ਮਾਨੂਕਾਉ ਡਿਸਟ੍ਰਿਕਟ ਕੋਰਟ ‘ਚ ਸੁਣਵਾਈ ਦੌਰਾਨ ਨਿਊਜ਼ੀਲੈਂਡ ਰਹਿੰਦੇ ਕੰਵਰਪਾਲ ਸਿੰਘ ਨੇ ਇੱਕ ਬਜੁਰਗ ਮਹਿਲਾ ਨਾਲ ਹਜਾਰਾਂ ਡਾਲਰ ਦੀ ਠੱਗੀ ਮਾਰਨ ਦੇ ਮਾਮਲੇ ਵਿੱਚ ਆਪਣੇ ਦੋਸ਼ ਕਬੂਲ ਕਰ ਲਏ ਹਨ।ਦੱਸ ਦੇਈਏ ਇਹ ਮਾਮਲਾ ਇੱਕ ਅੰਤਰਰਾਸ਼ਟਰੀ ਕਾਲ ਸੈਂਟਰ ਠੱਗੀ ਮਾਮਲੇ ਨਾਲ ਸਬੰਧਿਤ ਹੈ, ਜਿਸ ਵਿੱਚ ਇੱਕ ਬਜ਼ੁਰਗ ਔਰਤ ਤੋਂ $17,000 ਤੋਂ ਵੱਧ ਰਕਮ ਠੱਗੀ ਗਈ ਸੀ। ਕੰਵਰਪਾਲ ਸਿੰਘ ਨੂੰ ਹੁਣ ਮਾਨੂਕਾਉ ਡਿਸਟ੍ਰਿਕਟ ਕੋਰਟ ਵਿੱਚ ਰਿਸੀਵਿੰਗ ਸਟੋਲਨ ਪ੍ਰਾਪਰਟੀ ਦੇ ਦੋਸ਼ ‘ਚ ਅਕਤੂਬਰ ‘ਚ ਸਜ਼ਾ ਸੁਣਾਈ ਜਾਵੇਗੀ।
ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਿਕ ਇਹ ਮਾਮਲਾ 3 ਜੂਨ 2023 ਦੀ ਰਾਤ ਦਾ ਹੈ। ਜਦੋਂ ਪਾਮਰਸਟਨ ਨਾਰਥ ਦੀ 80 ਸਾਲਾ ਔਰਤ ਨੂੰ ਇੱਕ ਅੰਤਰਰਾਸ਼ਟਰੀ ਨੰਬਰ ਤੋਂ ਕਾਲ ਆਈ ਸੀ। ਆਪਣੇ ਆਪ ਨੂੰ ਐਪਲਤੋਂ ਦੱਸਣ ਵਾਲੇ ਵਿਅਕਤੀ ਨੇ ਤਿੰਨ ਕਾਲਾਂ ‘ਚ ਉਸਨੂੰ ਦੋ ਸਾਫਟਵੇਅਰ ਡਾਊਨਲੋਡ ਕਰਵਾਏ, ਜਿਨ੍ਹਾਂ ਰਾਹੀਂ ਉਸਦਾ ਬੈਂਕ ਖਾਤਾ ਖਾਲੀ ਕਰ ਦਿੱਤਾ ਗਿਆ। ਕੁੱਲ $17,450 ਵਿਚੋਂ ਲਗਭਗ $9,950 ਸਿੱਧਾ ਸਿੰਘ ਦੇ ਕੀਵੀਬੈਂਕ ਖਾਤੇ ਵਿੱਚ ਟਰਾਂਸਫਰ ਕੀਤਾ ਗਿਆ ਸੀ। ਉਸੇ ਰਾਤ ਉਸਨੇ ਆਕਲੈਂਡ ਦੇ ਮਾਂਗਰੇ ਇਲਾਕੇ ‘ਚ ਏਟੀਐਮ ਤੋਂ ਹਜ਼ਾਰਾਂ ਡਾਲਰ ਨਕਦ ਕੱਢੇ ਅਤੇ ਕੁਝ ਰਕਮ ਵਾਈਜ਼ ਅਕਾਉਂਟ ਅਤੇ ਕਰਿਪਟੋਕਰੰਸੀ ਵਿੱਚ ਵੀ ਟਰਾਂਸਫਰ ਕੀਤੀ ਸੀ। ਰਿਪੋਰਟ ਅਨੁਸਾਰ ਪੀੜਤ ਬਜ਼ੁਰਗ ਔਰਤ ਅਸਲ ਵਿੱਚ ਐਪਲ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ ਪਰ ਗਲਤੀ ਨਾਲ ਠੱਗਾਂ ਦੇ ਜਾਲ ‘ਚ ਫਸ ਗਈ ਸੀ। ਉਸਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਅਣਜਾਣ ਕਾਲਾਂ ਤੋਂ ਸਾਵਧਾਨ ਰਹਿਣਾ ਚਾਹੀਦਾ ਹੈ।