ਨਿਊਜ਼ੀਲੈਂਡ ਦਾ ਇੱਕ ਸਿਪਾਹੀ ਜਿਸਨੂੰ ਜਾਸੂਸੀ ਦੀ ਕੋਸ਼ਿਸ਼ ਦਾ ਦੋਸ਼ੀ ਠਹਿਰਾਇਆ ਗਿਆ ਸੀ, ਨੂੰ ਦੋ ਸਾਲ ਦੀ ਫੌਜੀ ਹਿਰਾਸਤ ਦੀ ਸਜ਼ਾ ਸੁਣਾਈ ਗਈ ਹੈ ਅਤੇ ਫੌਜ ਤੋਂ ਬਰਖਾਸਤ ਕਰ ਦਿੱਤਾ ਗਿਆ ਹੈ। ਸਿਪਾਹੀ ਨੇ ਸੰਵੇਦਨਸ਼ੀਲ ਜਾਣਕਾਰੀ ਇੱਕ ਵਿਅਕਤੀ ਨੂੰ ਸੌਂਪੀ ਸੀ ਜਿਸਨੂੰ ਉਹ ਵਿਦੇਸ਼ੀ ਏਜੰਟ ਸਮਝਦਾ ਸੀ ਪਰ ਅਸਲ ਵਿੱਚ ਉਹ ਇੱਕ ਗੁਪਤ ਸਟਿੰਗ ਦਾ ਹਿੱਸਾ ਸੀ। ਉਸਨੇ ਸੋਮਵਾਰ ਨੂੰ ਪਾਮਰਸਟਨ ਨੌਰਥ ਦੇ ਨੇੜੇ ਲਿੰਟਨ ਮਿਲਟਰੀ ਕੈਂਪ ਵਿਖੇ ਕੋਰਟ ਮਾਰਸ਼ਲ ਦੀ ਸੁਣਵਾਈ ਦੀ ਸ਼ੁਰੂਆਤ ਵਿੱਚ ਜਾਸੂਸੀ ਦੀ ਕੋਸ਼ਿਸ਼, ਬੇਈਮਾਨੀ ਨਾਲ ਇੱਕ ਕੰਪਿਊਟਰ ਸਿਸਟਮ ਤੱਕ ਪਹੁੰਚ ਕਰਨ ਅਤੇ ਇੱਕ ਇਤਰਾਜ਼ਯੋਗ ਪ੍ਰਕਾਸ਼ਨ ਰੱਖਣ ਦੇ ਦੋਸ਼ਾਂ ਨੂੰ ਸਵੀਕਾਰ ਕੀਤਾ ਸੀ। ਜਾਸੂਸੀ ਦੀ ਕੋਸ਼ਿਸ਼ ਦਾ ਦੋਸ਼ ਦਸੰਬਰ 2019 ਦਾ ਹੈ ਜਦੋਂ ਸਿਪਾਹੀ ਨੇ ਗੁਪਤ ਏਜੰਟ ਨੂੰ ਜਾਣਕਾਰੀ ਦੇਣ ਦੀ ਕੋਸ਼ਿਸ਼ ਕੀਤੀ ਸੀ।
ਮੁੱਖ ਜੱਜ ਕੇਵਿਨ ਰਿਓਰਡਨ ਨੇ ਸਜ਼ਾ ਦੀ ਵਿਆਖਿਆ ਕਰਦੇ ਹੋਏ ਅਦਾਲਤ ਨੂੰ ਕਿਹਾ ਕਿ, “ਇਹ ਇੱਕ ਗੁੰਝਲਦਾਰ ਜਾਸੂਸੀ ਸਾਜ਼ਿਸ਼ ਨਹੀਂ ਸੀ।” “ਦਰਅਸਲ, ਅਦਾਲਤ ਹੈਰਾਨ ਹੈ ਕਿ ਤੁਸੀਂ ਇੰਨੇ ਭੋਲੇ ਕਿਵੇਂ ਹੋ ਸਕਦੇ ਸੀ।” ਜੱਜ ਨੇ ਕਿਹਾ ਕਿ, “ਫਿਰ ਵੀ, ਕੋਈ ਵੀ ਅਪਰਾਧ ਜਿਸਨੇ ਨਿਊਜ਼ੀਲੈਂਡ ਦੀ ਸੁਰੱਖਿਆ ਅਤੇ ਇਸਦੀ ਫੌਜ ਨੂੰ ਜੋਖਮ ਵਿੱਚ ਪਾਇਆ ਹੈ, ਗੰਭੀਰ ਸੀ, “ਜਾਸੂਸੀ ਦੀ ਕੋਈ ਗੈਰ-ਗੰਭੀਰ ਕਾਰਵਾਈ ਨਹੀਂ ਹੈ। ਜਾਸੂਸੀ ਦੀ ਕੋਈ ਮਾਮੂਲੀ ਕਾਰਵਾਈ ਨਹੀਂ ਹੈ।”
ਇਹ ਸਿਪਾਹੀ ਕ੍ਰਾਈਸਟਚਰਚ ਦੇ ਦੱਖਣ ਵਿੱਚ ਬਰਨਹੈਮ ਮਿਲਟਰੀ ਕੈਂਪ ਵਿੱਚ ਆਪਣੀ ਸਜ਼ਾ ਕੱਟੇਗਾ। ਸਿਪਾਹੀ ਦੁਆਰਾ ਸਾਂਝੀ ਕੀਤੀ ਗਈ ਸੰਵੇਦਨਸ਼ੀਲ ਜਾਣਕਾਰੀ ਵਿੱਚ ਤਿੰਨ ਫੌਜੀ ਕੈਂਪਾਂ, ਪਾਮਰਸਟਨ ਨੌਰਥ ਵਿੱਚ ਹੋਕੋਹਿਟੂ ਕੈਂਪਸ ਅਤੇ ਮੈਸੀਨਜ਼ ਡਿਫੈਂਸ ਸੈਂਟਰ ਲਈ ਫੋਨ ਡਾਇਰੈਕਟਰੀਆਂ ਸ਼ਾਮਿਲ ਸਨ। ਉਸਨੇ ਨਕਸ਼ੇ ਅਤੇ ਲਿੰਟਨ ਮਿਲਟਰੀ ਕੈਂਪ ਦੀ ਇੱਕ ਐਨੋਟੇਟ ਕੀਤੀ ਫੋਟੋ, ਇਸਦੇ ਸੁਰੱਖਿਆ ਕਮਜ਼ੋਰੀਆਂ ਨੂੰ ਦਰਸਾਉਂਦੇ ਦਸਤਾਵੇਜ਼ ਦੇ ਨਾਲ ਸੌਂਪਣ ਦੀ ਕੋਸ਼ਿਸ਼ ਕੀਤੀ ਸੀ। ਉਸਨੇ ਆਪਣਾ ਆਈਡੀ ਕਾਰਡ, ਐਕਸੈਸ ਕੋਡ ਅਤੇ ਲਿੰਟਨ ਅਤੇ ਓਹੇਕੀਆ ਏਅਰ ਬੇਸ ਤੱਕ ਅਣਅਧਿਕਾਰਤ ਪਹੁੰਚ ਦੀ ਆਗਿਆ ਦੇਣ ਵਾਲੀ ਜਾਣਕਾਰੀ, ਨਾਲ ਹੀ ਆਪਣਾ ਨਾਮ ਅਤੇ ਪਾਸਵਰਡ ਵੀ ਸੌਂਪਣ ਦੀ ਕੋਸ਼ਿਸ਼ ਕੀਤੀ, ਜਿਸ ਨਾਲ ਡਿਫੈਂਸ ਫੋਰਸ ਸਿਸਟਮ ਤੱਕ ਅਣਅਧਿਕਾਰਤ ਪਹੁੰਚ ਹੋ ਸਕਦੀ ਸੀ। ਜੱਜ ਅਤੇ ਤਿੰਨ ਸੀਨੀਅਰ ਅਧਿਕਾਰੀਆਂ ਦੇ ਇੱਕ ਫੌਜੀ ਪੈਨਲ ਨੇ ਮੰਗਲਵਾਰ ਦੁਪਹਿਰ 1 ਵਜੇ ਸਜ਼ਾ ‘ਤੇ ਵਿਚਾਰ-ਵਟਾਂਦਰਾ ਸ਼ੁਰੂ ਕੀਤਾ ਸੀ।