ਯੂਨੀਵਰਸਿਟੀ ਆਫ਼ ਦ ਸਾਊਥ ਪੈਸੀਫਿਕ ਦੇ ਵਾਈਸ-ਚਾਂਸਲਰ ਪ੍ਰੋਫੈਸਰ ਪਾਲ ਆਹਲੂਵਾਲੀਆ ਨਾਲ ਜੁੜੀ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ ਵਾਈਸ-ਚਾਂਸਲਰ ਅਗਲੇ ਮਹੀਨੇ ਦੀ ਪਹਿਲੀ ਤਾਰੀਖ ਨੂੰ ਆਪਣਾ ਕਾਰਜਕਾਲ ਸਮਾਪਤ ਕਰਨਗੇ ਯਾਨੀ ਕਿ ਪ੍ਰੋ. ਪਾਲ ਅਹਲੂਵਾਲੀਆ ਆਪਣਾ ਅਹੁਦਾ ਛੱਡਣਗੇ। ਇਸ ਗੱਲ ਦੀ ਪੁਸ਼ਟੀ ਯੂਐਸਪੀ ਨੇ ਅੱਜ ਸਵੇਰੇ ਜਾਰੀ ਇੱਕ ਪ੍ਰੈਸ ਬਿਆਨ ਵਿੱਚ ਕੀਤੀ ਹੈ। ਪ੍ਰੋਫੈਸਰ ਆਹਲੂਵਾਲੀਆ ਨੂੰ ਪਹਿਲੀ ਵਾਰ 2019 ਵਿੱਚ ਵਾਈਸ-ਚਾਂਸਲਰ ਨਿਯੁਕਤ ਕੀਤਾ ਗਿਆ ਸੀ। ਯੂਐਸਪੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਯੂਨੀਵਰਸਿਟੀ ਨੂੰ ਇੱਕ ਚੁਣੌਤੀਪੂਰਨ ਸਮੇਂ ਵਿੱਚੋਂ ਲੰਘਾਇਆ ਜਿਸ ਵਿੱਚ ਵਿਸ਼ਵਵਿਆਪੀ ਕੋਵਿਡ-19 ਮਹਾਂਮਾਰੀ ਵੀ ਸ਼ਾਮਿਲ ਸੀ, ਜਿਸ ਦੌਰਾਨ ਸੰਸਥਾ ਨੇ ਆਪਣੇ ਅਧਿਆਪਨ ਅਤੇ ਖੋਜ ਕਾਰਜਾਂ ਨੂੰ ਬਣਾਈ ਰੱਖਿਆ ਅਤੇ ਗੰਭੀਰ ਵਿੱਤੀ ਦਬਾਅ ਦੇ ਬਾਵਜੂਦ ਸਟਾਫ ਨੂੰ ਬਰਕਰਾਰ ਰੱਖਿਆ।
ਦੱਸ ਦੇਈਏ ਉਨ੍ਹਾਂ ਦੇ 6 ਸਾਲਾ ਦੌਰਾਨ ਕਈ ਵਾਰ ਵਿਵਾਦਾਂ ਨੇ ਵੀ ਜਨਮ ਲਿਆ ਸੀ। 2021 ਵਿੱਚ ਉਸ ਵੇਲੇ ਦੀ ਬੈਨਿਮਾਰਾਮਾ ਸਰਕਾਰ ਨਾਲ ਟਕਰਾਅ ਹੋਣ ਕਾਰਨ ਉਨ੍ਹਾਂ ਨੂੰ ਫਿਜੀ ਤੋਂ ਬਾਹਰ ਕੱਢ ਦਿੱਤਾ ਗਿਆ ਸੀ, ਕਿਉਂਕਿ ਉਨ੍ਹਾਂ ਨੇ ਸਰਕਾਰ ਨਾਲ ਜੁੜੇ ਕੁਝ ਆਗੂਆਂ ਦੀ ਨਿਯੁਕਤੀਆਂ ‘ਤੇ ਸਵਾਲ ਚੁੱਕੇ ਸਨ। ਇੱਕ ਸਥਾਨਕ ਰਿਪੋਰਟ ਅਨੁਸਾਰ ਉਨ੍ਹਾਂ ਨੇ ਫਿਰ ਕੁਝ ਸਮਾਂ ਲਈ ਨਾਉਰੂ ਅਤੇ ਸਮੋਆ ‘ਚ ਯੂਨੀਵਰਸਿਟੀ ਦੇ ਕੈਂਪਸਾਂ ਤੋਂ ਕੰਮ ਕੀਤਾ ਸੀ ਜਦੋ ਤੱਕ 2023 ਵਿੱਚ ਸਰਕਾਰ ਨਹੀਂ ਬਦਲੀ ਸੀ ਅਤੇ ਉਹ ਫਿਜੀ ਵਾਪਸ ਨਹੀਂ ਆਏ ਸੀ। ਹਾਲਾਂਕਿ ਵਾਪਸੀ ਤੋਂ ਬਾਅਦ ਵੀ ਉਨ੍ਹਾਂ ਦੇ ਸਟਾਫ਼ ਯੂਨੀਅਨ ਨਾਲ ਟਕਰਾਅ ਰਹੇ ਸਨ। ਹਾਲਾਂਕਿ ਹੁਣ ਉਨ੍ਹਾਂ ਦੇ ਵੱਲੋਂ ਇਹ ਫੈਸਲਾ ਕਿਉਂ ਲਿਆ ਗਿਆ ਹੈ ਇਸ ਬਾਰੇ ਕੋਈ ਜਿਆਦਾ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।