ਨਿਊਜ਼ੀਲੈਂਡ ਵਿੱਚ ਵੈਟਰਨਰੀਅਨ (ਵੈੱਟਨਰੀ ਡਾਕਟਰ) ਬਣਨ ਲਈ ਯੂਨੀਵਰਸਿਟੀ ਦੇ ਜਾਅਲੀ ਦਸਤਾਵੇਜ਼ ਦੇਣ ਵਾਲੇ ਇੱਕ ਵਿਅਕਤੀ ਨੂੰ ਦੋਸ਼ੀ ਠਹਿਰਾਇਆ ਗਿਆ ਹੈ ਅਤੇ ਜੁਰਮਾਨਾ ਲਗਾਇਆ ਗਿਆ ਹੈ। ਦਰਅਸਲ ਆਪਣੇ ਆਪ ਨੂੰ ਵੈੱਟਨਰੀ ਡਾਕਟਰ ਵੱਜੋਂ ਰਜਿਸਟਰ ਕਰਵਾਉਣ ਲਈ ਨਕਲੀ ਯੂਨੀਵਰਸਿਟੀ ਦਸਤਾਵੇਜ਼ ਪੇਸ਼ ਕਰਨ ਵਾਲੇ ਭਾਰਤੀ ਨਾਗਰਿਕ ਸਿਧਾਰਥ ਤੁਸ਼ਾਰ ਵੈਸ਼ਨਵ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਸਿਧਾਰਥ ਤੁਸ਼ਾਰ ਵੈਸ਼ਨਵ ਜੋ ਕਿ ਭਾਰਤ ਵਿੱਚ ਇੱਕ ਯੋਗਤਾ ਪ੍ਰਾਪਤ ਵੈਟਰਨ ਹੈ, ਨੇ ਫਰਵਰੀ 2024 ਵਿੱਚ ਨਿਊਜ਼ੀਲੈਂਡ ਦੀ ਵੈਟਰਨਰੀ ਕੌਂਸਲ ਵਿੱਚ ਰਜਿਸਟਰ ਹੋਣ ਲਈ ਅਰਜ਼ੀ ਦਿੱਤੀ ਸੀ। ਆਪਣੀ ਅਰਜ਼ੀ ਦੇ ਹਿੱਸੇ ਵਜੋਂ, ਉਸਨੇ ਡਾਕਟਰ ਆਫ਼ ਵੈਟਰਨਰੀ ਮੈਡੀਸਨ ਦੀ ਡਿਗਰੀ ਦੀ ਇੱਕ ਪ੍ਰਮਾਣਿਤ ਕਾਪੀ ਜਮ੍ਹਾਂ ਕਰਵਾਈ ਜੋ ਉਸਨੇ ਮੈਲਬੌਰਨ ਯੂਨੀਵਰਸਿਟੀ ਤੋਂ ਪ੍ਰਾਪਤ ਕਰਨ ਦਾ ਦਾਅਵਾ ਕੀਤਾ ਸੀ।
ਕੌਂਸਲ ਨੇ ਉਸਨੂੰ ਅਸਥਾਈ ਤੌਰ ‘ਤੇ ਰਜਿਸਟਰ ਕਰ ਲਿਆ ਸੀ, ਪਰ ਇੱਕ ਰੁਟੀਨ ਤਸਦੀਕ ਪ੍ਰਕਿਰਿਆ ਦੌਰਾਨ ਮੈਲਬੌਰਨ ਯੂਨੀਵਰਸਿਟੀ ਨੇ ਪੁਸ਼ਟੀ ਕੀਤੀ ਕਿ ਵੈਸ਼ਨਵ ਕਦੇ ਵੀ ਉੱਥੇ ਦਾਖਲ ਹੀ ਨਹੀਂ ਹੋਇਆ ਸੀ। ਇਸ ਮਗਰੋਂ ਜਦੋਂ ਉਸ ਤੋਂ ਪੁੱਛਗਿੱਛ ਕੀਤੀ ਗਈ ਤਾਂ ਉਸਨੇ ਇੱਕ ਟ੍ਰਾਂਸਕ੍ਰਿਪਟ ਪੇਸ਼ ਕੀਤੀ ਜੋ ਕਿ ਝੂਠੀ ਪਾਈ ਗਈ। ਮਾਰਚ 2024 ਵਿੱਚ ਕੰਮ ਸ਼ੁਰੂ ਕਰਨ ਸਬੰਧੀ ਕੀਤੀ ਗਈ ਉਸਦੀ ਰਜਿਸਟ੍ਰੇਸ਼ਨ ਰੱਦ ਕਰ ਦਿੱਤੀ ਗਈ ਹੈ। ਵੈਲਿੰਗਟਨ ਜ਼ਿਲ੍ਹਾ ਅਦਾਲਤ ਨੇ ਵੈਸ਼ਨਵ ਨੂੰ ਜਾਣਬੁੱਝ ਕੇ ਰਜਿਸਟ੍ਰੇਸ਼ਨ ਪ੍ਰਾਪਤ ਕਰਨ ਲਈ ਝੂਠੇ ਦਸਤਾਵੇਜ਼ਾਂ ਦੀ ਵਰਤੋਂ ਕਰਨ ਦਾ ਦੋਸ਼ੀ ਪਾਇਆ, ਜੋ ਕਿ ਵੈਟਰਨਰੀਅਨ ਐਕਟ 2005 ਦੇ ਤਹਿਤ ਇੱਕ ਅਪਰਾਧ ਹੈ। ਉਸਨੂੰ ਅਦਾਲਤ ਨੇ $7000 ਦਾ ਜੁਰਮਾਨਾ ਲਗਾਇਆ ਹੈ।
ਵੈਟ ਕੌਂਸਲ ਦੇ ਡਿਪਟੀ ਰਜਿਸਟਰਾਰ ਲੀਅਮ ਸ਼ੀਲਡਜ਼ ਨੇ ਕਿਹਾ ਕਿ ਇਹ ਨਿਊਜ਼ੀਲੈਂਡ ਵਿੱਚ ਆਪਣੀ ਕਿਸਮ ਦਾ ਪਹਿਲਾ ਮਾਮਲਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ, “ਇਹ ਸਜ਼ਾ ਝੂਠੇ ਦਸਤਾਵੇਜ਼ ਪੇਸ਼ ਕਰਨ ਦੀ ਗੰਭੀਰ ਪ੍ਰਕਿਰਤੀ ਨੂੰ ਦਰਸਾਉਂਦੀ ਹੈ। ਹੁਣ ਜਾਅਲੀ ਡਿਗਰੀਆਂ ਅਤੇ ਅਕਾਦਮਿਕ ਟ੍ਰਾਂਸਕ੍ਰਿਪਟਾਂ ਪ੍ਰਾਪਤ ਕਰਨਾ ਬਹੁਤ ਆਸਾਨ ਹੈ, ਇਸੇ ਕਰਕੇ ਸਾਡੇ ਲੋਕਾਂ ਅਤੇ ਜਾਨਵਰਾਂ ਨੂੰ ਸੁਰੱਖਿਅਤ ਰੱਖਣ ਲਈ ਤੀਜੇ ਦਰਜੇ ਦੀਆਂ ਸੰਸਥਾਵਾਂ ਨਾਲ ਨੇੜਿਓਂ ਜਾਂਚ ਜ਼ਰੂਰੀ ਹੈ।” ਵੈਸ਼ਨਵ ਨੂੰ ਇੱਥੇ ਅਭਿਆਸ ਕਰਨ ਲਈ ਯੋਗਤਾ ਪ੍ਰਾਪਤ ਕਰਨ ਲਈ ਵਾਧੂ ਅਧਿਐਨ ਕਰਨ ਜਾਂ ਆਸਟ੍ਰੇਲੀਅਨ ਵੈਟਰਨਰੀ ਪ੍ਰੀਖਿਆ (AVE) ਪਾਸ ਕਰਨ ਦੀ ਲੋੜ ਸੀ, ਕਿਉਂਕਿ ਉਸਦੀ ਭਾਰਤੀ ਯੋਗਤਾ ਇੱਥੇ ਮਾਨਤਾ ਪ੍ਰਾਪਤ ਨਹੀਂ ਸੀ।