ਡੂਨੀਡਿਨ ਵਿੱਚ ਹੋਏ ਗੁਰਜੀਤ ਕਤਲ ਦੇ ਮਾਮਲੇ ਨਾਲ ਜੁੜੀ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਕਾਤਲ ਰਾਜਿੰਦਰ ਦੀ ਪਤਨੀ ਨੇ ਸਬੂਤ ਮਿਟਾਉਣ ਵਿੱਚ ਆਪਣੀ ਭੂਮਿਕਾ ਕਬੂਲ ਕਰ ਲਈ ਹੈ। ਗੁਰਪ੍ਰੀਤ ਕੌਰ ਦੇ ਪਤੀ ਰਾਜਿੰਦਰ ਨੂੰ 2024 ਵਿੱਚ ਗੁਰਜੀਤ ਸਿੰਘ ਦੇ ਕਤਲ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ ਸੀ। ਜੂਰੀ ਟ੍ਰਾਇਲ ਤੋਂ ਬਾਅਦ ਉਸਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ ਅਤੇ ਹੁਣ ਉਸਦੀ ਸਜ਼ਾ ਬੁੱਧਵਾਰ ਨੂੰ ਹਾਈ ਕੋਰਟ ਵਿੱਚ ਸੁਣਾਈ ਜਾਵੇਗੀ।
ਇਸ ਦੌਰਾਨ, ਗੁਰਪ੍ਰੀਤ ਕੌਰ ਦੀ ਸ਼ਮੂਲੀਅਤ ਬਾਰੇ ਜਾਣਕਾਰੀ ਉਸ ਵੇਲੇ ਤੱਕ ਗੁਪਤ ਰੱਖੀ ਗਈ ਜਦੋਂ ਤੱਕ ਉਸਨੇ ਮੰਗਲਵਾਰ ਨੂੰ ਇਨਸਾਫ ਵਿੱਚ ਰੁਕਾਵਟ ਪੈਦਾ ਕਰਨ (perverting the course of justice) ਦੇ ਦੋਸ਼ ਵਿੱਚ ਕਬੂਲੀ ਬਿਆਨ ਨਹੀਂ ਦਿੱਤਾ। ਅਦਾਲਤ ਵਿੱਚ ਸੁਣਵਾਈ ਦੌਰਾਨ ਪੁਲਿਸ ਨੇ ਦੱਸਿਆ ਕਿ ਉਹ ਗੁਰਪ੍ਰੀਤ ਕੌਰ ਦੇ ਕੰਮ ਵਾਲੀ ਥਾਂ ‘ਤੇ ਗਏ ਸਨ ਤਾਂ ਜੋ ਉਸਨੂੰ ਦੱਸ ਸਕਣ ਕਿ ਰਾਜਿੰਦਰ ‘ਤੇ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ ਅਤੇ ਉਹਨਾਂ ਨੂੰ ਉਸ ਨਾਲ ਥਾਣੇ ਵਿੱਚ ਗੱਲ ਕਰਨੀ ਹੈ।
ਗੁਰਪ੍ਰੀਤ ਕੌਰ ਨੇ ਜਾਣ ਤੋਂ ਪਹਿਲਾਂ ਟਾਇਲਟ ਜਾਣ ਦੀ ਇਜਾਜ਼ਤ ਮੰਗੀ। ਉਸਦੇ ਬਾਹਰ ਆਉਣ ਤੋਂ ਬਾਅਦ ਪੁਲਿਸ ਨੇ ਬਾਥਰੂਮ ਦੀ ਜਾਂਚ ਕੀਤੀ, ਜਿੱਥੇ ਉਨ੍ਹਾਂ ਨੂੰ ਕੂੜੇਦਾਨ ਵਿੱਚ ਰਾਜਿੰਦਰ ਦੇ ਜੁੱਤੇ ਲਕੋਏ ਹੋਏ ਮਿਲੇ। ਕਰਾਊਨ ਪ੍ਰੋਸੀਕਿਊਟਰ ਨੇ ਅਦਾਲਤ ਨੂੰ ਦੱਸਿਆ ਕਿ ਜੁੱਤਿਆਂ ‘ਤੇ ਮਿਲੇ ਕੱਚ ਦੇ ਬਹੁਤ ਛੋਟੇ ਟੁਕੜੇ ਕਤਲ ਵਾਲੀ ਥਾਂ ‘ਤੇ ਟੁੱਟੇ ਕੱਚ ਨਾਲ ਮੇਲ ਖਾਂਦੇ ਸਨ।
ਉਸਨੇ ਕਿਹਾ ਕਿ ਘਰ ਅਤੇ ਲੱਕੜੀ ਦੇ ਡੈਕ ‘ਤੇ ਖੂਨ ਨਾਲ ਭਰੇ ਪੈਰਾਂ ਦੇ ਨਿਸ਼ਾਨਾਂ ਦੀ ਤੁਲਨਾ ਰਾਜਿੰਦਰ ਦੇ ਜੁੱਤਿਆਂ ਨਾਲ ਕੀਤੀ ਗਈ ਸੀ, ਜੋ ਬਾਅਦ ਵਿੱਚ ਉਸਦੀ ਪਤਨੀ ਦੇ ਕੰਮ ਵਾਲੀ ਥਾਂ ਤੋਂ ਬਰਾਮਦ ਹੋਏ। ਅਦਾਲਤ ਨੂੰ ਇਹ ਵੀ ਦੱਸਿਆ ਗਿਆ ਕਿ ਰਾਜਿੰਦਰ ਦੀ ਪਤਨੀ ਨੇ ਇਹ ਜੁੱਤੇ ਨਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਗੁਰਪ੍ਰੀਤ ਕੌਰ ਨੂੰ ਇਸ ਮਾਮਲੇ ਵਿੱਚ ਜੁਲਾਈ ਵਿੱਚ ਸਜ਼ਾ ਸੁਣਾਈ ਜਾਵੇਗੀ। ਇਸ ਵੇਲੇ ਉਹ ਜ਼ਮਾਨਤ ‘ਤੇ ਬਾਹਰ ਹੈ।