ਪਿਛਲੇ ਹਫ਼ਤੇ ਦੇਸ਼ ਵਿੱਚ ਆਏ ਭਿਆਨਕ ਮੌਸਮ ਤੋਂ ਬਾਅਦ ਹੇਠਲੇ ਦੱਖਣ ਵਿੱਚ ਲਗਭਗ 5600 ਜਾਇਦਾਦਾਂ ਅਜੇ ਵੀ ਬਿਜਲੀ ਤੋਂ ਬਿਨਾਂ ਹਨ। ਪਾਵਰਨੈੱਟ ਦਾ ਕਹਿਣਾ ਹੈ ਕਿ ਸਾਊਥਲੈਂਡ ਵਿੱਚ 3900 ਗਾਹਕ ਅਤੇ ਸਾਊਥ ਓਟਾਗੋ ਵਿੱਚ 1700 ਗਾਹਕ ਬਿਜਲੀ ਤੋਂ ਬਿਨਾਂ ਗੁਜ਼ਾਰਾ ਕਰ ਰਹੇ ਹਨ। ਸਾਊਥਲੈਂਡ ਅਤੇ ਕਲੂਥਾ ਜ਼ਿਲ੍ਹੇ ਲਈ ਐਮਰਜੈਂਸੀ ਦੀ ਸਥਿਤੀ ਲਾਗੂ ਹੈ। ਕਲੂਥਾ ਜ਼ਿਲ੍ਹੇ ਦੇ ਜ਼ਿਆਦਾਤਰ ਹਿੱਸੇ ਲਈ ਪਾਣੀ ਉਬਾਲਣ ਦਾ ਨੋਟਿਸ ਵੀ ਲਾਗੂ ਹੈ। ਐਮਰਜੈਂਸੀ ਪ੍ਰਬੰਧਨ ਓਟਾਗੋ ਗਰੁੱਪ ਕੰਟਰੋਲਰ ਮੈਟ ਐਲੀ ਨੇ ਕਿਹਾ ਕਿ ਤਾਪਮਾਨ ਵਿੱਚ ਗਿਰਾਵਟ ਅਤੇ ਬਰਫ਼ਬਾਰੀ ਦੇ ਬਾਵਜੂਦ ਕਲੂਥਾ ਜ਼ਿਲ੍ਹੇ ਵਿੱਚ ਸੇਵਾਵਾਂ ਨੂੰ ਬਹਾਲ ਕਰਨ ਦੀ ਪ੍ਰਗਤੀ ਜਾਰੀ ਹੈ।
ਐਲੀ ਨੇ ਕਿਹਾ ਕਿ, “ਸੇਵਾਵਾਂ ਨੂੰ ਬਹਾਲ ਕਰਨ ਲਈ ਕਰਮਚਾਰੀ ਅਣਥੱਕ ਮਿਹਨਤ ਕਰ ਰਹੇ ਹਨ, ਹਾਲਾਂਕਿ, ਇਹ ਕੰਮ ਹੌਲੀ ਹੋਣ ਦੀ ਉਮੀਦ ਹੈ ਕਿਉਂਕਿ ਨੁਕਸਾਨ ਬਹੁਤ ਜ਼ਿਆਦਾ ਹੈ। ਇਹ ਅਜੇ ਵੀ ਬਿਜਲੀ ਤੋਂ ਬਿਨਾਂ ਰਹਿ ਰਹੇ ਲੋਕਾਂ ਲਈ ਇੱਕ ਮੁਸ਼ਕਿਲ ਸਮਾਂ ਹੈ। ਇਹ ਸੁਣ ਕੇ ਖੁਸ਼ੀ ਹੁੰਦੀ ਹੈ ਕਿ ਭਾਈਚਾਰੇ ਵਿੱਚ ਇੰਨੇ ਸਾਰੇ ਲੋਕ ਇੱਕ ਦੂਜੇ ਦਾ ਸਮਰਥਨ ਕਰਦੇ ਹਨ। ਲੋਕਾਂ ਦੀ ਸੁਰੱਖਿਆ ਅਤੇ ਜ਼ਰੂਰੀ ਸੇਵਾਵਾਂ ਦੀ ਬਹਾਲੀ ਸਾਡੀ ਤਰਜੀਹ ਬਣੀ ਹੋਈ ਹੈ। ਅਸੀਂ ਸਾਰਿਆਂ ਨੂੰ ਦੂਜਿਆਂ ਦੀ ਜਾਂਚ ਕਰਦੇ ਰਹਿਣ ਅਤੇ ਜਾਣਕਾਰੀ ਦੇਣ ਲਈ ਉਤਸ਼ਾਹਿਤ ਕਰਦੇ ਹਾਂ। ਲੋਕਾਂ ਦੀ ਮਦਦ ਲਈ ਸਹਾਇਤਾ ਸੇਵਾਵਾਂ, ਵਿੱਤੀ ਸਹਾਇਤਾ ਅਤੇ ਭਲਾਈ ਕੇਂਦਰ ਮੌਜੂਦ ਹਨ।”
ਬਿਜਲੀ ਦੀਆਂ ਲਾਈਨਾਂ ਡਿੱਗਣ ਕਾਰਨ ਕਲੂਥਾ ਜ਼ਿਲ੍ਹੇ ਦੀਆਂ ਬਹੁਤ ਸਾਰੀਆਂ ਸੜਕਾਂ ਬੰਦ ਹਨ ਹਾਲਾਂਕਿ, ਸਾਰੇ ਭਾਈਚਾਰਿਆਂ ਤੱਕ ਪਹੁੰਚ ਨੂੰ ਯਕੀਨੀ ਬਣਾਉਣ ਲਈ ਰਸਤੇ ਬਦਲ ਦਿੱਤੇ ਗਏ ਸਨ। ਮੰਗਲਵਾਰ ਨੂੰ ਸਾਊਥਲੈਂਡ ‘ਚ ਬਿਜਲੀ ਜਾਂ ਪਾਣੀ ਬੰਦ ਹੋਣ ਕਾਰਨ ਅੱਠ ਸਕੂਲ ਬੰਦ ਕਰ ਦਿੱਤੇ ਗਏ ਸਨ।