ਨਿਊਜ਼ੀਲੈਂਡ ਕਸਟਮ ਵਿਭਾਗ ਨੇ ਗ੍ਰੀਨ ਟੀ ਦੇ ਪੈਕਟਾਂ ਦੇ ਰੂਪ ਵਿੱਚ ਲੁਕਾਈ ਗਈ 19.7 ਕਿਲੋ ਮੈਥਐਮਫੈਟਾਮੀਨ (ਮੈਥ) ਬਰਾਮਦ ਕੀਤੀ ਹੈ। ਇਸ ਮਾਮਲੇ ਵਿੱਚ 20 ਸਾਲਾ ਨਿਊਜ਼ੀਲੈਂਡ ਦੇ ਇੱਕ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਮੰਗਲਵਾਰ ਨੂੰ ਆਕਲੈਂਡ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਪਹੁੰਚਣ ਤੋਂ ਬਾਅਦ ਉਸ ਦੇ ਸਮਾਨ ਦੀ ਜਾਂਚ ਕੀਤੀ ਗਈ। ਐਕਸ-ਰੇ ਸਕੈਨ ਦੌਰਾਨ ਸੂਟਕੇਸ ਵਿੱਚ ਇੱਕ ਸ਼ੱਕੀ ਕ੍ਰਿਸਟਲ ਵਰਗਾ ਪਦਾਰਥ ਨਜ਼ਰ ਆਇਆ। ਤਲਾਸ਼ੀ ਦੌਰਾਨ ਅਧਿਕਾਰੀਆਂ ਨੂੰ 18 ਪੈਕਟ ਮਿਲੇ ਜੋ ਗ੍ਰੀਨ ਟੀ ਵਜੋਂ ਦਿਖਾਏ ਗਏ ਸਨ, ਪਰ ਜਾਂਚ ਵਿੱਚ ਉਹਨਾਂ ਵਿੱਚ ਮੈਥਐਮਫੈਟਾਮੀਨ ਹੋਣ ਦੀ ਪੁਸ਼ਟੀ ਹੋਈ।
ਅਧਿਕਾਰੀਆਂ ਮੁਤਾਬਿਕ ਨੌਜਵਾਨ ਸਿੰਗਾਪੁਰ ਤੋਂ ਆਕਲੈਂਡ ਪਹੁੰਚਿਆ ਸੀ। ਇਸ ਤੋਂ ਪਹਿਲਾਂ ਉਹ 1 ਜੂਨ ਨੂੰ ਨਿਊਜ਼ੀਲੈਂਡ ਤੋਂ ਫਿਲੀਪੀਨਜ਼ ਗਿਆ ਸੀ। ਆਕਲੈਂਡ ਏਅਰਪੋਰਟ ਕਸਟਮ ਮੈਨੇਜਰ ਪੌਲ ਵਿਲੀਅਮਜ਼ ਨੇ ਕਿਹਾ ਕਿ ਅਪਰਾਧਿਕ ਗਿਰੋਹ ਪੈਸੇ ਦਾ ਲਾਲਚ ਦੇ ਕੇ ਲੋਕਾਂ ਨੂੰ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਲਈ ਵਰਤਦੇ ਹਨ, ਪਰ ਇਸ ਦੇ ਨਤੀਜੇ ਬਹੁਤ ਗੰਭੀਰ ਹੁੰਦੇ ਹਨ।
ਉਨ੍ਹਾਂ ਕਿਹਾ, “ਇਹ ਖ਼ਤਰਾ ਮੋਲ ਲੈਣਾ ਕਿਸੇ ਵੀ ਤਰ੍ਹਾਂ ਫਾਇਦੇਮੰਦ ਨਹੀਂ ਹੈ। ਇਸ ਦੇ ਪ੍ਰਭਾਵ ਨਾ ਸਿਰਫ਼ ਵਿਅਕਤੀ, ਸਗੋਂ ਉਸ ਦੇ ਪਰਿਵਾਰ ਨੂੰ ਵੀ ਜ਼ਿੰਦਗੀ ਭਰ ਝੇਲਣੇ ਪੈਂਦੇ ਹਨ। ਤੁਸੀਂ ਆਖ਼ਿਰਕਾਰ ਫੜੇ ਹੀ ਜਾਵੋਗੇ।” ਕਸਟਮ ਵਿਭਾਗ ਦੇ ਅਨੁਸਾਰ ਇਸ ਬਰਾਮਦਗੀ ਨਾਲ ਲਗਭਗ 20.5 ਮਿਲੀਅਨ ਨਿਊਜ਼ੀਲੈਂਡ ਡਾਲਰ ਦੇ ਸਮਾਜਿਕ ਨੁਕਸਾਨ ਨੂੰ ਰੋਕਿਆ ਗਿਆ ਹੈ। ਗ੍ਰਿਫ਼ਤਾਰ ਨੌਜਵਾਨ ਨੂੰ ਮਾਨੁਕਾਉ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਉਸ ‘ਤੇ ਕਲਾਸ-ਏ ਨਿਯੰਤਰਿਤ ਨਸ਼ੀਲੇ ਪਦਾਰਥ ਦੀ ਆਯਾਤ ਕਰਨ ਦਾ ਦੋਸ਼ ਲਗਾਇਆ ਗਿਆ ਹੈ।