ਭਾਰਤ ਦੀ ਸੀਨੀਅਰ ਪੁਰਸ਼ ਫੁੱਟਬਾਲ ਟੀਮ ਇਸ ਸਾਲ ਨਵੰਬਰ ਵਿੱਚ ਪਹਿਲੀ ਵਾਰ ਨਿਊਜ਼ੀਲੈਂਡ ਦਾ ਦੌਰਾ ਕਰੇਗੀ। ਇਸ ਇਤਿਹਾਸਕ ਦੌਰੇ ਦੌਰਾਨ ਭਾਰਤੀ ਟੀਮ ਨਿਊਜ਼ੀਲੈਂਡ ਦੀ ਰਾਸ਼ਟਰੀ ਟੀਮ ‘ਆਲ ਵਾਈਟਸ’ ਖ਼ਿਲਾਫ਼ ਦੋ ਅੰਤਰਰਾਸ਼ਟਰੀ ਦੋਸਤਾਨਾ ਮੁਕਾਬਲੇ ਖੇਡੇਗੀ। ਇਹ ਮੈਚ ਫੀਫਾ ਦੀ ਨਵੰਬਰ ਅੰਤਰਰਾਸ਼ਟਰੀ ਵਿੰਡੋ ਤਹਿਤ ਕਰਵਾਏ ਜਾਣਗੇ। ਪਹਿਲਾ ਮੁਕਾਬਲਾ 12 ਨਵੰਬਰ ਨੂੰ ਆਕਲੈਂਡ ਦੇ ਗੋ ਮੀਡੀਆ ਸਟੇਡੀਅਮ ਵਿੱਚ ਹੋਵੇਗਾ, ਜਦਕਿ ਦੂਜਾ ਮੈਚ 15 ਨਵੰਬਰ ਨੂੰ ਕ੍ਰਾਇਸਟਚਰਚ ਦੇ ਨਵੇਂ ਵਨ ਨਿਊਜ਼ੀਲੈਂਡ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ। ਕ੍ਰਾਇਸਟਚਰਚ ਦਾ ਇਹ ਮੈਚ ਖਾਸ ਮਹੱਤਵ ਰੱਖਦਾ ਹੈ ਕਿਉਂਕਿ ਇਹ ਨਵੇਂ ਸਟੇਡੀਅਮ ਵਿੱਚ ਹੋਣ ਵਾਲਾ ਪਹਿਲਾ ਅਧਿਕਾਰਕ ਫੁੱਟਬਾਲ ਮੁਕਾਬਲਾ ਹੋਵੇਗਾ।
ਇਸ ਦੋ ਮੈਚਾਂ ਦੀ ਲੜੀ ਦਾ ਐਲਾਨ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਨਿਊਜ਼ੀਲੈਂਡ ਦੌਰੇ ਦੌਰਾਨ ਕੀਤਾ ਗਿਆ। ਇਹ ਮੁਕਾਬਲੇ “ਇੰਡੀਆ-ਨਿਊਜ਼ੀਲੈਂਡ: 100 ਯੀਅਰਜ਼ ਆਫ ਯੂਨਿਟੀ ਥਰੂ ਸਪੋਰਟ” ਪ੍ਰੋਗਰਾਮ ਤਹਿਤ ਕਰਵਾਏ ਜਾਣਗੇ, ਜਿਸ ਨੂੰ ਨਿਊਜ਼ੀਲੈਂਡ ਸਰਕਾਰ ਆਪਣੇ ਈਵੈਂਟਸ ਬੂਸਟ ਫੰਡ ਰਾਹੀਂ ਸਹਿਯੋਗ ਦੇ ਰਹੀ ਹੈ।
ਭਾਰਤੀ ਫੁੱਟਬਾਲ ਫੈਡਰੇਸ਼ਨ ਮੁਤਾਬਕ ਇਹ ਪਹਿਲਾ ਮੌਕਾ ਹੋਵੇਗਾ ਜਦੋਂ ਭਾਰਤ ਦੀ ਸੀਨੀਅਰ ਪੁਰਸ਼ ਟੀਮ ਨਿਊਜ਼ੀਲੈਂਡ ਵਿੱਚ ਕੋਈ ਅੰਤਰਰਾਸ਼ਟਰੀ ਮੈਚ ਖੇਡੇਗੀ। ਇਸ ਦੇ ਨਾਲ ਹੀ 2005 ਵਿੱਚ ਫਿਜੀ ਦੌਰੇ ਤੋਂ ਬਾਅਦ ਭਾਰਤੀ ਟੀਮ ਪਹਿਲੀ ਵਾਰ ਓਸ਼ੀਨੀਆ ਫੁੱਟਬਾਲ ਕਨਫੈਡਰੇਸ਼ਨ ਦੇ ਕਿਸੇ ਮੈਂਬਰ ਦੇਸ਼ ਵਿੱਚ ਖੇਡਣ ਉਤਰੇਗੀ।
ਨਿਊਜ਼ੀਲੈਂਡ ਦੇ ਮੁੱਖ ਕੋਚ ਡੈਰਨ ਬੇਜ਼ਲੀ ਨੇ ਕਿਹਾ ਕਿ ਵਿਸ਼ਵ ਕੱਪ ਮੁਹਿੰਮ ਤੋਂ ਬਾਅਦ ਆਪਣੇ ਘਰੇਲੂ ਦਰਸ਼ਕਾਂ ਸਾਹਮਣੇ ਸਾਲ ਦੇ ਆਖ਼ਰੀ ਅੰਤਰਰਾਸ਼ਟਰੀ ਮੈਚ ਖੇਡਣਾ ਟੀਮ ਲਈ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਪ੍ਰਸ਼ੰਸਕਾਂ ਦਾ ਸਮਰਥਨ ਖਿਡਾਰੀਆਂ ਲਈ ਹਮੇਸ਼ਾ ਪ੍ਰੇਰਣਾ ਦਾ ਸਰੋਤ ਰਿਹਾ ਹੈ।
ਉੱਥੇ ਹੀ ਭਾਰਤ ਦੇ ਮੁੱਖ ਕੋਚ ਖਾਲਿਦ ਜਮੀਲ ਨੇ ਕਿਹਾ ਕਿ ਵਿਸ਼ਵ ਕੱਪ ਖੇਡ ਚੁੱਕੀ ਨਿਊਜ਼ੀਲੈਂਡ ਟੀਮ ਦੇ ਘਰੇਲੂ ਮੈਦਾਨ ‘ਤੇ ਮੁਕਾਬਲਾ ਕਰਨਾ ਭਾਰਤੀ ਖਿਡਾਰੀਆਂ ਲਈ ਵੱਡੀ ਚੁਣੌਤੀ ਹੋਵੇਗੀ, ਪਰ ਇਸ ਨਾਲ ਟੀਮ ਨੂੰ ਅੰਤਰਰਾਸ਼ਟਰੀ ਪੱਧਰ ਦਾ ਕੀਮਤੀ ਤਜਰਬਾ ਵੀ ਮਿਲੇਗਾ।
ਇਨ੍ਹਾਂ ਮੈਚਾਂ ਦਾ ਇੱਕ ਹੋਰ ਵੱਡਾ ਆਕਰਸ਼ਣ ਨਿਊਜ਼ੀਲੈਂਡ ਦੇ ਸਿੱਖ ਮੂਲ ਦੇ ਸਟਾਰ ਮਿਡਫੀਲਡਰ ਸਰਪ੍ਰੀਤ ਸਿੰਘ ਹੋਣਗੇ। ਪੰਜਾਬੀ ਸਿੱਖ ਪਰਿਵਾਰ ਨਾਲ ਸਬੰਧਤ ਸਰਪ੍ਰੀਤ ਸਿੰਘ ਨੇ 2026 ਫੀਫਾ ਵਿਸ਼ਵ ਕੱਪ ਵਿੱਚ ਖੇਡ ਕੇ ਇਤਿਹਾਸ ਰਚਿਆ ਸੀ। ਉਹ ਵਿਸ਼ਵ ਕੱਪ ਵਿੱਚ ਖੇਡਣ ਵਾਲੇ ਪਹਿਲੇ ਸਿੱਖ ਫੁੱਟਬਾਲਰ ਬਣੇ ਅਤੇ ਭਾਰਤੀ ਤੇ ਪੰਜਾਬੀ ਭਾਈਚਾਰੇ ਲਈ ਮਾਣ ਦਾ ਪ੍ਰਤੀਕ ਹਨ। ਇਸ ਕਾਰਨ ਆਕਲੈਂਡ ਅਤੇ ਕ੍ਰਾਇਸਟਚਰਚ ਵਿੱਚ ਰਹਿੰਦੇ ਭਾਰਤੀ ਅਤੇ ਪੰਜਾਬੀ ਭਾਈਚਾਰੇ ਵਿੱਚ ਇਸ ਸੀਰੀਜ਼ ਨੂੰ ਲੈ ਕੇ ਖਾਸ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ।