ਵੈਲਿੰਗਟਨ ਅਤੇ ਤਰਾਨਾਕੀ ਵਾਸੀਆਂ ਦੇ ਨਾਲ ਜੁੜੀ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਵੈਲਿੰਗਟਨ ਅਤੇ ਤਰਾਨਾਕੀ ਵਿੱਚ ਲਗਭਗ 13,000 ਮਰੀਜ਼ਾਂ ਨੂੰ ਸ਼ੂਗਰ ਟੈਸਟ ਸਬੰਧੀ ਗਲਤ ਲੈਬ ਨਤੀਜੇ ਪ੍ਰਾਪਤ ਹੋਣ ਤੋਂ ਬਾਅਦ ਅਵਾਨੂਈ ਲੈਬ ਦੁਆਰਾ ਸੰਪਰਕ ਕੀਤਾ ਗਿਆ ਹੈ। ਇਸ ਸਬੰਧੀ ਅਵਾਨੂਈ ਲੈਬਜ਼ ਵੱਲੋਂ ਮਾਫੀ ਵੀ ਮੰਗੀ ਗਈ ਹੈ। ਨਿਊਜ਼ੀਲੈਂਡ ਦੀ ਸਭ ਤੋਂ ਵੱਡੀ ਨਿੱਜੀ ਮੈਡੀਕਲ ਟੈਸਟਿੰਗ ਕੰਪਨੀ ਨੇ ਮੰਨਿਆਂ ਹੈ ਕਿ ਮਾਰਚ 31 ਤੋਂ ਜੁਲਾਈ 11, 2025 ਤੱਕ HbA1c (ਬਲੱਡ ਸ਼ੂਗਰ) ਟੈਸਟਾਂ ਵਿੱਚ ਉਚਿਤ ਨਤੀਜੇ ਨਾ ਆਉਣ ਕਾਰਨ ਕੁਝ ਮਰੀਜ਼ਾਂ ਨੂੰ ਗਲਤ ਤੌਰ ‘ਤੇ ਡਾਇਬੀਟੀਜ਼ ਜਾਂ ਪ੍ਰੀ-ਡਾਇਬੀਟੀਜ਼ ਦਾ ਡਾਇਗਨੋਸਿਸ ਮਿਲਿਆ। ਇਸ ਗਲਤੀ ਕਾਰਨ ਕਈ ਮਰੀਜ਼ਾਂ ਨੂੰ ਜਰੂਰਤ ਤੋਂ ਵੱਧ ਦਵਾਈਆਂ ਲੈਣੀਆਂ ਪਈਆਂ।
ਕੰਪਨੀ ਨੇ 12 ਜੁਲਾਈ ਨੂੰ ਸਮੱਸਿਆ ਨੂੰ ਠੀਕ ਕੀਤਾ ਸੀ। ਅਗਸਤ ਦੇ ਅਖੀਰ ਵਿੱਚ ਮਰੀਜ਼ਾਂ ਨਾਲ ਸੰਪਰਕ ਕੀਤਾ ਗਿਆ ਸੀ। ਕੰਪਨੀ ਨੇ ਕਿਹਾ ਕਿ ਜਿਆਦਾਤਰ ਮਾਮਲਿਆਂ ਵਿੱਚ ਨਤੀਜਿਆਂ ਵਿੱਚ ਵੱਡਾ ਫਰਕ ਨਹੀਂ ਸੀ ਅਤੇ ਮੁੜ ਟੈਸਟ ਮੁਫ਼ਤ ਕਰਵਾਉਣ ਦੀ ਸਹੂਲਤ ਦਿੱਤੀ ਜਾ ਰਹੀ ਹੈ। ਮੁੱਖ ਸੰਚਾਲਨ ਅਧਿਕਾਰੀ ਨਿੱਕ ਚੈਂਪਨੇਸ ਨੇ ਕਿਹਾ ਕਿ ਅਸੀਂ ਇਸ ਗਲਤੀ ਲਈ ਮੁਆਫੀ ਮੰਗਦੇ ਹਾਂ ਅਤੇ Health NZ ਅਤੇ ਹੋਰ ਸਿਹਤ ਸੰਸਥਾਵਾਂ ਨਾਲ ਮਿਲਕੇ ਯਕੀਨੀ ਬਣਾਉਣ ਵਿੱਚ ਲੱਗੇ ਹਾਂ ਕਿ ਪ੍ਰਭਾਵਿਤ ਮਰੀਜ਼ਾਂ ਨੂੰ ਸਹੀ ਨਤੀਜੇ ਅਤੇ ਜ਼ਰੂਰੀ ਫਾਲੋਅਪ ਮੁਹੱਈਆ ਕਰਵਾਏ ਜਾਣ। ਮਾਹਿਰਾਂ ਨੇ ਮਰੀਜ਼ਾਂ ਨੂੰ ਆਪਣੇ ਡਾਕਟਰ ਨਾਲ ਸੰਪਰਕ ਕਰਕੇ ਦੁਬਾਰਾ ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਹੈ। ਹਾਲਾਂਕਿ ਜਿਨ੍ਹਾਂ ਮਰੀਜ਼ਾਂ ਨੂੰ ਪੱਤਰ ਨਹੀਂ ਮਿਲਿਆ, ਉਨ੍ਹਾਂ ਨੂੰ ਦੁਬਾਰਾ ਟੈਸਟ ਕਰਵਾਉਣ ਦੀ ਲੋੜ ਨਹੀਂ ਹੋਵੇਗੀ। ਵਧੇਰੇ ਜਾਣਕਾਰੀ ਅਤੇ ਸੰਪਰਕ ਨੰਬਰ ਲਈ ਅਵਾਨੁਈ ਲੈਬਜ਼ ਦੀ ਵੈੱਬਸਾਈਟ ਚੈੱਕ ਕਰ ਸਕਦੇ ਹੋ।