ਨਿਊਜ਼ੀਲੈਂਡ ਦੇ ਤਜਰਬੇਕਾਰ ਆਲਰਾਊਂਡਰ ਸਕਾਟ ਕੁਗਲੈਨ ਨੂੰ ਲੈ ਕੇ ਕ੍ਰਿਕਟ ਜਗਤ ਵਿੱਚ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਹੈਂਪਸ਼ਾਇਰ ਨੇ ਵਾਰਵਿਕਸ਼ਾਇਰ ਖ਼ਿਲਾਫ਼ ਮੈਚ ਤੋਂ ਪਹਿਲਾਂ ਕੁਗਲੈਨ ਨੂੰ ਆਪਣੀ ਟੀਮ ਵਿੱਚ ਸ਼ਾਮਿਲ ਕੀਤਾ ਸੀ, ਪਰ ਫਿਰ ਕੁਝ ਅਜਿਹਾ ਹੋਇਆ ਕਿ ਕਲੱਬ ਨੂੰ ਆਪਣਾ ਫੈਸਲਾ ਬਦਲਣਾ ਪਿਆ।
ਦਰਅਸਲ, ਕੁਗਲੈਨ ਨੂੰ ਕਾਊਂਟੀ ਚੈਂਪੀਅਨਸ਼ਿਪ ਲਈ ਟੀਮ ਵਿੱਚ ਸ਼ਾਮਿਲ ਕੀਤੇ ਜਾਣ ਤੋਂ ਬਾਅਦ ਹੈਂਪਸ਼ਾਇਰ ਦੇ ਸਮਰਥਕਾਂ ਵੱਲੋਂ ਸਖ਼ਤ ਵਿਰੋਧ ਕੀਤਾ ਗਿਆ। ਇਸ ਵਿਰੋਧ ਦੇ ਪਿੱਛੇ 11 ਸਾਲ ਪੁਰਾਣਾ ਮਾਮਲਾ ਦੱਸਿਆ ਜਾ ਰਿਹਾ ਹੈ, ਜਿਸ ਵਿੱਚ ਉਨ੍ਹਾਂ ’ਤੇ ਬਲਾਤਕਾਰ ਅਤੇ ਹਮਲੇ ਦੇ ਦੋਸ਼ ਲੱਗੇ ਸਨ। ਹਾਲਾਂਕਿ ਬਾਅਦ ਵਿੱਚ ਉਹ ਇਸ ਮਾਮਲੇ ਵਿੱਚ ਬਰੀ ਹੋ ਗਏ ਸਨ।
ਫੈਨਜ਼ ਦੇ ਵਿਰੋਧ ਤੋਂ ਬਾਅਦ ਕਲੱਬ ਨੇ ਲਿਆ ਵੱਡਾ ਫੈਸਲਾ
ਹੈਂਪਸ਼ਾਇਰ ਕਾਊਂਟੀ ਕ੍ਰਿਕਟ ਕਲੱਬ ਨੇ ਬੁੱਧਵਾਰ ਨੂੰ ਬਿਆਨ ਜਾਰੀ ਕਰਕੇ ਪੁਸ਼ਟੀ ਕੀਤੀ ਕਿ ਸਕਾਟ ਕੁਗਲੈਨ ਹੁਣ ਕਲੱਬ ਲਈ ਨਹੀਂ ਖੇਡਣਗੇ।
ਕਲੱਬ ਮੁਤਾਬਿਕ, ਖਿਡਾਰੀ ਨੂੰ ਟੀਮ ਵਿੱਚ ਸ਼ਾਮਿਲ ਕਰਨ ਤੋਂ ਬਾਅਦ ਸਟਾਫ ਅਤੇ ਸਮਰਥਕਾਂ ਵੱਲੋਂ ਮਿਲੀ ਪ੍ਰਤੀਕਿਰਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇਹ ਫੈਸਲਾ ਲਿਆ ਗਿਆ।
2015 ਵਿੱਚ ਲੱਗੇ ਸਨ ਗੰਭੀਰ ਦੋਸ਼
ਸਾਲ 2015 ਵਿੱਚ ਸਕਾਟ ਕੁਗਲੈਨ ’ਤੇ ਬਲਾਤਕਾਰ ਅਤੇ ਹਮਲੇ ਦੇ ਦੋਸ਼ ਲੱਗੇ ਸਨ। ਸ਼ੁਰੂਆਤੀ ਟਰਾਇਲ ਦੌਰਾਨ ਜੂਰੀ ਕਿਸੇ ਨਤੀਜੇ ’ਤੇ ਨਹੀਂ ਪਹੁੰਚ ਸਕੀ ਸੀ। ਇਸ ਤੋਂ ਬਾਅਦ ਹੋਈ ਕਾਰਵਾਈ ਵਿੱਚ ਕੁਗਲੈਨ ਨੂੰ ਬਰੀ ਕਰ ਦਿੱਤਾ ਗਿਆ ਸੀ।
ਇਸ ਦੇ ਬਾਵਜੂਦ ਇਹ ਮਾਮਲਾ ਉਨ੍ਹਾਂ ਦੇ ਕ੍ਰਿਕਟ ਕਰੀਅਰ ਦੌਰਾਨ ਚਰਚਾ ਦਾ ਵਿਸ਼ਾ ਬਣਿਆ ਰਿਹਾ। 2019 ਵਿੱਚ ਜਦੋਂ ਉਨ੍ਹਾਂ ਨੂੰ ਨਿਊਜ਼ੀਲੈਂਡ ਦੀ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਸੀ, ਉਦੋਂ ਵੀ ਕੁਝ ਫੈਨਜ਼ ਵੱਲੋਂ ਵਿਰੋਧ ਕੀਤਾ ਗਿਆ ਸੀ। ਉਸ ਸਮੇਂ ਪ੍ਰਦਰਸ਼ਨਕਾਰੀਆਂ ਨੇ ਪੋਸਟਰਾਂ ਰਾਹੀਂ ਆਪਣਾ ਵਿਰੋਧ ਦਰਜ ਕਰਵਾਇਆ ਸੀ।
ਕੌਣ ਹੈ ਸਕਾਟ ਕੁਗਲੈਨ?
ਸਕਾਟ ਕੁਗਲੈਨ ਨਿਊਜ਼ੀਲੈਂਡ ਲਈ ਤਿੰਨੋਂ ਫਾਰਮੈਟਾਂ ਵਿੱਚ ਖੇਡ ਚੁੱਕੇ ਹਨ। ਉਨ੍ਹਾਂ ਨੇ 3 ਟੈਸਟ, 2 ਵਨਡੇ ਅਤੇ 18 ਟੀ20 ਇੰਟਰਨੈਸ਼ਨਲ ਮੈਚ ਖੇਡੇ ਹਨ।
ਟੈਸਟ ਵਿੱਚ 6 ਵਿਕਟਾਂ
ਵਨਡੇ ਵਿੱਚ 5 ਵਿਕਟਾਂ
ਟੀ20 ਇੰਟਰਨੈਸ਼ਨਲ ਵਿੱਚ 16 ਵਿਕਟਾਂ
ਉਨ੍ਹਾਂ ਨੇ ਨਿਊਜ਼ੀਲੈਂਡ ਲਈ ਆਪਣਾ ਆਖਰੀ ਅੰਤਰਰਾਸ਼ਟਰੀ ਮੈਚ 2024 ਵਿੱਚ ਟੈਸਟ ਫਾਰਮੈਟ ਵਿੱਚ ਖੇਡਿਆ ਸੀ।
175 ਟੀ20 ਮੈਚਾਂ ਦਾ ਤਜਰਬਾ
ਕੁਗਲੈਨ ਦਾ ਘਰੇਲੂ ਅਤੇ ਟੀ20 ਕ੍ਰਿਕਟ ਵਿੱਚ ਵੀ ਲੰਮਾ ਤਜਰਬਾ ਹੈ। ਉਨ੍ਹਾਂ ਨੇ 114 ਫਰਸਟ ਕਲਾਸ ਮੈਚਾਂ ਵਿੱਚ 379 ਵਿਕਟਾਂ, 118 ਲਿਸਟ-ਏ ਮੈਚਾਂ ਵਿੱਚ 175 ਵਿਕਟਾਂ ਅਤੇ 175 ਟੀ20 ਮੈਚਾਂ ਵਿੱਚ 186 ਵਿਕਟਾਂ ਹਾਸਲ ਕੀਤੀਆਂ ਹਨ।
ਪਰ ਹੁਣ ਸਵਾਲ ਇਹ ਹੈ ਕਿ ਅਦਾਲਤ ਤੋਂ ਬਰੀ ਹੋਣ ਦੇ ਬਾਵਜੂਦ 11 ਸਾਲ ਪੁਰਾਣਾ ਮਾਮਲਾ ਉਨ੍ਹਾਂ ਦੇ ਕਰੀਅਰ ’ਤੇ ਕਿੰਨਾ ਅਸਰ ਪਾਵੇਗਾ? ਹੈਂਪਸ਼ਾਇਰ ਵੱਲੋਂ ਲਿਆ ਗਿਆ ਇਹ ਫੈਸਲਾ ਕ੍ਰਿਕਟ ਜਗਤ ਵਿੱਚ ਨਵੀਂ ਚਰਚਾ ਨੂੰ ਜਨਮ ਦੇ ਰਿਹਾ ਹੈ।