ਸੈਂਟਰਲ ਆਕਲੈਂਡ ਦੇ ਵੈਸਟਮੀਅਰ (Westmere) ਅਤੇ ਗਰੇ ਲਿਨ (Grey Lynn) ਸਮੇਤ ਕਈ ਇਲਾਕਿਆਂ ਵਿੱਚ ਅੱਜ ਸਵੇਰੇ ਤੋਂ ਇੰਟਰਨੈੱਟ ਸੇਵਾ ਪ੍ਰਭਾਵਿਤ ਹੋਣ ਕਾਰਨ ਹਜ਼ਾਰਾਂ ਲੋਕਾਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਨੈੱਟਵਰਕ ਪ੍ਰਦਾਤਾ Chorus ਮੁਤਾਬਿਕ ਇਹ ਖਰਾਬੀ ਸਵੇਰੇ 4:36 ਵਜੇ ਰਿਪੋਰਟ ਕੀਤੀ ਗਈ ਸੀ। ਸਵੇਰੇ 10:30 ਵਜੇ ਤੱਕ ਜਾਰੀ ਅਪਡੇਟ ਅਨੁਸਾਰ ਪ੍ਰਭਾਵਿਤ ਖੇਤਰਾਂ ਵਿੱਚ ਇੰਟਰਨੈੱਟ ਸੇਵਾ ਦੀ ਪੂਰੀ ਬਹਾਲੀ ਕੱਲ੍ਹ ਤੱਕ ਹੋਣ ਦੀ ਸੰਭਾਵਨਾ ਹੈ।
Chorus ਨੇ ਦੱਸਿਆ ਕਿ ਸਵੇਰੇ 9 ਵਜੇ ਤੋਂ ਪਹਿਲਾਂ ਹੀ ਟੈਕਨੀਸ਼ੀਅਨ ਮੌਕੇ ‘ਤੇ ਪਹੁੰਚ ਗਏ ਸਨ ਅਤੇ ਖਰਾਬੀ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਕੰਪਨੀ ਦੀ ਆਉਟੇਜ ਮੈਪ ਅਨੁਸਾਰ ਪ੍ਰਭਾਵਿਤ ਖੇਤਰ ਵੈਸਟਮੀਅਰ ਪਾਰਕ ਤੋਂ ਲੈ ਕੇ ਵੈਸਟਰਨ ਸਪ੍ਰਿੰਗਜ਼ ਤੱਕ ਫੈਲਿਆ ਹੋਇਆ ਹੈ। ਇਸ ਵਿੱਚ ਸਕੂਲਾਂ, ਰੈਸਟੋਰੈਂਟਾਂ, ਸੁਪਰਮਾਰਕੀਟਾਂ ਅਤੇ ਆਕਲੈਂਡ ਜੂ ਵਰਗੀਆਂ ਮਹੱਤਵਪੂਰਨ ਥਾਵਾਂ ਵੀ ਸ਼ਾਮਿਲ ਹਨ। ਹਰਨ ਬੇ ਖੇਤਰ ਵਿੱਚ ਸਥਿਤ ਸੇਂਟ ਪਾਲਜ਼ ਕਾਲਜ ਅਤੇ ਮਾਰਿਸਟ ਕੈਥੋਲਿਕ ਸਕੂਲ ਵੀ ਇਸ ਆਉਟੇਜ ਤੋਂ ਪ੍ਰਭਾਵਿਤ ਦੱਸੇ ਜਾ ਰਹੇ ਹਨ।
ਉੱਧਰ, ਟੈਲੀਕਮ ਕੰਪਨੀਆਂ Spark NZ ਅਤੇ One NZ ਨੇ ਵੀ ਆਪਣੀਆਂ ਵੈੱਬਸਾਈਟਾਂ ‘ਤੇ ਇਸ ਸੇਵਾ ਵਿਘਨ ਦੀ ਪੁਸ਼ਟੀ ਕਰਦਿਆਂ ਕਿਹਾ ਹੈ ਕਿ ਸਮੱਸਿਆ ਦੇ ਅਸਲ ਕਾਰਨ ਦੀ ਜਾਂਚ ਜਾਰੀ ਹੈ।