ਭਾਰਤ ਸਣੇ ਦੁਨੀਆਂ ਭਰ ਦੇ ਕਈ ਦੇਸ਼ਾਂ ਦੇ ਵਾਸੀ ਆਪਣੇ ਚੰਗੇ ਭਵਿੱਖ ਖ਼ਾਤਰ ਨਿਊਜ਼ੀਲੈਂਡ ਆਉਂਦੇ ਹਨ। ਇਸੇ ਤਰਾਂ ਵਿਕਾਸ ਸ਼ਰਮਾ ਨਾਮ ਦਾ ਇੱਕ ਪ੍ਰਵਾਸੀ ਵੀ ਕਰਜ਼ਾ ਚੁੱਕ $60,000 ਖ਼ਰਚ ਕੇ ਭਾਰਤ ਤੋਂ ਨਿਊਜ਼ੀਲੈਂਡ ਨੌਕਰੀ ਦੀ ਆਸ ਲੈ ਕੇ ਆਇਆ ਸੀ। ਵਿਕਾਸ ਦਾ ਕਹਿਣਾ ਹੈ ਕਿ ਉਹ ਆਪਣੀਆਂ ਧੀਆਂ ਦੀ ਬਿਹਤਰ ਜ਼ਿੰਦਗੀ ਦੇ ਸੁਪਨਿਆਂ ਨਾਲ ਨਿਊਜ਼ੀਲੈਂਡ ਪਹੁੰਚਿਆ ਸੀ। ਇੰਨਾਂ ਹੀ ਨਹੀਂ ਵਿਕਾਸ ਮੁਤਾਬਿਕ ਕ੍ਰਾਈਸਚਰਚ ਨੇੜਲੇ ਰੈਸਟੋਰੈਂਟ ਕੈਂਡੀਜ਼ ਕਿਚਨ (Candy’s Kitchen) ਦੇ ਮਾਲਕ ਮਿਤੁ ਸ਼ਰਮਾ ਅਤੇ ਅੰਕੁਰ ਚੌਹਾਨ ਨੇ ਵਿਕਾਸ ਨੂੰ ਕੰਮ, ਅਕੋਮੋਡੇਸ਼ਨ, ਅਤੇ ਪਤਨੀ-ਬੱਚਿਆਂ ਨੂੰ ਨਿਊਜ਼ੀਲੈਂਡ ਲਿਆਉਣ ਦੀ ਮੱਦਦ ਦੇ ਸੁਨਿਹਰੇ ਤੇ ਲਲਚਾਉਣ ਵਾਲੇ ਵਾਅਦੇ ਕੀਤੇ ਸਨ। ਪਰ ਹੈਰਾਨੀ ਦੀ ਗੱਲ ਹੈ ਕਿ ਜਦੋਂ ਅਕਤੂਬਰ 2023 ‘ਚ ਵਿਕਾਸ ਸ਼ਰਮਾ ਨਿਊਜ਼ੀਲੈਂਡ ਪਹੁੰਚਿਆ ਤਾਂ ਨਾ ਤਾਂ ਉਸ ਕੋਲ ਘਰ ਸੀ, ਨਾ ਕੰਮ। ਇਸ ਮਗਰੋਂ ਥੋੜ੍ਹੇ ਸਮੇਂ ਲਈ ਉਸਨੂੰ 14-18 ਘੰਟੇ ਕੰਮ ਮਿਲਆ, ਪਰ ਸਿਰਫ ਤਿੰਨ ਹਫ਼ਤੇ ਕੰਮ ਦੇਣ ਤੋਂ ਬਾਅਦ ਉਸਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ।
ਇਸ ਮਗਰੋਂ ਕਈ ਹਫ਼ਤਿਆਂ ਤੱਕ ਵਿਕਾਸ ਬਿਨਾਂ ਕੰਮ, ਤਨਖਾਹ ਤੋਂ ਰੋਟੀ ਅਤੇ ਦੁੱਧ ‘ਤੇ ਗੁਜ਼ਾਰਾ ਕਰਦਾ ਰਿਹਾ। ਇੰਨਾਂ ਹੀ ਨਹੀਂ ਘਰ ਖਾਲੀ ਹੱਥ ਵਾਪਿਸ ਮੁੜਣ ਦੀ ਥਾਂ ਕਈ ਵਾਰ ਉਸਨੇ ਖੁਦਕੁਸ਼ੀ ਕਰਨ ਦਾ ਵੀ ਸੋਚਿਆ। ਮਾਨਸਿਕ ਤਣਾਅ ਕਾਰਨ ਉਸ ਦਾ ਇੱਕ ਸਾਥੀ ਉਸਨੂੰ ਡਾਕਟਰ ਕੋਲ ਵੀ ਲੈਕੇ ਗਿਆ। ਜਦ ਵਿਕਾਸ ਨੇ ਆਪ ਬੀਤੀ ਦੱਸੀ ਤਾਂ ਡਾਕਟਰ ਨੇ ਤੁਰੰਤ ਇਮੀਗ੍ਰੇਸ਼ਨ ਵਿਭਾਗ ਨੂੰ ਸੂਚਿਤ ਕੀਤਾ।
ਇਸ ਤੋਂ ਬਾਅਦ ਈ ਆਰ ਏ ਵਿੱਚ ਚੱਲੀ ਛਾਣਬੀਣ ਤੋਂ ਬਾਅਦ ਵਿਕਾਸ ਨੂੰ $100,000 ਐਲਾਨੇ ਗਏ ਸਨ, ਪਰ ਤੱਦ ਤੱਕ ਉਸਦੇ ਮਾਲਕ ਨਿਊਜੀਲੈਂਡ ਛੱਡ ਚੁੱਕੇ ਸਨ। ਵਿਕਾਸ ਨੂੰ ਮਾਈਗ੍ਰੇਂਟ ਐਕਸਪਲੋਇਟੇਸ਼ਨ ਵੀਜਾ ਤਾਂ ਮਿਿਲਆ,ਪਰ ਉਸਨੂੰ ਕੋਈ ਨੌਕਰੀ ਹਾਸਿਲ ਨਾ ਹੋਈ ਜਿਸ ਕਾਰਨ ਵਿਕਾਸ ਵਾਪਿਸ ਇੰਡੀਆ ਮੁੜ ਗਿਆ ਤੇ ਹੁਣ ਆਪਣੇ ਪਰਿਵਾਰ ਨਾਲ ਰਹਿ ਰਿਹਾ ਹੈ। ਹਾਲਾਂਕਿ ਇਸ ਵੇਲੇ ਵਿਕਾਸ ਕਰਜਾ ਵੀ ਉਤਾਰ ਰਿਹਾ ਹੈ, ਪਰ ਉਸਨੂੰ ਖੁਸ਼ੀ ਹੈ ਕਿ ਉਹ ਮੁੜ ਆਪਣੇ ਪਰਿਵਾਰ ਨੂੰ ਮਿਲ ਸਕਿਆ। ਦੱਸ ਦੇਈਏ ਪ੍ਰਵਾਸੀ ਸ਼ੋਸ਼ਣ ਵੀਜ਼ਾ ‘ਤੇ ਹੋਰ ਰੁਜ਼ਗਾਰ ਨਾ ਮਿਲਣ ਕਰਕੇ, ਸ਼ਰਮਾ ਕਈ ਮਹੀਨਿਆਂ ਬਾਅਦ 2024 ਵਿੱਚ ਭਾਰਤ ਵਾਪਿਸ ਆਇਆ ਸੀ।