ਨਿਊਜ਼ੀਲੈਂਡ ‘ਚ ਇੱਕ ਪੰਜਾਬੀ ‘ਤੇ ਮਨੀ ਲਾਂਡਰਿੰਗ ਦਾ ਕੇਸ ਦਰਜ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਸਿਕਿਊਰਿਟੀ ਗਾਰਡ ਦੀ ਨੌਕਰੀ ਕਰਨ ਵਾਲੇ ਇੱਕ ਨੌਜਵਾਨ ‘ਤੇ ਇਹ ਇਲਜ਼ਾਮ ਲੱਗੇ ਹਨ। ਦੱਸ ਦੇਈਏ ਇਹ ਮਾਮਲਾ ਪ੍ਰਾਈਵੇਟ ਸਿਕਿਊਰਿਟੀ ਪਰਸੋਨਲ ਲਾਇਸੈਂਸਿੰਗ ਅਥਾਰਟੀ (PSPLA) ਦੇ ਇਕ ਹਾਲੀਆ ਫ਼ੈਸਲੇ ‘ਚ ਸਾਹਮਣੇ ਆਇਆ ਹੈ। ਅਥਾਰਟੀ ਦੀ ਚੇਅਰ ਟ੍ਰਿਸ਼ ਮੈਕਕੌਨੇਲ ਨੇ ਕਿਹਾ ਕਿ ਕਨਵਰਪਾਲ ਸਿੰਘ ਖਿਲਾਫ ਪੁਲਿਸ ਦੀ ਜਾਂਚ ਜਾਰੀ ਹੈ ਅਤੇ ਜਦ ਤੱਕ ਕਾਨੂੰਨੀ ਕਾਰਵਾਈ ਪੂਰੀ ਨਹੀਂ ਹੋ ਜਾਂਦੀ ਉਸ ਦਾ ਲਾਇਸੈਂਸ ਮੁਅੱਤਲ ਕੀਤਾ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਅਜਿਹੇ ਮਾਮਲੇ ਸੁਰੱਖਿਆ ਉਦਯੋਗ ‘ਤੇ ਸਿੱਧਾ ਅਸਰ ਪਾਉਂਦੇ ਹਨ, ਕਿਉਂਕਿ ਅਜਿਹੇ ਕਰਮਚਾਰੀ ਲੋਕਾਂ ਦੇ ਭਰੋਸੇ ਨਾਲ ਜੁੜੇ ਹੋਏ ਹਨ। ਅਥਾਰਟੀ ਨੇ ਕਿਹਾ ਕਿ ਇਸ ਸਮੇਂ ਮਾਮਲਾ ਅਦਾਲਤੀ ਪ੍ਰਕਿਰਿਆ ਵਿਚ ਹੈ ਅਤੇ ਉਹ ਕੋਈ ਹੋਰ ਟਿੱਪਣੀ ਨਹੀਂ ਕਰਨਗੇ। ਇੱਕ ਅਹਿਮ ਗੱਲ ਇਹ ਵੀ ਹੈ ਕਿ ਪਹਿਲਾਂ ਚਰਚਾ ਸੀ ਕਿ ਇਹ ਨੌਜਵਾਨ ਇਲਜ਼ਾਮ ਲੱਗਣ ਮਗਰੋਂ ਨਿਊਜ਼ੀਲੈਂਡ ‘ਚੋਂ ਭੱਜ ਗਿਆ ਸੀ ਪਰ ਅਸਲ ‘ਚ ਅਜਿਹਾ ਨਹੀਂ ਸੀ ਦਰਅਸਲ ਕਨਵਰਪਾਲ ‘ਤੇ ਉਸ ਸਮੇਂ ਇਲਜ਼ਾਮ ਲੱਗੇ ਸਨ ਜਦੋਂ ਉਹ ਪਹਿਲਾਂ ਹੀ ਵਿਦੇਸ਼ ‘ਚ ਸੀ।