ਨਿਊਜ਼ੀਲੈਂਡ ਸਰਕਾਰ ਨੇ ਡਰਾਈਵਰਾਂ ਲਈ ਇੱਕ ਅਹਿਮ ਅਤੇ ਆਧੁਨਿਕ ਕਦਮ ਚੁੱਕਦਿਆਂ ਡਿਜੀਟਲ ਡਰਾਈਵਿੰਗ ਲਾਇਸੈਂਸ ਨੂੰ ਕਾਨੂੰਨੀ ਮਾਨਤਾ ਦੇ ਦਿੱਤੀ ਹੈ। ਨਵੇਂ ਟਰਾਂਸਪੋਰਟ ਕਾਨੂੰਨਾਂ ਦੇ ਤਹਿਤ ਹੁਣ ਲੋਕ ਆਪਣੇ ਸਮਾਰਟਫੋਨ ਵਿੱਚ ਹੀ ਡਰਾਈਵਿੰਗ ਲਾਇਸੈਂਸ ਸੰਭਾਲ ਸਕਣਗੇ ਅਤੇ ਜ਼ਰੂਰਤ ਪੈਣ ‘ਤੇ ਡਿਜੀਟਲ ਰੂਪ ਵਿੱਚ ਦਿਖਾ ਸਕਣਗੇ। ਸਰਕਾਰ ਦੇ ਇਸ ਫੈਸਲੇ ਨਾਲ ਡਿਜੀਟਲ ਲਾਇਸੈਂਸ ਨੂੰ ਪਰੰਪਰਾਗਤ ਪਲਾਸਟਿਕ ਕਾਰਡ ਦੇ ਬਰਾਬਰ ਮਾਨਤਾ ਮਿਲੇਗੀ। ਸਿਸਟਮ ਪੂਰੀ ਤਰ੍ਹਾਂ ਲਾਗੂ ਹੋਣ ਮਗਰੋਂ ਡਰਾਈਵਰਾਂ ਨੂੰ ਹਰ ਵੇਲੇ ਫਿਜ਼ਿਕਲ ਲਾਇਸੈਂਸ ਨਾਲ ਰੱਖਣ ਦੀ ਲੋੜ ਨਹੀਂ ਰਹੇਗੀ। ਮਨਜ਼ੂਰਸ਼ੁਦਾ ਮੋਬਾਈਲ ਐਪ ਜਾਂ ਪਲੇਟਫਾਰਮ ਰਾਹੀਂ ਲਾਇਸੈਂਸ ਦੀ ਵਰਤੋਂ ਕੀਤੀ ਜਾ ਸਕੇਗੀ।
ਅਧਿਕਾਰੀਆਂ ਮੁਤਾਬਿਕ ਇਸ ਪਹਲ ਦਾ ਮਕਸਦ ਸਰਕਾਰੀ ਸੇਵਾਵਾਂ ਨੂੰ ਡਿਜੀਟਲ ਅਤੇ ਲੋਕ-ਦੋਸਤ ਬਣਾਉਣਾ ਹੈ। ਮੌਜੂਦਾ ਸਮੇਂ ਵਿੱਚ ਜ਼ਿਆਦਾਤਰ ਲੋਕ ਬੈਂਕਿੰਗ, ਭੁਗਤਾਨ ਅਤੇ ਹੋਰ ਪਛਾਣ ਸਬੰਧੀ ਕੰਮਾਂ ਲਈ ਸਮਾਰਟਫੋਨ ਦੀ ਵਰਤੋਂ ਕਰਦੇ ਹਨ, ਜਿਸ ਕਾਰਨ ਇਹ ਬਦਲਾਅ ਸਮੇਂ ਦੀ ਲੋੜ ਮੰਨਿਆ ਜਾ ਰਿਹਾ ਹੈ।
ਹਾਲਾਂਕਿ ਸਰਕਾਰ ਨੇ ਇਹ ਵੀ ਸਪਸ਼ਟ ਕੀਤਾ ਹੈ ਕਿ ਫਿਜ਼ਿਕਲ ਡਰਾਈਵਿੰਗ ਲਾਇਸੈਂਸ ਜਾਰੀ ਰਹਿਣਗੇ ਅਤੇ ਜੋ ਲੋਕ ਕਾਰਡ ਰੂਪ ਵਿੱਚ ਲਾਇਸੈਂਸ ਵਰਤਣਾ ਚਾਹੁੰਦੇ ਹਨ, ਉਹ ਪਹਿਲਾਂ ਵਾਂਗ ਇਸਦੀ ਵਰਤੋਂ ਕਰ ਸਕਣਗੇ। ਹੁਣ ਸੰਬੰਧਿਤ ਏਜੰਸੀਆਂ ਡਿਜੀਟਲ ਲਾਇਸੈਂਸ ਸਿਸਟਮ ਦੀ ਕਾਰਗੁਜ਼ਾਰੀ ਅਤੇ ਸੁਰੱਖਿਆ ਨੂੰ ਲੈ ਕੇ ਵਿਸਥਾਰ ਨਾਲ ਕੰਮ ਕਰਨਗੀਆਂ।