲੀ-ਹੌਲੀ ਲਾਗੂ ਕੀਤੀਆਂ ਜਾਣਗੀਆਂ, ਜਿਸ ਕਰਕੇ ਅੰਤਿਮ ਤੌਰ ‘ਤੇ ਕਿੰਨੀਆਂ ਨੌਕਰੀਆਂ ਪ੍ਰਭਾਵਿਤ ਹੋਣਗੀਆਂ, ਇਹ ਹਾਲੇ ਸਪਸ਼ਟ ਨਹੀਂ।
Heinz Wattie’s ਨੇ ਇਹ ਵੀ ਕਿਹਾ ਕਿ ਕੁਝ ਕਰਮਚਾਰੀਆਂ ਨੂੰ ਖਾਸ ਤੌਰ ‘ਤੇ ਹੇਸਟਿੰਗਜ਼ ਵਿੱਚ, ਹੋਰ ਭੂਮਿਕਾਵਾਂ ਲਈ ਟ੍ਰੇਨਿੰਗ ਦੇ ਕੇ ਕੰਪਨੀ ਵਿੱਚ ਹੀ ਰੱਖਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ, ਪ੍ਰਭਾਵਿਤ ਕਰਮਚਾਰੀਆਂ ਨੂੰ ਰੈਡੰਡੰਸੀ ਪੈਕੇਜ, ਮਾਨਸਿਕ ਸਹਾਇਤਾ ਅਤੇ ਨਵੀਆਂ ਨੌਕਰੀਆਂ ਦੀ ਭਾਲ ਵਿੱਚ ਮਦਦ ਵੀ ਦਿੱਤੀ ਜਾਵੇਗੀ। ਕੰਪਨੀ ਨੇ ਮੰਨਿਆ ਕਿ ਬਹੁਤ ਸਾਰੇ ਕਰਮਚਾਰੀ ਲੰਬੇ ਸਮੇਂ ਤੋਂ ਕੰਮ ਕਰ ਰਹੇ ਤਜਰਬੇਕਾਰ ਲੋਕ ਹਨ, ਜਿਸ ਕਾਰਨ ਇਹ ਫੈਸਲਾ ਹੋਰ ਵੀ ਸੰਵੇਦਨਸ਼ੀਲ ਬਣ ਜਾਂਦਾ ਹੈ।