ਨਿਊਜ਼ੀਲੈਂਡ ਦੇ ਸਕੂਲਾਂ ਵਿੱਚ 5 ਸਾਲ ਦੇ ਬੱਚਿਆਂ ਲਈ ਕਰਵਾਏ ਗਏ ਨਵੇਂ phonics test ਦੇ ਨਤੀਜਿਆਂ ਨੇ ਸਿੱਖਿਆ ਪ੍ਰਣਾਲੀ ਲਈ ਚਿੰਤਾ ਵਧਾ ਦਿੱਤੀ ਹੈ। ਸਿੱਖਿਆ ਮੰਤਰਾਲੇ ਵੱਲੋਂ ਜਾਰੀ ਅੰਕੜਿਆਂ ਅਨੁਸਾਰ, ਸਕੂਲ ਦਾ ਪਹਿਲਾ ਪੂਰਾ ਸਾਲ ਮੁਕੰਮਲ ਕਰਨ ਵਾਲੇ ਬੱਚਿਆਂ ਵਿੱਚੋਂ ਅੱਧੇ ਤੋਂ ਵੀ ਘੱਟ ਬੱਚੇ ਇਸ ਟੈਸਟ ਵਿੱਚ ਉਮੀਦਾਂ ’ਤੇ ਖਰੇ ਉਤਰ ਸਕੇ। 2025 ਦੇ ਅੰਤ ਵਿੱਚ 40-week phonics check ਦੇਣ ਵਾਲੇ 4209 ਵਿਦਿਆਰਥੀਆਂ ਵਿੱਚੋਂ ਸਿਰਫ 47 ਫੀਸਦੀ ਬੱਚਿਆਂ ਨੇ ਹੀ ਲੋੜੀਂਦਾ ਮਿਆਰ ਪੂਰਾ ਕੀਤਾ। ਜਦਕਿ ਸਮਾਜਿਕ ਅਤੇ ਆਰਥਿਕ ਤੌਰ ’ਤੇ ਪਿੱਛੜੇ ਇਲਾਕਿਆਂ ਦੇ ਸਕੂਲਾਂ ਵਿੱਚ ਇਹ ਦਰ ਘਟ ਕੇ ਕੇਵਲ 25 ਫੀਸਦੀ ਰਹਿ ਗਈ।
ਟੈਸਟ ਦੌਰਾਨ ਬੱਚਿਆਂ ਨੂੰ 40 ਸ਼ਬਦ ਪੜ੍ਹਨ ਲਈ ਦਿੱਤੇ ਗਏ, ਜਿਨ੍ਹਾਂ ਵਿੱਚ ਅਸਲੀ ਅਤੇ ਬਣਾਵਟੀ ਦੋਵੇਂ ਤਰ੍ਹਾਂ ਦੇ ਸ਼ਬਦ ਸ਼ਾਮਿਲ ਸਨ। ਜਿਨ੍ਹਾਂ ਬੱਚਿਆਂ ਨੇ ਘੱਟੋ-ਘੱਟ 24 ਸ਼ਬਦ ਸਹੀ ਪੜ੍ਹੇ, ਉਨ੍ਹਾਂ ਨੂੰ phonics ਅਤੇ decoding skills ਵਿੱਚ ਉਮੀਦਾਂ ਦੇ ਅਨੁਸਾਰ ਮੰਨਿਆ ਗਿਆ।
ਰਿਪੋਰਟ ਮੁਤਾਬਕ 27 ਫੀਸਦੀ ਬੱਚਿਆਂ ਨੂੰ ਹੋਰ ਵਧੇਰੇ ਸਹਾਇਤਾ ਦੀ ਲੋੜ ਮਹਿਸੂਸ ਹੋਈ। ਇਹ ਵੀ ਸਾਹਮਣੇ ਆਇਆ ਕਿ phonics checks ਪਿਛਲੇ ਸਾਲ ਕੁਝ ਸਕੂਲਾਂ ਵਿੱਚ ਹੀ ਵਰਤੇ ਗਏ ਸਨ, ਪਰ ਇਸ ਸਾਲ ਤੋਂ ਇਹ ਸਾਰੇ primary schools ਵਿੱਚ ਲਾਜ਼ਮੀ ਕਰ ਦਿੱਤੇ ਗਏ ਹਨ।
ਕੈਂਟਰਬਰੀ ਯੂਨੀਵਰਸਿਟੀ ਦੀ education professor ਗੇਲ ਗਿਲਨ ਨੇ ਕਿਹਾ ਕਿ ਨਤੀਜਿਆਂ ਵਿੱਚ ਸੁਧਾਰ ਲਈ structured literacy teaching ਨੂੰ ਹੋਰ ਮਜ਼ਬੂਤ ਕਰਨ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਸ਼ੁਰੂਆਤੀ ਸਾਲਾਂ ਵਿੱਚ ਸਹੀ ਸਿਖਲਾਈ ਨਾਲ ਆਉਣ ਵਾਲੇ ਸਮੇਂ ਵਿੱਚ ਬੱਚਿਆਂ ਦੀ ਪੜ੍ਹਨ ਸਮਰੱਥਾ ਵਿੱਚ ਵੱਡਾ ਸੁਧਾਰ ਆ ਸਕਦਾ ਹੈ। ਉਨ੍ਹਾਂ ਇਹ ਵੀ ਚੇਤਾਵਨੀ ਦਿੱਤੀ ਕਿ ਸਿਰਫ phonics ਉੱਤੇ ਹੀ ਧਿਆਨ ਕੇਂਦਰਿਤ ਕਰਨਾ ਕਾਫ਼ੀ ਨਹੀਂ, ਬਲਕਿ ਬੱਚਿਆਂ ਦੀ ਬੋਲਚਾਲ ਅਤੇ ਸੁਣਨ ਦੀ ਸਮਝ ਨੂੰ ਵੀ ਇੱਕੋ ਜਿਹਾ ਮਹੱਤਵ ਦੇਣਾ ਚਾਹੀਦਾ ਹੈ।
ਸਿੱਖਿਆ ਮੰਤਰਾਲੇ ਦਾ ਕਹਿਣਾ ਹੈ ਕਿ ਇਹ ਡਾਟਾ Year 1 ਦੇ ਬੱਚਿਆਂ ਦੀ ਪੜ੍ਹਾਈ ਦੀ ਹਕੀਕਤ ਨੂੰ ਸਪਸ਼ਟ ਤੌਰ ’ਤੇ ਦਰਸਾਉਂਦਾ ਹੈ ਅਤੇ ਇਸ ਨਾਲ ਉਹਨਾਂ ਵਿਦਿਆਰਥੀਆਂ ਦੀ ਪਛਾਣ ਕਰਨ ਵਿੱਚ ਮਦਦ ਮਿਲੇਗੀ ਜਿਨ੍ਹਾਂ ਨੂੰ ਸ਼ੁਰੂ ਤੋਂ ਹੀ ਵਧੇਰੇ ਮਦਦ ਦੀ ਲੋੜ ਹੈ।