ਨਿਊਜ਼ੀਲੈਂਡ ਵਿੱਚ ਡੀਜ਼ਲ ਦੀ ਉਪਲਬਧਤਾ ਘਟ ਕੇ ਲਗਭਗ 17 ਦਿਨਾਂ ਦੇ ਨੇੜੇ ਰਹਿ ਗਈ ਹੈ, ਜਿਸ ਨਾਲ ਚਿੰਤਾ ਜ਼ਰੂਰ ਵਧੀ ਹੈ, ਪਰ ਸਰਕਾਰ ਨੇ ਭਰੋਸਾ ਦਿਵਾਇਆ ਹੈ ਕਿ ਸਥਿਤੀ ਪੂਰੀ ਤਰ੍ਹਾਂ ਕੰਟਰੋਲ ਵਿੱਚ ਹੈ। ਤਾਜ਼ਾ ਜਾਣਕਾਰੀ ਮੁਤਾਬਕ, ਦੇਸ਼ ਦੇ ਅੰਦਰ ਮੌਜੂਦ ਡੀਜ਼ਲ ਸਟਾਕ ਵਿੱਚ ਹਾਲੀਆ ਦਿਨਾਂ ਦੌਰਾਨ ਕਮੀ ਦਰਜ ਕੀਤੀ ਗਈ ਹੈ।
ਸਰਕਾਰੀ ਅੰਕੜਿਆਂ ਅਨੁਸਾਰ, ਕੁਝ ਦਿਨ ਪਹਿਲਾਂ ਤੱਕ ਡੀਜ਼ਲ ਦਾ ਸਟਾਕ 21 ਦਿਨਾਂ ਤੋਂ ਵੱਧ ਸੀ, ਜੋ ਹੁਣ ਘਟ ਗਿਆ ਹੈ। ਹਾਲਾਂਕਿ, ਜੇ ਸਮੁੰਦਰ ਰਾਹੀਂ ਆ ਰਹੀ ਸਪਲਾਈ ਨੂੰ ਵੀ ਜੋੜਿਆ ਜਾਵੇ ਤਾਂ ਕੁੱਲ ਸਟਾਕ ਕਾਫੀ ਵੱਧ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਹਾਲਾਤ ਸਥਿਰ ਰਹਿਣ ਦੀ ਸੰਭਾਵਨਾ ਹੈ।
ਪੈਟਰੋਲ ਅਤੇ ਜੈੱਟ ਫਿਊਲ ਦੇ ਸਟਾਕ ਵੀ ਮੌਜੂਦ ਹਨ, ਜਿਸ ਨਾਲ ਦੇਸ਼ ਦੀ ਕੁੱਲ ਫਿਊਲ ਸਪਲਾਈ ‘ਤੇ ਤੁਰੰਤ ਕੋਈ ਵੱਡਾ ਅਸਰ ਨਹੀਂ ਪੈਣ ਦੀ ਉਮੀਦ ਹੈ। ਕੁਝ ਫਿਊਲ ਜਹਾਜ਼ਾਂ ਰਾਹੀਂ ਰਸਤੇ ਵਿੱਚ ਹੈ, ਜੋ ਜਲਦੀ ਹੀ ਪਹੁੰਚੇਗਾ।
ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਸਥਿਤੀ ਆਮ ਹਾਲਾਤਾਂ ਦੇ ਅੰਦਰ ਹੈ ਅਤੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ। ਹਾਲਾਂਕਿ, ਵਿਸ਼ਵ ਪੱਧਰ ‘ਤੇ ਚੱਲ ਰਹੀਆਂ ਤਣਾਅਪੂਰਨ ਸਥਿਤੀਆਂ, ਖ਼ਾਸ ਕਰਕੇ ਮੱਧ ਪੂਰਬ ਦੇ ਸੰਘਰਸ਼, ਫਿਊਲ ਸਪਲਾਈ ‘ਤੇ ਅਸਰ ਪਾ ਰਹੀਆਂ ਹਨ।