ਵਿਦੇਸ਼ਾਂ ‘ਚ ਅਕਸਰ ਹੀ ਭਾਰਤੀਆਂ ਨੂੰ ਨਸਲੀ ਵਿਰੋਧ ਜਾ ਟਿੱਪਣੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅਜਿਹਾ ਹੀ ਕਈ ਵਾਰ ਨਿਊਜ਼ੀਲੈਂਡ ‘ਚ ਵੀ ਹੁੰਦਾ ਹੈ। ਦਰਅਸਲ ਬਲੇਨਹੈਮ ਦੇ ਇਕ 26 ਸਾਲਾ ਵਿਅਕਤੀ ਨੂੰ ਨਸਲੀ ਟਿੱਪਣੀਆਂ ਕਰਨ ਅਤੇ ਦੋ ਟੈਕਸੀ ਡਰਾਈਵਰਾਂ ‘ਤੇ ਹਮਲਾ ਕਰਨ ਦੇ ਮਾਮਲੇ ਵਿੱਚ ਦੋਸ਼ੀ ਪਾਇਆ ਗਿਆ ਹੈ ਅਤੇ ਉਸਨੂੰ ਮੁਆਵਜ਼ਾ ਭਰਨ ਦਾ ਹੁਕਮ ਦਿੱਤਾ ਗਿਆ ਹੈ। ਦ ਪ੍ਰੈਸ ਦੇ ਅਨੁਸਾਰ, ਟੇਮਾਨਾ ਕੈਨੇਥ ਤੇਰੇਮੋਆਨਾ ਟੀਰੀਕੀ ਨੇ ਕਾਮਨ ਅਸਾਲਟ ਦੇ 2 ਅਤੇ ਧਮਕੀ ਭਰੇ ਸ਼ਬਦ ਬੋਲਣ ਦੇ 1 ਦੋਸ਼ ਨੂੰ ਮੰਨ ਲਿਆ ਹੈ। ਉਸਦੀ ਸਜ਼ਾ ਬਲੇਨਹੈਮ ਡਿਸਟ੍ਰਿਕਟ ਕੋਰਟ ਵਿੱਚ ਸੁਣਾਈ ਗਈ ਹੈ।
ਪੁਲਿਸ ਦੇ ਤੱਥਾਂ ਦੇ ਸੰਖੇਪ ਵਿੱਚ ਕਿਹਾ ਗਿਆ ਹੈ ਕਿ ਟੇਰੀਕੀ 13 ਦਸੰਬਰ ਨੂੰ ਕਵੀਨਸਟਾਊਨ ਵਿੱਚ ਆਪਣੇ ਜਨਮਦਿਨ ਕਾਰਨ ਦੋਸਤਾਂ ਨਾਲ ਸ਼ਰਾਬ ਪੀ ਰਿਹਾ ਸੀ। ਅਗਲੀ ਸਵੇਰ ਲਗਭਗ 4.35 ਵਜੇ ਉਹ ਆਪਣੇ ਦੋਸਤਾਂ ਨਾਲ ਇੱਕ ਟੈਕਸੀ ਵਿੱਚ ਸੀ ਜਦੋਂ ਉਸਨੇ ਡਰਾਈਵਰ ਦੀ ਨਸਲੀ ਸੰਬੰਧੀ ਕਈ ਟਿੱਪਣੀਆਂ ਕੀਤੀਆਂ। ਉਸਨੇ ਡਰਾਈਵਰ ਨੂੰ ਕਿਹਾ ਕਿ ਉਹ “ਸਾਰੇ ਭਾਰਤੀਆਂ ਨੂੰ ਕੁੱਟੇਗਾ” ਅਤੇ ਉਹ ਡਰਾਈਵਰ ਨੂੰ ਵੀ ਕੁੱਟੇਗਾ ਅਤੇ ਫਿਰ ਉਸਨੂੰ ਗੋਲੀ ਮਾਰ ਦੇਵੇਗਾ। ਇਸ ਮਗਰੋਂ ਫਿਰ ਡਰਾਈਵਰ ਨੇ ਗੱਡੀ ਰੋਕੀ ਅਤੇ ਕਿਹਾ ਕਿ ਉਹ ਹੋਰ ਅੱਗੇ ਨਹੀਂ ਜਾਵੇਗਾ, ਇਸ ਲਈ ਟੇਰੀਕੀ ਬਾਹਰ ਨਿਕਲਿਆ, ਡਰਾਈਵਰ ਦਾ ਦਰਵਾਜ਼ਾ ਖੋਲ੍ਹਿਆ, ਅਤੇ ਉਸਦੇ ਚਿਹਰੇ ‘ਤੇ ਕਈ ਵਾਰ ਮੁੱਕਾ ਮਾਰਿਆ, ਜਿਸ ਨਾਲ ਉਸ ਦੇ ਨੱਕ ਵਿੱਚੋਂ ਖੂਨ ਨਿਕਲਣ ਲੱਗ ਗਿਆ। ਫਿਰ ਡਰਾਈਵਰ ਨੇ ਟੀਰੀਕੀ ਨੂੰ ਧੱਕਾ ਦੇ ਦਿੱਤਾ ਅਤੇ ਉਸਦੇ ਦੋਸਤ ਭੱਜ ਗਏ।
ਇੰਨਾਂ ਹੀ ਨਹੀਂ ਫਿਰ ਲਗਭਗ 10 ਮਿੰਟ ਬਾਅਦ, ਇਹ ਸਾਰੇ ਇੱਕ ਹੋਰ ਟੈਕਸੀ ਵਿੱਚ ਬੈਠੇ, ਜਿਸਨੂੰ ਇੱਕ ਭਾਰਤੀ ਡਰਾਈਵਰ ਚਲਾ ਰਿਹਾ ਸੀ। ਇਸ ਵਾਰ ਵੀ ਟੀਰੀਕੀ ਨੇ ਉਸਨੂੰ ਨਸਲੀ ਗਾਲਾਂ ਦਿੱਤੀਆਂ ਅਤੇ ਫਿਰ ਉਸਦੇ ਚਿਹਰੇ ‘ਤੇ ਚਾਰ ਤੋਂ ਪੰਜ ਵਾਰ ਮੁੱਕੇ ਮਾਰੇ ਅਤੇ ਕਈ ਵਾਰ ਕਿਕਾਂ ਮਾਰੀਆਂ। ਇਸ ਨਾਲ ਡਰਾਈਵਰ ਦਾ ਚਿਹਰਾ ਸੁੱਜ ਗਿਆ ਅਤੇ ਹਿੱਪ ‘ਤੇ ਸੱਟਾਂ ਵੱਜੀਆਂ।
ਕੋਰਟ ਵਿੱਚ ਉਸਦੇ ਵਕੀਲ ਨੇ ਕਿਹਾ ਕਿ ਟੀਰੀਕੀ ਦੋਵੇਂ ਡਰਾਈਵਰਾਂ ਨੂੰ $1000 ਦੇ ਕੇ ਮੁਆਫ਼ੀ ਮੰਗਣ ਲਈ ਤਿਆਰ ਹੈ ਅਤੇ ਹਿੰਸਾ ਤੇ ਸ਼ਰਾਬ-ਵਿਰੋਧੀ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੋਵੇਗਾ। ਜੱਜ ਜੋ ਰਾਈਲੀ ਨੇ ਉਸਦੇ ਵਿਵਹਾਰ ਨੂੰ “ਜ਼ਰੂਰਤ ਤੋਂ ਵੱਧ ਤੇ ਬੁਰਾ” ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਨਸਲੀ ਗਾਲਾਂ ਆਪਣੇ ਆਪ ਵਿੱਚ ਗੰਭੀਰ ਹਨ, ਪਰ ਡਰਾਈਵਰਾਂ ‘ਤੇ ਹਮਲਾ ਕਰਨਾ ਹੋਰ ਵੀ ਖ਼ਤਰਨਾਕ ਹੈ ਕਿਉਂਕਿ ਉਹ ਨਾਜ਼ੁਕ ਸਥਿਤੀ ਵਿੱਚ ਸਨ।
ਅੰਤ ਵਿੱਚ, ਕੋਰਟ ਨੇ ਟੀਰੀਕੀ ਨੂੰ ਹਰ ਡਰਾਈਵਰ ਨੂੰ $1000 ਦੇਣ ਦਾ ਹੁਕਮ ਦਿੱਤਾ ਅਤੇ ਉਸਨੂੰ 9 ਮਹੀਨੇ ਦੀ ਸੁਪਰਵੀਜ਼ਨ ‘ਤੇ ਰੱਖਿਆ, ਜਿਸ ਵਿੱਚ ਸ਼ਰਾਬ ਦੇ ਗਲਤ ਇਸਤੇਮਾਲ ਅਤੇ ਹਿੰਸਾ ਰੋਕੂ ਪ੍ਰੋਗਰਾਮਾਂ ਵਿੱਚ ਸ਼ਾਮਿਲ ਹੋਣਾ ਸ਼ਾਮਲ ਹੈ। ਪੁਲਿਸ ਨੂੰ ਬਾਅਦ ਵਿੱਚ ਦਿੱਤੇ ਬਿਆਨ ਵਿੱਚ ਟੀਰੀਕੀ ਨੇ ਕਬੂਲਿਆ ਕਿ ਉਹਦਾ ਵਿਵਹਾਰ ਗਲਤ ਸੀ ਪਰ ਉਸਦਾ ਕਹਿਣਾ ਸੀ ਕਿ ਉਹ ਨਸ਼ੇ ਵਿੱਚ ਸੀ। ਉਸਨੇ ਦਾਅਵਾ ਕੀਤਾ ਕਿ ਡਰਾਈਵਰਾਂ ਨੇ ਉਸਨੂੰ ਭੜਕਾਉਣ ਵਾਲੀ ਗੱਲ ਕੀਤੀ ਸੀ।