ਨਿਊਜ਼ੀਲੈਂਡ ਦੇ ਕੈਟਾਇਆ (Kaitāia ) ਸ਼ਹਿਰ ਵਿੱਚ ਭਾਰੀ ਮੀਂਹ ਕਾਰਨ ਹੜ੍ਹ ਵਰਗੀ ਸਥਿਤੀ ਬਣ ਗਈ, ਜਿਸ ਨਾਲ ਲਗਭਗ 500 ਲੋਕਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ। ਹਾਲਾਂਕਿ ਹਾਲਾਤ ਕੁਝ ਹੱਦ ਤੱਕ ਸਧਾਰਨ ਹੋਣ ‘ਤੇ ਹੁਣ ਲੋਕ ਵਾਪਸ ਆਪਣੇ ਘਰਾਂ ਵੱਲ ਮੁੜ ਰਹੇ ਹਨ। ਰਿਪੋਰਟਾਂ ਮੁਤਾਬਕ ਸਿਰਫ਼ 24 ਘੰਟਿਆਂ ਵਿੱਚ ਹੀ ਲਗਭਗ ਦੋ ਮਹੀਨਿਆਂ ਦੇ ਬਰਾਬਰ ਮੀਂਹ ਪੈ ਗਿਆ, ਜਿਸ ਕਾਰਨ ਦਰਿਆ ਓਵਰਫਲੋ ਹੋ ਗਏ ਅਤੇ ਪਾਣੀ ਘਰਾਂ ਅਤੇ ਸੜਕਾਂ ਵਿੱਚ ਦਾਖਲ ਹੋ ਗਿਆ। ਇਸ ਕਾਰਨ Far North District ਅਤੇ Whangārei District ਵਿੱਚ ਐਮਰਜੈਂਸੀ ਦਾ ਐਲਾਨ ਕਰਨਾ ਪਿਆ।
ਪੁਲਿਸ ਦੇ ਅਨੁਸਾਰ Kaitāia ਦੇ ਕਈ ਇਲਾਕਿਆਂ ਜਿਵੇਂ ਡੋਨਾਲਡ ਰੋਡ, ਨਾਰਥ ਪਾਰਕ ਡਰਾਈਵ, ਡੇਵਿਸ ਸਟਰੀਟ ਅਤੇ ਮੈਟਿਲਡਾ ਪਲੇਸ ਤੋਂ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਸ਼ਿਫਟ ਕੀਤਾ ਗਿਆ। ਇਹ ਇਲਾਕੇ ਆਵਾਨੁਈ ਅਤੇ ਪੈਰਾਤਾਹੀ ਦਰਿਆਵਾਂ ਦੇ ਨੇੜੇ ਹੋਣ ਕਾਰਨ ਸਭ ਤੋਂ ਵੱਧ ਪ੍ਰਭਾਵਿਤ ਰਹੇ। ਇੱਕ ਪ੍ਰਭਾਵਿਤ ਨਿਵਾਸੀ ਮਾਰਗਰੈਟ ਟੋਲੋਡੇ ਨੇ ਦੱਸਿਆ ਕਿ ਸ਼ੁਰੂ ਵਿੱਚ ਉਨ੍ਹਾਂ ਨੂੰ ਹਾਲਾਤ ਦੀ ਗੰਭੀਰਤਾ ਦਾ ਅਹਿਸਾਸ ਨਹੀਂ ਸੀ, ਪਰ ਜਦੋਂ ਪਾਣੀ ਘਰ ਦੇ ਬਾਹਰ ਤੇਜ਼ੀ ਨਾਲ ਵਧਿਆ ਤਾਂ ਉਹ ਡਰ ਗਏ। ਫਾਇਰ ਬ੍ਰਿਗੇਡ ਨੇ ਉਨ੍ਹਾਂ ਨੂੰ ਖਾਸ ਵਾਹਨ ਰਾਹੀਂ ਬਚਾਇਆ।
ਇਸ ਦੌਰਾਨ ਰਾਹਤ ਟੀਮਾਂ—ਜਿਨ੍ਹਾਂ ਵਿੱਚ Fire and Emergency New Zealand, ਅਰਬਨ ਸਰਚ ਐਂਡ ਰੈਸਕਿਊ ਅਤੇ ਕੌਂਸਲ ਦੇ ਕਰਮਚਾਰੀ ਸ਼ਾਮਲ ਹਨ—ਘਰ-ਘਰ ਜਾ ਕੇ ਲੋਕਾਂ ਦੀ ਮਦਦ ਕਰ ਰਹੇ ਹਨ। ਅਧਿਕਾਰੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਹਾਲੇ ਵੀ ਖਤਰਾ ਟਲਿਆ ਨਹੀਂ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਮੀਂਹ ਪੈ ਸਕਦਾ ਹੈ। ਲੋਕਾਂ ਨੂੰ ਸਾਵਧਾਨ ਰਹਿਣ, ਤਾਜ਼ਾ ਜਾਣਕਾਰੀ ਲੈਣ ਅਤੇ ਇੱਕ-ਦੂਜੇ ਦੀ ਮਦਦ ਕਰਨ ਦੀ ਅਪੀਲ ਕੀਤੀ ਗਈ ਹੈ।