ਆਕਲੈਂਡ ਦੀ ਰਹਿਣ ਵਾਲੀ ਛੇ ਬੱਚਿਆਂ ਦੀ ਮਾਂ ਸਸਾਗੀ ਰੋਜ਼ਾਲੀ ਫਿਲੋਆ ਨੂੰ ਸਰਕਾਰੀ ਵਰਕਿੰਗ ਫ਼ੋਰ ਫੈਮਿਲੀਜ਼ ਟੈਕਸ ਕਰੈਡਿਟ ਯੋਜਨਾ ਤਹਿਤ ਗਲਤ ਤਰੀਕੇ ਨਾਲ ਕਰੀਬ 190,000 ਡਾਲਰ ਹਾਸਿਲ ਕਰਨ ਦੇ ਮਾਮਲੇ ਵਿੱਚ ਅਦਾਲਤ ਨੇ ਅੱਠ ਮਹੀਨੇ ਦੀ ਘਰ ਵਿੱਚ ਨਜ਼ਰਬੰਦੀ (ਹੋਮ ਡਿਟੈਨਸ਼ਨ) ਦੀ ਸਜ਼ਾ ਸੁਣਾਈ ਹੈ। ਇਸ ਤੋਂ ਇਲਾਵਾ ਉਸ ਨੂੰ ਛੇ ਮਹੀਨੇ ਲਈ ਵਾਧੂ ਨਿਗਰਾਨੀ ਹੇਠ ਵੀ ਰਹਿਣਾ ਪਵੇਗਾ।
ਮੈਨੂਕਾਉ ਜ਼ਿਲ੍ਹਾ ਅਦਾਲਤ ਵਿੱਚ ਫਿਲੋਆ ਨੇ ਟੈਕਸ ਧੋਖਾਧੜੀ ਦੇ ਦੋਸ਼ ਕਬੂਲ ਕਰ ਲਏ ਹਨ। ਜਾਂਚ ਦੌਰਾਨ ਉਸ ਨੇ ਮੰਨਿਆ ਕਿ ਉਹ ਜਾਣਦੀ ਸੀ ਕਿ ਉਹ ਇਨ੍ਹਾਂ ਭੁਗਤਾਨਾਂ ਦੀ ਹੱਕਦਾਰ ਨਹੀਂ ਸੀ, ਪਰ ਇਹ ਰਕਮ ਉਸ ਨੇ ਘਰੇਲੂ ਖਰਚਿਆਂ ਅਤੇ ਨਿੱਜੀ ਬਿਲਾਂ ਦੀ ਅਦਾਇਗੀ ਲਈ ਵਰਤੀ।
ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਫਿਲੋਆ ਨੇ ਸਾਲ 2015 ਵਿੱਚ ਟੈਕਸ ਵਿਭਾਗ ਨੂੰ ਆਪਣੇ ਆਪ ਨੂੰ ਇਕੱਲੀ ਮਾਂ ਦੱਸਿਆ ਸੀ, ਜਦਕਿ ਉਸ ਦਾ ਵਿਆਹ 2011 ਵਿੱਚ ਹੋ ਚੁੱਕਾ ਸੀ ਅਤੇ ਉਹ ਆਪਣੇ ਪਤੀ ਨਾਲ ਛੇ ਬੱਚਿਆਂ ਦੀ ਮਾਂ ਸੀ। ਇਸ ਗਲਤ ਜਾਣਕਾਰੀ ਦੇ ਆਧਾਰ ‘ਤੇ ਉਸ ਨੇ 2018 ਤੋਂ 2024 ਤੱਕ ਇਕੱਲੇ ਮਾਪੇ ਲਈ ਮਿਲਣ ਵਾਲੇ ਪੂਰੇ ਟੈਕਸ ਕਰੈਡਿਟ ਹਾਸਿਲ ਕੀਤੇ।
ਇਨਲੈਂਡ ਰੈਵੇਨਿਊ ਦੇ ਰਿਕਾਰਡ ਮੁਤਾਬਿਕ, ਹਰ ਸਾਲ ਭਰੇ ਗਏ ਫਾਰਮਾਂ ਵਿੱਚ ਉਸ ਨੇ ਆਪਣੇ ਪਤੀ ਦੀ ਆਮਦਨ ਸਿਫ਼ਰ ਦਰਸਾਈ ਅਤੇ ਕਦੇ ਵੀ ਸਹੀ ਜਾਣਕਾਰੀ ਦੇਣ ਲਈ ਵਿਭਾਗ ਨਾਲ ਸੰਪਰਕ ਨਹੀਂ ਕੀਤਾ।
ਹਾਲਾਂਕਿ ਫਿਲੋਆ ਨੇ ਦਾਅਵਾ ਕੀਤਾ ਕਿ ਇਹ ਪੈਸਾ ਉਸ ਨੇ ਪਰਿਵਾਰ ਦੀਆਂ ਲੋੜਾਂ ਅਤੇ ਸੱਭਿਆਚਾਰਕ ਜ਼ਿੰਮੇਵਾਰੀਆਂ ਨਿਭਾਉਣ ਲਈ ਵਰਤਿਆ, ਪਰ ਅਦਾਲਤ ਨੇ ਨੋਟ ਕੀਤਾ ਕਿ 2015 ਤੋਂ 2024 ਦਰਮਿਆਨ ਉਹ ਆਪਣੇ ਪਰਿਵਾਰ ਸਮੇਤ ਕਰੀਬ 20 ਵਾਰ ਵਿਦੇਸ਼ ਯਾਤਰਾ ਕਰ ਚੁੱਕੀ ਸੀ। ਜੱਜ ਲੂਕ ਰੈਡਿਚ ਨੇ ਕਿਹਾ ਕਿ ਇਹ ਯਾਤਰਾਵਾਂ ਦਰਸਾਉਂਦੀਆਂ ਹਨ ਕਿ ਪਰਿਵਾਰ ਦੀ ਵਿੱਤੀ ਹਾਲਤ ਕਾਫ਼ੀ ਸੁਖਾਲੀ ਸੀ ਅਤੇ ਇਹ ਧੋਖਾਧੜੀ ਲੋੜ ਨਹੀਂ, ਸਗੋਂ ਲਾਲਚ ਕਾਰਨ ਕੀਤੀ ਗਈ ਸੀ।
ਇਨਲੈਂਡ ਰੈਵੇਨਿਊ ਨੇ ਦੱਸਿਆ ਕਿ ਫਿਲੋਆ ਨੂੰ ਕਰੀਬ 190,000 ਡਾਲਰ ਗਲਤ ਤਰੀਕੇ ਨਾਲ ਮਿਲੇ ਸਨ। ਹੁਣ ਉਹ ਇਹ ਰਕਮ ਹਰ ਹਫ਼ਤੇ 300 ਡਾਲਰ ਦੀ ਕਿਸ਼ਤ ਰਾਹੀਂ ਵਾਪਸ ਕਰ ਰਹੀ ਹੈ।