ਨਿਊਜ਼ੀਲੈਂਡ ਸਰਕਾਰ ਦੇਸ਼ ਦੀ ਬਾਇਓਸਿਕਿਉਰਿਟੀ ਪ੍ਰਣਾਲੀ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਣ ਲਈ ਅੰਤਰਰਾਸ਼ਟਰੀ ਹਵਾਈ ਅੱਡਿਆਂ ‘ਤੇ ਨਵੀਂ ਤਕਨਾਲੋਜੀ ਵਾਲੇ ਸਕੈਨਰ ਲਗਾਉਣ ਦੀ ਤਿਆਰੀ ਕਰ ਰਹੀ ਹੈ। ਇਸ ਯੋਜਨਾ ਤਹਿਤ ਘੱਟੋ-ਘੱਟ 19 ਪੁਰਾਣੀਆਂ ਬੈਗੇਜ ਐਕਸ-ਰੇ ਮਸ਼ੀਨਾਂ ਦੀ ਥਾਂ ਅਤਿ-ਆਧੁਨਿਕ ਸਕੈਨਿੰਗ ਸਿਸਟਮ ਲਗਾਏ ਜਾਣਗੇ, ਜੋ ਯਾਤਰੀਆਂ ਦੇ ਸਮਾਨ ਦੀ ਪਹਿਲਾਂ ਨਾਲੋਂ ਹੋਰ ਸਟੀਕ ਅਤੇ ਤੇਜ਼ ਜਾਂਚ ਕਰਨ ਦੇ ਸਮਰੱਥ ਹੋਣਗੇ।
ਇਹ ਨਵੇਂ ਸਕੈਨਰ ਆਕਲੈਂਡ, ਕ੍ਰਾਈਸਟਚਰਚ, ਵੈਲਿੰਗਟਨ, ਕਵੀਨਸਟਾਊਨ, ਡੁਨੇਡਿਨ ਅਤੇ ਹੈਮਿਲਟਨ ਦੇ ਅੰਤਰਰਾਸ਼ਟਰੀ ਹਵਾਈ ਅੱਡਿਆਂ ‘ਤੇ ਲਗਾਏ ਜਾਣਗੇ। Biosecurity New Zealand ਇਨ੍ਹਾਂ ਦੀ ਮਦਦ ਨਾਲ ਵਿਦੇਸ਼ਾਂ ਤੋਂ ਆਉਣ ਵਾਲੇ ਖਾਣ-ਪੀਣ ਦੇ ਸਮਾਨ, ਪੌਦਿਆਂ, ਜਾਨਵਰਾਂ ਨਾਲ ਸੰਬੰਧਿਤ ਉਤਪਾਦਾਂ ਅਤੇ ਹੋਰ ਅਜਿਹੀਆਂ ਵਸਤਾਂ ਦੀ ਪਛਾਣ ਕਰੇਗਾ, ਜੋ ਨਿਊਜ਼ੀਲੈਂਡ ਲਈ ਕੀੜਿਆਂ ਜਾਂ ਬਿਮਾਰੀਆਂ ਦਾ ਖ਼ਤਰਾ ਬਣ ਸਕਦੀਆਂ ਹਨ।
ਬਾਇਓਸਿਕਿਉਰਿਟੀ ਇੰਟੈਲੀਜੈਂਸ ਐਂਡ ਰਿਸਪਾਂਸ ਦੇ ਕਮਿਸ਼ਨਰ ਐਂਡਰਿਊ ਸਪੈਲਮੈਨ ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਯਾਤਰੀਆਂ ਦੀ ਲਗਾਤਾਰ ਵੱਧ ਰਹੀ ਗਿਣਤੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਸਰਹੱਦੀ ਸੁਰੱਖਿਆ ਪ੍ਰਣਾਲੀ ਨੂੰ ਆਧੁਨਿਕ ਬਣਾਉਣਾ ਸਮੇਂ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਨਵੀਂ ਤਕਨਾਲੋਜੀ ਨਾਲ ਸੰਭਾਵਿਤ ਜੈਵਿਕ ਖ਼ਤਰਿਆਂ ਦੀ ਪਛਾਣ ਹੋਰ ਤੇਜ਼ੀ ਅਤੇ ਸ਼ੁੱਧਤਾ ਨਾਲ ਕੀਤੀ ਜਾ ਸਕੇਗੀ।
ਸਰਕਾਰ ਵੱਲੋਂ ਇਸ ਪ੍ਰੋਜੈਕਟ ਲਈ ਸਪਲਾਇਰਾਂ ਤੋਂ ਪ੍ਰਸਤਾਵ ਮੰਗੇ ਜਾ ਰਹੇ ਹਨ। ਜੇਕਰ ਯੋਜਨਾ ਮੁਤਾਬਿਕ ਕੰਮ ਅੱਗੇ ਵਧਿਆ ਤਾਂ ਨਵੇਂ ਸਕੈਨਰਾਂ ਦੀ ਸਥਾਪਨਾ 2027 ਦੇ ਮੱਧ ਤੋਂ ਸਾਲ ਦੇ ਅੰਤ ਤੱਕ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਹਾਲਾਂਕਿ, ਇਸ ਪੂਰੇ ਪ੍ਰੋਜੈਕਟ ‘ਤੇ ਹੋਣ ਵਾਲੇ ਖ਼ਰਚੇ ਬਾਰੇ ਅਜੇ ਕੋਈ ਅਧਿਕਾਰਕ ਜਾਣਕਾਰੀ ਜਾਰੀ ਨਹੀਂ ਕੀਤੀ ਗਈ ਹੈ।