ਇਮੀਗ੍ਰੇਸ਼ਨ ਨਿਊਜੀਲੈਂਡ ਆਪਣੇ ਅਵੱਲੇ ਫੈਂਸਲਿਆਂ ਕਾਰਨ ਹਮੇਸ਼ਾ ਹੀ ਚਰਚਾ ਦੇ ਵਿੱਚ ਰਹਿੰਦੀ ਹੈ। ਇੱਕ ਵਾਰ ਫਿਰ ਹੁਣ ਕੁਝ ਅਜਿਹਾ ਹੀ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨੇ ਸਭ ਨੂੰ ਹੈਰਾਨ ਕਰਕੇ ਰੱਖ ਦਿੱਤਾ ਹੈ। ਦਰਅਸਲ ਨੇਲਸਨ ਵਿੱਚ ਕੰਮ ਕਰ ਰਹੇ ਭਾਰਤੀ ਮੂਲ ਦੇ ਨਰਸ ਨਿਤਿਨ ਮਨਕੀਲ ਦਾ 5 ਸਾਲਾ ਪੁੱਤਰ ਆਇਧਨ ਨਿਥਿਨ ਡਿਪੋਰਟ ਹੋਣ ਦੇ ਖ਼ਤਰੇ ਦਾ ਸਾਹਮਣਾ ਕਰ ਰਿਹਾ ਹੈ। ਇਮੀਗ੍ਰੇਸ਼ਨ ਨਿਊਜੀਲੈਂਡ ਨੇ ਬੱਚੇ ਨੂੰ ਵੀਜ਼ਾ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ, ਕਿਉਂਕਿ ਵਿਭਾਗ ਦੇ ਅਨੁਸਾਰ ਉਹ ਸਿਹਤ ਅਤੇ ਸਿੱਖਿਆ ਸੇਵਾਵਾਂ ‘ਤੇ ਵੱਡਾ ਖ਼ਰਚਾ ਪਾ ਸਕਦਾ ਹੈ।ਨਿਤਿਨ ਮਨਕੀਲ ਜਨਵਰੀ 2024 ਵਿੱਚ ਭਾਰਤ ਤੋਂ ਨਿਊਜ਼ੀਲੈਂਡ ਆਇਆ ਸੀ ਅਤੇ ਉਹ ਨੇਲਸਨ ਵਿੱਚ ਐਲਡਰ ਕੇਅਰ ਨਰਸ ਵਜੋਂ ਸੇਵਾ ਨਿਭਾ ਰਿਹਾ ਹੈ। ਉਸਦੀ ਨੌਕਰੀ ਸਰਕਾਰ ਦੀ ਗ੍ਰੀਨ ਲਿਸਟ (Tier 1) ਵਿੱਚ ਸਾਮਿਲ ਹੈ, ਜਿਸਨੂੰ ਜ਼ਰੂਰੀ ਸੇਵਾ ਮੰਨਿਆ ਜਾਂਦਾ ਹੈ। ਕੁਝ ਸਮੇਂ ਬਾਅਦ ਉਸਦੀ ਪਤਨੀ ਅਪਰਨਾ ਜਯਾਨੰਦਨ ਗੀਤਾ ਅਤੇ ਪੁੱਤਰ ਆਇਧਨ ਵੀ ਨਿਊਜ਼ੀਲੈਂਡ ਆ ਗਏ ਸਨ।
ਰਿਪੋਰਟ ਅਨੁਸਾਰ ਵੀਜ਼ਾ ਪ੍ਰਕਿਰਿਆ ਦੌਰਾਨ ਬੱਚੇ ਦੀ ਬੋਲਚਾਲ ਅਤੇ ਵਿਕਾਸ ਨੂੰ ਲੈ ਕੇ ਜਾਂਚ ਕੀਤੀ ਗਈ, ਜਿਸ ਤੋਂ ਬਾਅਦ ਡਾਕਟਰਾਂ ਨੇ ਆਇਧਨ ਨੂੰ ਆਟੀਜ਼ਮ ਸਪੈਕਟ੍ਰਮ ਡਿਸਆਰਡਰ ਅਤੇ ਗਲੋਬਲ ਡਿਵੈਲਪਮੈਂਟਲ ਡਿਲੇਅ ਨਾਲ ਪੀੜਤ ਦੱਸਿਆ। ਇਸ ਦੇ ਆਧਾਰ ‘ਤੇ ਇਮੀਗ੍ਰੇਸ਼ਨ ਵਿਭਾਗ ਨੇ ਉਸਦਾ ਵੀਜ਼ਾ ਰੱਦ ਕਰ ਦਿੱਤਾ। ਹਾਲਾਤ ਇੱਥੇ ਤੱਕ ਪਹੁੰਚ ਗਏ ਕਿ ਮਾਪਿਆਂ ਨੂੰ ਆਪਣਾ ਰਿਹਾਇਸ਼ੀ ਵੀਜ਼ਾ ਬਚਾਉਣ ਲਈ ਬੱਚੇ ਦਾ ਨਾਮ ਅਰਜ਼ੀ ਤੋਂ ਹਟਾਉਣਾ ਪਿਆ। ਮਾਪਿਆਂ ਨੂੰ ਰਿਹਾਇਸ਼ ਮਿਲ ਗਈ, ਪਰ ਬੱਚੇ ਦੀ ਨਵੀਂ ਵੀਜ਼ਾ ਅਰਜ਼ੀ ਵੀ ਜੁਲਾਈ ਵਿੱਚ ਰੱਦ ਹੋ ਗਈ। ਇਸ ਕਾਰਨ ਆਇਧਨ ਇਸ ਸਮੇਂ ਨਿਊਜ਼ੀਲੈਂਡ ਵਿੱਚ ਕਾਨੂੰਨੀ ਤੌਰ ‘ਤੇ ਗੈਰਕਾਨੂੰਨੀ ਸਥਿਤੀ ਵਿੱਚ ਹੈ ਅਤੇ ਉਸਨੂੰ ਡਿਪੋਰਟ ਕੀਤਾ ਜਾ ਸਕਦਾ ਹੈ।