ਮੈਨੁਰੇਵਾ ‘ਚ ਨਗਰ ਕੀਰਤਨ ਦੌਰਾਨ Brian Tamaki ਨਾਲ ਜੁੜੇ ਗਰੁੱਪ ਵੱਲੋਂ ਰਸਤੇ ‘ਚ ਆ ਕਿ ਹੰਗਾਮਾ ਕਰਨ ਦੇ ਮਾਮਲੇ ‘ਚ NZ ਦੇ ਸੰਸਦਾਂ ਦਾ ਲਗਾਤਾਰ ਸਿੱਖ ਭਾਈਚਾਰੇ ਨੂੰ ਸਮਰਥਨ ਮਿਲ ਰਿਹਾ ਹੈ। ਨੈਸ਼ਨਲ ਪਾਰਟੀ ਦੀ MP ਰੀਮਾ ਨਖਲੇ, ਕੌਂਸਲਰ Daniel Newman ਨੇ ਅਤੇ Free Speech Union ਤੋਂ ਬਾਅਦ ਹੁਣ ਔਰੀਨੀ ਕਾਇਪਾਰਾ MP, ਤਾਮਾਕੀ ਮਾਕੌਰਾਉ ਨੇ ਵੀ ਭਾਈਚਾਰੇ ਦਾ ਪੱਖ ਪੂਰਿਆਂ ਹੈ। ਦੱਸ ਦੇਈਏ ਉਸ ਸਮੇਂ ਮਾਹੌਲ ਵੀ ਤਣਾਅਪੂਰਨ ਬਣ ਗਿਆ ਸੀ। ਆਹਮੋ ਸਾਹਮਣੇ ਵਾਲੀ ਸਥਿੱਤੀ ਵੀ ਬਣ ਗਈ ਸੀ ਜਿਸ ਮਗਰੋਂ ਪੁਲਿਸ ਨੇ ਆਕੇ ਮੌਕਾ ਸੰਭਾਲਿਆ ਸੀ। “True Patriots of NZ” ਨਾਮਕ ਗਰੁੱਪ ਦੇ ਮੈਂਬਰਾਂ ਨੇ “This is New Zealand, not India” ਲਿਖੇ ਬੈਨਰ ਨਾਲ ਸ਼ਾਂਤਮਈ ਢੰਗ ਨਾਲ ਸਜਾਏ ਗਏ ਨਗਰ ਕੀਰਤਨ ਦਾ ਵਿਰੋਧ ਕੀਤਾ ਸੀ, ਇਸ ਦੌਰਾਨ ਹਾਕਾ ਨਾਚ ਕੀਤਾ ਗਿਆ ਸੀ ਅਤੇ “One true God” ਵਰਗੇ ਨਾਅਰੇ ਲਗਾਏ, ਜਦਕਿ ਪੁਲਿਸ ਨੇ ਦੋਹਾਂ ਪੱਖਾਂ ਨੂੰ ਵੱਖ ਰੱਖਿਆ ਸੀ।
ਔਰੀਨੀ ਕਾਇਪਾਰਾ MP ਨੇ ਆਪਣੇ ਇੱਕ ਬਿਆਨ ‘ਚ ਕਿਹਾ ਕਿ, ਤਮਾਕੀ ਮਾਕੌਰਾਉ ਦੀ MP ਹੋਣ ਦੇ ਨਾਤੇ, ਮੈਂ “ਟਰੂ ਪੈਟ੍ਰਿਓਟਸ” ਨਾਂ ਦੀ ਟੋਲੀ ਵੱਲੋਂ ਕੀਤੀ ਗਈ ਕਾਰਵਾਈ ਦੀ ਸਭ ਤੋਂ ਸਖਤ ਨਿੰਦਾ ਕਰਦੀ ਹਾਂ। ਇਹ ਟੋਲੀ ਬ੍ਰਾਇਨ ਤਾਮਾਕੀ ਅਤੇ ਡੈਸਟਿਨੀ ਚਰਚ ਨਾਲ ਜੁੜੀ ਹੋਈ ਹੈ ਅਤੇ ਦੱਖਣੀ ਆਕਲੈਂਡ ਵਿੱਚ ਸਿੱਖ ਭਾਈਚਾਰੇ ਨਾਲ ਹੋਈ ਉਨ੍ਹਾਂ ਦੀ ਟੱਕਰ ਦਾ ਮਕਸਦ ਉਕਸਾਉਣਾ, ਡਰਾਉਣਾ ਅਤੇ ਖੌਫ਼ ਪੈਦਾ ਕਰਨਾ ਸੀ। ਮਾਨੁਰੇਵਾ ਵਿੱਚ ਜੋ ਕੁਝ ਹੋਇਆ, ਉਹ “ਸ਼ਾਂਤਮਈ ਪ੍ਰਦਰਸ਼ਨ” ਨਹੀਂ ਸੀ। ਉਹ ਨਿਸ਼ਾਨਾਬੱਧ ਤਰੀਕੇ ਨਾਲ ਇੱਕ ਸਾਜਿਸ਼ ਸੀ, ਜਿਸ ਵਿੱਚ ਸਭਿਆਚਾਰ, ਪਹਿਚਾਣ ਅਤੇ ਜਨਤਕ ਥਾਵਾਂ ਨੂੰ ਹਥਿਆਰ ਬਣਾ ਕੇ ਨਿਊਜੀਲੈਂਡ ਵਾਸੀ ਹੋਣ ਦਾ ਵਾਸਤਾ ਦੇਕੇ ਸਿੱਖ ਨਗਰ ਕੀਰਤਨ ਵਿੱਚ ਰੁਕਾਵਟ ਪਾਉਣ ਦੀ ਕੋਸ਼ਿਸ਼ ਕੀਤੀ ਗਈ, ਇਹ ਉੁਹ ਸਿੱਖ ਹਨ ਜੋ ਸਾਡੇ ਨਿਊਜੀਲੈਂਡ ਦੇ ਪਰਿਵਾਰ ਦਾ ਅਨਿਖੜਵਾਂ ਅੰਗ ਹਨ। ਇਸ ਮਸਲੇ ਵਿੱਚ ਹਾਕਾ ਦੀ ਗਲਤ ਵਰਤੋਂ ਬਹੁਤ ਹੀ ਅਪਮਾਨਜਨਕ ਹੈ। ਹਾਕਾ ਕਿਸੇ ਨੂੰ ਡਰਾਉਣ ਜਾਂ ਪਰੇਸ਼ਾਨ ਕਰਨ ਲਈ ਰਾਜਨੀਤਿਕ ਹਥਿਆਰ ਨਹੀਂ ਹੈ। ਇਹ ਸਾਡੀ ਵਿਰਾਸਤ (ਤਾਓਂਗਾ ਤੁਕੂ ਇਹੋ) ਹੈ, ਜੋ ਸਾਨੂੰ ਸਾਡੇ ਪੁਰਖਿਆਂ (ਤੀਪੁਨਾ) ਵੱਲੋਂ ਸੌਂਪੀ ਗਈ ਹੈ, ਅਤੇ ਜੋ ਵੰਸ਼ਾਵਲੀ, ਉਦੇਸ਼ ਅਤੇ ਆਤਮਿਕਤਾ (ਵਾਇਰੂਆ) ਵਿੱਚ ਜੜੀ ਹੋਈ ਹੈ। ਸੜਕਾਂ ‘ਤੇ ਹਾਕਾ ਨੂੰ ਧਮਕੀ ਵਜੋਂ ਵਰਤਿਆ ਜਾਣਾ — ਜਦਕਿ ਮੇਰੇ ਸਹਿਯੋਗੀਆਂ ਨੂੰ ਸੰਸਦ ਵਿੱਚ ਸੱਚੀ ਨੀਅਤ ਅਤੇ ਮਰਿਆਦਾ ਨਾਲ ਹਾਕਾ ਕਰਨ ਲਈ ਬੇਮਿਸਾਲ ਸਜ਼ਾ ਦਿੱਤੀ ਗਈ — ਇਕ ਦਰਦਨਾਕ ਦੋਹਰਾ ਮਾਪਦੰਡ ਦਿਖਾਉਂਦਾ ਹੈ। ਲੱਗਦਾ ਹੈ ਕਿ ਟਿਕਾਂਗਾ (ਰਿਵਾਇਤਾਂ) ਓਦੋਂ ਹੀ ਕਬੂਲ ਹੈ ਜਦੋਂ ਉਹ ਤਾਕਤਵਰਾਂ ਦੀ ਸੇਵਾ ਕਰੇ, ਪਰ ਜਦੋਂ ਉਹ ਤਾਕਤ ਨੂੰ ਸਵਾਲਾਂ ‘ਚ ਲਿਆਵੇ ਤਾਂ ਉਸਨੂੰ ਸਜ਼ਾ ਮਿਲਦੀ ਹੈ।
ਸਭ ਤੋਂ ਵੱਧ ਚਿੰਤਾ ਦੀ ਗੱਲ ਇਹ ਹੈ: ਸਿੱਖ ਭਾਈਚਾਰਾ ਸਾਡੀ ਧਰਤੀ ‘ਤੇ ਮਹਿਮਾਨ (ਮਾਨੁਹਿਰੀ) ਹੈ — ਉਹ ਲੋਕ ਜੋ ਇੱਥੇ ਰਹਿੰਦੇ ਹਨ, ਆਪਣੇ ਬੱਚੇ ਪਾਲਦੇ ਹਨ, ਇੱਥੇ ਕੰਮ ਕਰਦੇ ਹਨ ਅਤੇ ਸਮਾਜ ਦੀ ਸੇਵਾ ਕਰਦੇ ਹਨ। ਦਹਾਕਿਆਂ ਤੋਂ ਉਹ ਬਹੁਤ ਸਾਰੇ ਮਾਓਰੀ ਲੋਕਾਂ ਨਾਲ ਖੜੇ ਰਹੇ ਹਨ, ਸਾਡੀਆਂ ਰਿਵਾਇਤਾਂ ਅਤੇ ਮੁੱਲਾਂ ਨੂੰ ਮਜ਼ਬੂਤ ਕੀਤਾ ਹੈ ਅਤੇ ਮੁਸ਼ਕਲ ਸਮਿਆਂ ਵਿੱਚ ਸਾਡੇ ਮੋਢੇ ਨਾਲ ਮੋਢਾ ਜੋੜਕੇ ਖੜੇ ਰਹੇ ਹਨ। ਤਾਂਗਾਤਾ ਵੇਨੁਆ (ਮੂਲ ਨਿਵਾਸੀ) ਹੋਣ ਦੇ ਨਾਤੇ, ਸਾਡੀ ਪਵਿੱਤਰ ਜ਼ਿੰਮੇਵਾਰੀ ਹੈ ਕਿ ਅਸੀਂ ਮਹਿਮਾਨਾਂ ਦੀ ਸਤਕਾਰ (ਮਨਾਕੀ ਮਾਨੁਹਿਰੀ) ਦੀ ਆਪਣੀ ਰਿਵਾਇਤ ਨਿਭਾਈਏ। ਇਹ ਕਾਨੂੰਨ ਤੋਂ ਪਹਿਲਾਂ ਦਾ ਕਾਨੂੰਨ ਹੈ। ਇਹ ਘਟਨਾ ਉਸ ਤੋਂ ਬਾਅਦ ਵਾਪਰੀ ਹੈ ਜਦੋਂ ਇਸੇ ਟੋਲੀ ਨੇ ਮੇਰੇ ਆਪਣੇ ਪਿਆਰੇ ਇਲਾਕੇ ਟੇ ਅਤਾਤੂ ਪੈਨਿਨਸੁਲਾ ਵਿੱਚ ਹੱਦ ਤੋਂ ਵੱਧ ਕੇ ਸਾਡੇ ਤਾਕਾਤਾਪੁਈ (LGBTQ+) ਭਾਈਚਾਰੇ ਨੂੰ ਚੋਟ ਪਹੁੰਚਾਈ। ਮੈਂ ਹੁਣ ਇਸ ਸਭ ਤੋਂ ਬਹੁਤ ਅੱਗੇ ਨਿਕਲ ਚੁੱਕੀ ਹਾਂ। ਏ ਹੋਕੀ ਕੋਉਤੌ ਕਿਓ ਓ ਕੋਉਤੌ ਮਰਾਏ, ਮਾਓਰੀ ਮਾ — ਹੇ ਮਾਓਰੀ ਭਰਾਵੋ, ਆਪਣੇ ਮਰਾਏ ਵਾਪਸ ਜਾਓ। ਤੁਹਾਡੇ ਪੁਰਖੇ ਤੁਹਾਡੀ ਉਡੀਕ ਕਰ ਰਹੇ ਹਨ ਕਿ ਤੁਸੀਂ ਆਪਣੀ ਜੜਾਂ ਵੱਲ ਮੁੜੋ, ਆਪਣੇ ਦਿਲ (ਨਗਾਕਾਉ) ਨੂੰ ਸਹੀ ਕਰੋ ਅਤੇ ਆਪਣੀ ਆਤਮਾ (ਵਾਇਰੂਆ) ਨੂੰ ਸੱਚੇ ਮਾਓਰੀ ਸੰਸਾਰ ਨਾਲ ਦੁਬਾਰਾ ਜੋੜੋ — ਨਾ ਕਿ ਉਸ ਬਣਾਵਟੀ ਸੰਸਾਰ ਨਾਲ ਜੋ “ਮਾਤੂਆ ਬ੍ਰਾਇਨ” ਘੜ ਰਿਹਾ ਹੈ। ਸਾਡੇ ਆਪਣੇ ਲੋਕਾਂ ਜਾਂ ਖ਼ਾਸ ਕਰਕੇ ਸਾਡੇ ਮਹਿਮਾਨਾਂ ਖ਼ਿਲਾਫ਼ ਨਫ਼ਰਤ ਭੜਕਾਉਣਾ ਸਿਰਫ਼ ਨੈਤਿਕ ਤੌਰ ‘ਤੇ ਗਲਤ ਨਹੀਂ — ਇਹ ਮਾਓਰੀ ਰਿਵਾਇਤਾਂ ਦੀ ਉਲੰਘਣਾ ਹੈ। ਮੈਂ ਚੁੱਪ ਨਹੀਂ ਰਹਾਂਗੀ ਜਦੋਂ ਡਰਾਊਣ ਨੂੰ “ਦੇਸ਼ਭਗਤੀ” ਦੇ ਨਾਂ ‘ਚ ਪੇਸ਼ ਕੀਤਾ ਜਾਵੇ। ਮੈਂ ਚੁੱਪ ਨਹੀਂ ਰਹਾਂਗੀ ਜਦੋਂ ਮਾਓਰੀ ਵਿਰਾਸਤ ਨੂੰ ਵੰਡ ਪੈਦਾ ਕਰਨ ਲਈ ਗਲਤ ਤਰੀਕੇ ਨਾਲ ਵਰਤਿਆ ਜਾਵੇ। ਅਤੇ ਮੈਂ ਆਪਣੇ ਦੋਸਤਾਂ, ਗੁਆਂਢੀਆਂ ਜਾਂ ਆਪਣੇ ਹੀ ਲੋਕਾਂ ਖ਼ਿਲਾਫ਼ ਨਫ਼ਰਤ ਨੂੰ ਬਰਦਾਸ਼ਤ ਨਹੀਂ ਕਰਾਂਗੀ। ਜੋ ਆਪਣੇ ਆਪ ਨੂੰ ਤੇ ਆਓ ਮਾਓਰੀ ਦਾ ਨੁਮਾਇੰਦਾ ਦੱਸਦੇ ਹਨ ਜਾਂ ਸਾਡੀ ਸਭਿਆਚਾਰ ਨੂੰ ਗਲਤ ਮਕਸਦ ਲਈ ਵਰਤਦੇ ਹਨ — ਮੈਂ ਉਨ੍ਹਾਂ ਨੂੰ ਜ਼ਰੂਰ ਸਵਾਲਾਂ ‘ਚ ਲਿਆਵਾਂਗੀ। ਵਖਾਮੁਤੁਆ ਅਤੂ! (ਇਹ ਤੁਰੰਤ ਰੁਕਣਾ ਚਾਹੀਦਾ ਹੈ!) ਸਾਡੇ ਸਿੱਖ ਭਰਾਵੋ ਅਤੇ ਭੈਣੋ: ਅਸੀਂ ਤੁਹਾਨੂੰ ਵੇਖਦੇ ਹਾਂ। ਅਸੀਂ ਤੁਹਾਡੇ ਨਾਲ ਖੜੇ ਹਾਂ। ਅਤੇ ਅਸੀਂ ਤੁਹਾਡੇ ਸ਼ਾਂਤੀ ਨਾਲ ਇੱਥੇ ਰਹਿਣ ਦੇ ਅਧਿਕਾਰ ਦੀ ਰੱਖਿਆ ਕਰਾਂਗੇ।
ਤਾਮਾਕੀ ਮਾਕੌਰਾਉ ਇੱਕ ਐਸਾ ਸ਼ਹਿਰ ਹੈ ਜੋ ਵੰਸ਼ਾਵਲੀ, ਹਿਜਰਤ ਅਤੇ ਸਾਂਝੇ ਭਵਿੱਖਾਂ ‘ਤੇ ਬਣਿਆ ਹੈ। ਇੱਥੇ ਨਫ਼ਰਤ ਲਈ ਕੋਈ ਥਾਂ ਨਹੀਂ। ਇੱਥੇ ਇਜ਼ਤ (ਮਾਨਾ), ਪਿਆਰ (ਅਰੋਹਾ) ਅਤੇ ਇਕੱਠੇ ਹੋ ਕੇ ਸਹੀ ਕੰਮ ਕਰਨ ਲਈ ਪੂਰੀ ਥਾਂ ਹੈ। ਸੱਚ ‘ਤੇ ਡਟੇ ਰਹੋ। ਪਿਆਰ ‘ਤੇ ਡਟੇ ਰਹੋ। ਮਨੁੱਖੀ ਮਰਿਆਦਾ ‘ਤੇ ਡਟੇ ਰਹੋ।