ਨਿਊਜ਼ੀਲੈਂਡ ਦੀ ਸਾਬਕਾ ਪ੍ਰਧਾਨ ਮੰਤਰੀ ਡੇਮ ਜੈਸਿੰਡਾ ਆਰਡਰਨ ਦਾ ਆਕਲੈਂਡ ਦੇ ਸੈਂਡਰਿੰਗਹਾਮ ਇਲਾਕੇ ਵਿੱਚ ਸਥਿਤ ਘਰ ਸੋਮਵਾਰ ਸ਼ਾਮ ਇੱਕ ਬੰਦ ਨੀਲਾਮੀ (Closed Auction) ਦੌਰਾਨ ਵਿਕ ਗਿਆ। 1930 ਦੇ ਦਹਾਕੇ ਵਿੱਚ ਬਣਿਆ ਇਹ ਰਵਾਇਤੀ ਵੇਦਰਬੋਰਡ ਬੰਗਲਾ ਸ਼ਾਮ 6 ਵਜੇ ਨੀਲਾਮੀ ਲਈ ਪੇਸ਼ ਕੀਤਾ ਗਿਆ। ਹਾਲਾਂਕਿ ਘਰ ਕਿਸ ਕੀਮਤ ‘ਤੇ ਵਿਕਿਆ, ਇਸ ਬਾਰੇ ਕੋਈ ਅਧਿਕਾਰਕ ਜਾਣਕਾਰੀ ਸਾਹਮਣੇ ਨਹੀਂ ਆਈ। ਰੀਅਲ ਐਸਟੇਟ ਵੈਬਸਾਈਟ realestate.co.nz ਮੁਤਾਬਿਕ, ਇਸ ਘਰ ਦੀ ਅਨੁਮਾਨਿਤ ਕੀਮਤ 21.2 ਲੱਖ ਤੋਂ 24.6 ਲੱਖ ਨਿਊਜ਼ੀਲੈਂਡ ਡਾਲਰ ਦੇ ਵਿਚਕਾਰ ਸੀ। ਜਦਕਿ ਸੈਂਡਰਿੰਗਹਾਮ ਇਲਾਕੇ ਵਿੱਚ ਹੋਰ ਘਰਾਂ ਦੀ ਔਸਤ ਵਿਕਰੀ ਕੀਮਤ 14.5 ਲੱਖ ਨਿਊਜ਼ੀਲੈਂਡ ਡਾਲਰ ਦਰਜ ਕੀਤੀ ਗਈ ਹੈ।
ਚਾਰ ਬੈੱਡਰੂਮ ਅਤੇ ਦੋ ਬਾਥਰੂਮ ਵਾਲੇ ਇਸ ਘਰ ਨੂੰ ਲਿਸਟਿੰਗ ਵਿੱਚ “ਪਰਿਵਾਰ ਲਈ ਆਦਰਸ਼ ਸਥਾਈ ਨਿਵਾਸ” ਵਜੋਂ ਦਰਸਾਇਆ ਗਿਆ ਸੀ। ਲਿਸਟਿੰਗ ਵਿੱਚ ਕਿਹਾ ਗਿਆ ਕਿ ਘਰ ਦੇ ਰਵਾਇਤੀ ਡਿਜ਼ਾਇਨ ਨੂੰ ਆਧੁਨਿਕ ਐਕਸਟੈਂਸ਼ਨ ਨਾਲ ਖੂਬਸੂਰਤੀ ਨਾਲ ਜੋੜਿਆ ਗਿਆ ਹੈ। ਉੱਚੀਆਂ ਛੱਤਾਂ, ਵੱਡੀਆਂ ਖਿੜਕੀਆਂ ਅਤੇ ਹਰਿਆਭਰਾ ਬਾਗ ਇਸ ਨੂੰ ਹੋਰ ਵੀ ਆਕਰਸ਼ਕ ਬਣਾਉਂਦੇ ਹਨ। ਇਹ ਘਰ ਸ਼ਾਂਤ ਮਾਹੌਲ, ਸੁਰੱਖਿਆ ਅਤੇ ਨੇੜਲੇ ਬਾਲਮੋਰਲ ਸਕੂਲ ਕਾਰਨ ਪਰਿਵਾਰਾਂ ਲਈ ਬਹੁਤ ਹੀ ਉਚਿਤ ਮੰਨਿਆ ਜਾਂਦਾ ਹੈ।
ਫੇਸਬੁੱਕ ‘ਤੇ ਦਿੱਤੀ ਗਈ ਲਿਸਟਿੰਗ ਵਿੱਚ ਘਰ ਦੇ ਸਾਬਕਾ ਮਾਲਕਾਂ ਵੱਲ ਇਸ਼ਾਰਾ ਕਰਦਿਆਂ ਲਿਖਿਆ ਗਿਆ ਸੀ, “ਸਾਬਕਾ ਪ੍ਰਧਾਨ ਮੰਤਰੀ ਦੇ ਸੈਂਡਰਿੰਗਹਾਮ ਸਥਿਤ ਘਰ ਵਿੱਚ ਤੁਹਾਡਾ ਸੁਆਗਤ ਹੈ।”
ਡੇਮ ਜੈਸਿੰਡਾ ਆਰਡਰਨ ਅਤੇ ਉਨ੍ਹਾਂ ਦੇ ਜੀਵਨ ਸਾਥੀ ਕਲਾਰਕ ਗੇਫੋਰਡ ਨੇ ਇਹ ਘਰ ਸਾਲ 2018 ਦੀ ਸ਼ੁਰੂਆਤ ਵਿੱਚ 17.4 ਲੱਖ ਨਿਊਜ਼ੀਲੈਂਡ ਡਾਲਰ ਵਿੱਚ ਖਰੀਦਿਆ ਸੀ। ਇਹ ਖਰੀਦ ਉਸ ਸਮੇਂ ਹੋਈ ਜਦੋਂ ਜੈਸਿੰਡਾ ਆਰਡਰਨ ਅਕਤੂਬਰ 2017 ਵਿੱਚ ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਬਣੇ ਸਨ। ਇਸੇ ਸਾਲ ਜੂਨ ਵਿੱਚ ਦੋਵਾਂ ਦੀ ਧੀ ਨੇਵ ਤੇ ਅਰੋਹਾ ਦਾ ਜਨਮ ਹੋਇਆ।
ਸਾਲ 2023 ਵਿੱਚ ਪ੍ਰਧਾਨ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫਾ ਦੇਣ ਤੋਂ ਬਾਅਦ ਜੈਸਿੰਡਾ ਆਰਡਰਨ ਆਪਣੇ ਪਰਿਵਾਰ ਸਮੇਤ ਕੁਝ ਸਮਾਂ ਅਮਰੀਕਾ ਵਿੱਚ ਰਹੇ, ਜਿੱਥੇ ਉਨ੍ਹਾਂ ਨੇ ਹਾਰਵਰਡ ਯੂਨੀਵਰਸਿਟੀ ਵਿੱਚ ਫੈਲੋਸ਼ਿਪ ਕੀਤੀ।
ਇਸ ਸਾਲ ਉਹ ਆਪਣੇ ਪਰਿਵਾਰ ਨਾਲ ਸਿਡਨੀ, ਆਸਟ੍ਰੇਲੀਆ ਵਿੱਚ ਜਾ ਬਸੇ ਹਨ। ਹਾਲ ਹੀ ਵਿੱਚ ਆਸਟ੍ਰੇਲੀਆ ਦੇ ‘ਟੁਡੇ’ ਟੀਵੀ ਸ਼ੋਅ ਵਿੱਚ ਗੱਲਬਾਤ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਆਸਟ੍ਰੇਲੀਆ ਰਹਿਣ ਲਈ ਇੱਕ ਸ਼ਾਨਦਾਰ ਥਾਂ ਹੈ। ਉਨ੍ਹਾਂ ਨੇ ਕਿਹਾ, “ਕੀਵੀ ਅਤੇ ਆਸਟ੍ਰੇਲੀਆਈ ਲੋਕਾਂ ਵਿੱਚ ਕਾਫ਼ੀ ਸਮਾਨਤਾਵਾਂ ਹਨ, ਇਸ ਲਈ ਇੱਥੇ ਰਹਿ ਕੇ ਘਰ ਵਰਗਾ ਅਹਿਸਾਸ ਹੁੰਦਾ ਹੈ।”