ਰਾਜਸਥਾਨ ਰੌਇਲਜ਼ ਅਤੇ ਗੁਜਰਾਤ ਟਾਈਟਨਜ਼ ਵਿਚਾਲੇ ਖੇਡੇ ਜਾ ਰਹੇ ਕਵਾਲੀਫਾਇਰ-2 ਮੈਚ ‘ਤੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਮੈਚ ਸ਼ੁਰੂ ਹੋਣ ਤੋਂ ਪਹਿਲਾਂ ਟੌਸ ਦੋ ਵਾਰ ਹੋਣ ਕਾਰਨ ਸੋਸ਼ਲ ਮੀਡੀਆ ‘ਤੇ ਫਿਕਸਿੰਗ ਦੇ ਦੋਸ਼ਾਂ ਦੀ ਚਰਚਾ ਤੇਜ਼ ਹੋ ਗਈ। ਕਈ ਲੋਕਾਂ ਨੇ ਇਸਨੂੰ ਵੱਡੀ ਗਲਤੀ ਕਰਾਰ ਦਿੱਤਾ, ਜਦਕਿ ਕੁਝ ਫੈਨਜ਼ ਨੇ ਸਵਾਲ ਉਠਾਏ ਕਿ ਕੀ ਮੈਚ ਵਿੱਚ ਕੋਈ ਫਿਕਸਿੰਗ ਹੋਈ ਹੈ।
ਦਰਅਸਲ ਪਹਿਲੇ ਟੌਸ ਦੌਰਾਨ ਗੁਜਰਾਤ ਟਾਈਟਨਜ਼ ਦੇ ਕਪਤਾਨ ਸ਼ੁਭਮਨ ਗਿੱਲ ਨੇ ਸਿੱਕਾ ਉਛਾਲਿਆ ਅਤੇ ਰਾਜਸਥਾਨ ਦੇ ਕਪਤਾਨ ਰਿਆਨ ਪਰਾਗ ਨੇ “ਹੈਡਸ” ਕਾਲ ਕੀਤਾ। ਸਿੱਕਾ “ਟੇਲਸ” ‘ਤੇ ਆਇਆ, ਜਿਸ ਮੁਤਾਬਕ GT ਟੌਸ ਜਿੱਤ ਚੁੱਕੀ ਸੀ। ਪਰ ਮੈਚ ਰੈਫਰੀ ਪ੍ਰਕਾਸ਼ ਭੱਟ ਨੇ ਕਿਹਾ ਕਿ ਉਹ ਰਿਆਨ ਪਰਾਗ ਦੀ ਕਾਲ ਸਪੱਸ਼ਟ ਤੌਰ ‘ਤੇ ਨਹੀਂ ਸੁਣ ਸਕੇ, ਇਸ ਲਈ ਟੌਸ ਦੁਬਾਰਾ ਕਰਵਾਇਆ ਗਿਆ।
ਦੂਜੀ ਵਾਰ ਫਿਰ ਸ਼ੁਭਮਨ ਗਿੱਲ ਨੇ ਸਿੱਕਾ ਉਛਾਲਿਆ ਅਤੇ ਰਿਆਨ ਪਰਾਗ ਨੇ “ਹੈਡਸ” ਕਾਲ ਕੀਤਾ। ਇਸ ਵਾਰ ਸਿੱਕਾ “ਹੈਡਸ” ‘ਤੇ ਆਇਆ ਅਤੇ ਰਾਜਸਥਾਨ ਰੌਇਲਜ਼ ਨੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ।
ਜਦੋਂ ਟੌਸ ਤੋਂ ਬਾਅਦ ਪ੍ਰੇਜ਼ੇਂਟਰ ਰਵੀ ਸ਼ਾਸਤਰੀ ਨੇ ਸ਼ੁਭਮਨ ਗਿੱਲ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੇ ਚਿਹਰੇ ‘ਤੇ ਨਿਰਾਸ਼ਾ ਸਾਫ਼ ਦਿਖਾਈ ਦਿੱਤੀ। ਫੈਨਜ਼ ਦਾ ਕਹਿਣਾ ਸੀ ਕਿ ਪਹਿਲਾ ਟੌਸ GT ਦੇ ਹੱਕ ‘ਚ ਗਿਆ ਸੀ ਅਤੇ ਦੂਜਾ ਟੌਸ ਕਰਵਾਉਣ ਨਾਲ ਵਿਵਾਦ ਪੈਦਾ ਹੋ ਗਿਆ।