ਦੱਖਣੀ ਆਕਲੈਂਡ ਦੇ ਟਾਕਾਨਿਨੀ ਇਲਾਕੇ ਵਿੱਚ ਘੋੜਿਆਂ ਦੀ ਟ੍ਰੇਨਿੰਗ ਨਾਲ ਜੁੜੇ ਇੱਕ ਕਾਰੋਬਾਰ ਵਿੱਚ ਕੰਮ ਕਰਨ ਵਾਲੇ ਪੰਜਾਬੀ ਕਰਮਚਾਰੀ ਇਤਵਿੰਦਰ ਸਿੰਘ ਨੂੰ ਨਸਲਵਾਦੀ ਵਿਵਹਾਰ ਅਤੇ ਗਲਤ ਢੰਗ ਨਾਲ ਨੌਕਰੀ ਤੋਂ ਹਟਾਏ ਜਾਣ ਦੇ ਮਾਮਲੇ ਵਿੱਚ ਅਦਾਲਤ ਤੋਂ ਅਹਿਮ ਰਾਹਤ ਮਿਲੀ ਹੈ। Employment Court ਨੇ ਪਹਿਲਾਂ ਦਿੱਤੇ ਗਏ 8,000 ਡਾਲਰ ਦੇ ਹਰਜਾਨੇ ਨੂੰ ਵਧਾ ਕੇ 15,000 ਡਾਲਰ ਕਰ ਦਿੱਤਾ ਹੈ।
ਮਾਮਲੇ ਦੀ ਸੁਣਵਾਈ ਦੌਰਾਨ ਅਦਾਲਤ ਨੇ ਮੰਨਿਆ ਕਿ ਇਤਵਿੰਦਰ ਸਿੰਘ ਨੂੰ ਆਪਣੇ ਮਾਲਕ ਸਟੀਫ਼ਨ ਜੌਨ ਮੈਕਕੀ ਵੱਲੋਂ ਲੰਬੇ ਸਮੇਂ ਤੱਕ ਨਸਲਵਾਦੀ ਟਿੱਪਣੀਆਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਤੋਂ ਪਹਿਲਾਂ Human Rights Review Tribunal ਵੀ ਇਹ ਨਤੀਜਾ ਕੱਢ ਚੁੱਕਾ ਸੀ ਕਿ ਮਾਲਕ ਨੇ ਉਨ੍ਹਾਂ ਦੇ ਭਾਰਤੀ ਲਹਿਜ਼ੇ ਦਾ ਮਜ਼ਾਕ ਉਡਾਇਆ, ਉਨ੍ਹਾਂ ਦੀ ਬੋਲਚਾਲ ਦੀ ਨਕਲ ਕੀਤੀ ਅਤੇ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ। ਟ੍ਰਿਬਿਊਨਲ ਅੱਗੇ ਇਹ ਵੀ ਸਾਬਿਤ ਹੋਇਆ ਕਿ ਮਾਲਕ ਨੇ ਕਿਹਾ ਸੀ, “ਅੰਗਰੇਜ਼ੀ ਵਿੱਚ ਗੱਲ ਕਰੋ, ਮੈਂ ਤੁਹਾਨੂੰ ਡਾਲਰ ਦਿੰਦਾ ਹਾਂ, ਰੁਪਏ ਨਹੀਂ,” ਅਤੇ ਭਾਰਤੀਆਂ ਬਾਰੇ ਵੀ ਅਪਮਾਨਜਨਕ ਸ਼ਬਦ ਵਰਤੇ।
Employment Court ਨੇ ਕਿਹਾ ਕਿ ਨਸਲਵਾਦੀ ਵਿਵਹਾਰ ਅਤੇ ਉਸ ਤੋਂ ਬਾਅਦ ਹੋਈ ਅਣਉਚਿਤ ਰਿਡੰਡੈਂਸੀ ਪ੍ਰਕਿਰਿਆ ਨੇ ਇਤਵਿੰਦਰ ਸਿੰਘ ਨੂੰ ਮਾਨਸਿਕ ਤੌਰ ‘ਤੇ ਗੰਭੀਰ ਨੁਕਸਾਨ ਪਹੁੰਚਾਇਆ। ਅਦਾਲਤ ਦੇ ਅਨੁਸਾਰ ਉਨ੍ਹਾਂ ਨੇ ਅਪਮਾਨ, ਇਕੱਲੇਪਣ ਅਤੇ ਨਿਸ਼ਾਨਾ ਬਣਾਏ ਜਾਣ ਦੀ ਭਾਵਨਾ ਦਾ ਸਾਹਮਣਾ ਕੀਤਾ। ਹਾਲਾਂਕਿ ਅਦਾਲਤ ਨੇ ਇਹ ਸਾਬਤ ਨਹੀਂ ਮੰਨਿਆ ਕਿ ਨੌਕਰੀ ਤੋਂ ਹਟਾਉਣਾ ਬਦਲੇ ਦੀ ਕਾਰਵਾਈ ਸੀ, ਪਰ ਰਿਡੰਡੈਂਸੀ ਦੀ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਗਲਤ ਅਤੇ ਅਣਉਚਿਤ ਕਰਾਰ ਦਿੱਤਾ।
ਇਸ ਮਾਮਲੇ ਦੌਰਾਨ ਤਨਖ਼ਾਹ ਅਤੇ ਛੁੱਟੀਆਂ ਨਾਲ ਜੁੜੇ ਵਿਵਾਦ ਦਾ ਵੀ ਆਪਸੀ ਸਮਝੌਤੇ ਰਾਹੀਂ ਨਿਪਟਾਰਾ ਹੋ ਗਿਆ, ਜਿਸ ਤਹਿਤ ਮਾਲਕ ਨੇ 10,000 ਡਾਲਰ ਵਾਧੂ ਅਦਾ ਕਰਨ ਲਈ ਸਹਿਮਤੀ ਦਿੱਤੀ। ਇਸ ਤੋਂ ਪਹਿਲਾਂ Human Rights Review Tribunal ਨਸਲਵਾਦੀ ਪਰੇਸ਼ਾਨੀ ਲਈ 10,000 ਡਾਲਰ ਦਾ ਹਰਜਾਨਾ ਵੀ ਦੇ ਚੁੱਕਾ ਸੀ।
ਇਸ ਤਰ੍ਹਾਂ ਇਤਵਿੰਦਰ ਸਿੰਘ ਨੂੰ 15,000 ਡਾਲਰ ਗਲਤ ਬਰਖ਼ਾਸਤਗੀ, 10,000 ਡਾਲਰ ਨਸਲਵਾਦੀ ਪਰੇਸ਼ਾਨੀ ਅਤੇ 10,000 ਡਾਲਰ ਤਨਖ਼ਾਹ ਅਤੇ ਹੋਰ ਹੱਕਾਂ ਨਾਲ ਸੰਬੰਧਿਤ ਸਮਝੌਤੇ ਤਹਿਤ ਮਿਲਣਗੇ। ਕੁੱਲ ਮਿਲਾ ਕੇ ਉਨ੍ਹਾਂ ਨੂੰ 35,000 ਡਾਲਰ ਦਾ ਮੁਆਵਜ਼ਾ ਮਿਲੇਗਾ, ਜਦਕਿ ਅਦਾਲਤੀ ਖ਼ਰਚਿਆਂ ਬਾਰੇ ਫ਼ੈਸਲਾ ਹਾਲੇ ਵੱਖਰੇ ਤੌਰ ‘ਤੇ ਕੀਤਾ ਜਾਣਾ ਬਾਕੀ ਹੈ।