ਨਿਊਜ਼ੀਲੈਂਡ ਸਰਕਾਰ ਨੇ ਨੈਸ਼ਨਲ ਫਿਊਲ ਪਲਾਨ ਜਾਰੀ ਕਰਦਿਆਂ ਦੱਸਿਆ ਹੈ ਕਿ ਜੇ ਭਵਿੱਖ ਵਿੱਚ ਫਿਊਲ ਦੀ ਘਾਟ ਪੈ ਜਾਂਦੀ ਹੈ ਤਾਂ ਦੇਸ਼ ਕਿਵੇਂ ਇਸ ਸਥਿਤੀ ਨਾਲ ਨਜਿੱਠੇਗਾ। ਇਹ ਯੋਜਨਾ ਕੋਵਿਡ ਅਲਰਟ ਲੈਵਲਾਂ ਦੀ ਤਰ੍ਹਾਂ ਚਾਰ ਪੜਾਅ ਵਿੱਚ ਵੰਡੀਂ ਗਈ ਹੈ ਅਤੇ ਇਸ ਵੇਲੇ ਦੇਸ਼ ਪਹਿਲੇ ਪੜਾਅ ਵਿੱਚ ਹੈ, ਜਿਸਦਾ ਮਤਲਬ ਹੈ ਕਿ ਸਥਿਤੀ ਕਾਬੂ ਵਿੱਚ ਹੈ।ਦੂਜੇ ਪੜਾਅ ਵਿੱਚ ਲੋਕਾਂ, ਕਾਰੋਬਾਰਾਂ ਅਤੇ ਸਰਕਾਰੀ ਸੰਸਥਾਵਾਂ ਨੂੰ ਫਿਊਲ ਬਚਾਉਣ ਲਈ ਪ੍ਰੇਰਿਤ ਕੀਤਾ ਜਾਵੇਗਾ। ਜੇ ਹਾਲਾਤ ਹੋਰ ਗੰਭੀਰ ਹੋ ਜਾਂਦੇ ਹਨ ਤਾਂ ਤੀਜੇ ਪੜਾਅ ਵਿੱਚ ਐਮਰਜੈਂਸੀ ਅਤੇ ਜ਼ਰੂਰੀ ਸੇਵਾਵਾਂ ਨੂੰ ਫਿਊਲ ਵਿੱਚ ਪਹਿਲ ਦਿੱਤੀ ਜਾਵੇਗੀ। ਚੌਥੇ ਪੜਾਅ ਵਿੱਚ ਫਿਊਲ ਦੀ ਵੰਡ ‘ਤੇ ਸਖ਼ਤ ਪਾਬੰਦੀਆਂ ਲਗਾਈਆਂ ਜਾ ਸਕਦੀਆਂ ਹਨ।
ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਨੇ ਕਿਹਾ ਕਿ ਇਸ ਵੇਲੇ ਕਿਸੇ ਵੀ ਕਿਸਮ ਦੀ ਰੇਸ਼ਨਿੰਗ ਦੀ ਲੋੜ ਨਹੀਂ ਹੈ, ਪਰ ਸਰਕਾਰ ਅਗਾਊਂ ਤਿਆਰੀ ਕਰ ਰਹੀ ਹੈ ਤਾਂ ਜੋ ਗਲੋਬਲ ਸੰਕਟ ਦਾ ਸਮੇਂ ‘ਤੇ ਮੁਕਾਬਲਾ ਕੀਤਾ ਜਾ ਸਕੇ। ਉਨ੍ਹਾਂ ਮੁਤਾਬਕ ਦੇਸ਼ ਦੀ ਆਰਥਿਕਤਾ ਅਤੇ ਲੋਕਾਂ ਦੀਆਂ ਜ਼ਰੂਰਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਫਿਊਲ ਦੀ ਉਪਲਬਧਤਾ ਯਕੀਨੀ ਬਣਾਉਣਾ ਸਭ ਤੋਂ ਮਹੱਤਵਪੂਰਨ ਹੈ।
ਫਿਊਲ ਸੁਰੱਖਿਆ ਮੰਤਰੀ ਸ਼ੇਨ ਜੋਨਜ਼ ਨੇ ਦੱਸਿਆ ਕਿ ਇਹ ਯੋਜਨਾ ਫਿਊਲ ਕੰਪਨੀਆਂ ਦੇ ਸਹਿਯੋਗ ਨਾਲ ਤਿਆਰ ਕੀਤੀ ਗਈ ਹੈ। ਹਾਲਾਂਕਿ ਇਸ ਸਮੇਂ ਦੇਸ਼ ਕੋਲ ਕਾਫੀ ਫਿਊਲ ਮੌਜੂਦ ਹੈ, ਪਰ ਭਵਿੱਖ ਵਿੱਚ ਸਪਲਾਈ ਵਿੱਚ ਰੁਕਾਵਟ ਆ ਸਕਦੀ ਹੈ, ਇਸ ਲਈ ਇਹ ਯੋਜਨਾ ਬਣਾਈ ਗਈ ਹੈ। ਸਰਕਾਰ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਇਹ ਯੋਜਨਾ ਜ਼ਰੂਰੀ ਸੇਵਾਵਾਂ ਨੂੰ ਫਿਊਲ ਦੀ ਲਗਾਤਾਰ ਸਪਲਾਈ ਯਕੀਨੀ ਬਣਾਉਣ ਲਈ ਹੈ ਅਤੇ ਸਖ਼ਤ ਕਦਮ ਸਿਰਫ਼ ਲੋੜ ਪੈਣ ‘ਤੇ ਹੀ ਲਏ ਜਾਣਗੇ।