ਆਕਲੈਂਡ: ਕੇਂਦਰੀ ਆਕਲੈਂਡ ਦੇ ਪੌਨਸਨਬੀ ਇਲਾਕੇ ਵਿੱਚ ਸੋਮਵਾਰ ਦੁਪਹਿਰ ਕਾਰ ਅਤੇ ਬੱਸ ਵਿਚਾਲੇ ਹੋਈ ਜ਼ਬਰਦਸਤ ਟੱਕਰ ਵਿੱਚ ਸੱਤ ਲੋਕ ਜ਼ਖਮੀ ਹੋ ਗਏ ਹਨ। ਇਨ੍ਹਾਂ ਵਿੱਚੋਂ ਦੋ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ ਹੈ। ਪੁਲਿਸ ਨੂੰ ਦੁਪਹਿਰ ਕਰੀਬ 2 ਵਜੇ ਪੌਨਸਨਬੀ ਰੋਡ ’ਤੇ ਬ੍ਰਾਊਨ ਸਟ੍ਰੀਟ ਦੇ ਨੇੜੇ ਹਾਦਸੇ ਦੀ ਸੂਚਨਾ ਮਿਲੀ ਸੀ।
ਹਾਟੋ ਹੋਨੇ ਸੇਂਟ ਜੌਨ ਮੁਤਾਬਿਕ, ਘਟਨਾ ਸਥਾਨ ’ਤੇ ਤਿੰਨ ਐਂਬੂਲੈਂਸਾਂ ਅਤੇ ਇੱਕ ਆਪਰੇਸ਼ਨ ਮੈਨੇਜਰ ਭੇਜਿਆ ਗਿਆ। ਐਂਬੂਲੈਂਸ ਸਟਾਫ ਨੇ ਸੱਤ ਮਰੀਜ਼ਾਂ ਦੀ ਜਾਂਚ ਅਤੇ ਮੁੱਢਲੀ ਸਹਾਇਤਾ ਕੀਤੀ। ਦੋ ਜ਼ਖਮੀਆਂ ਨੂੰ ਆਕਲੈਂਡ ਸਿਟੀ ਹਸਪਤਾਲ ਪਹੁੰਚਾਇਆ ਗਿਆ, ਜਿਨ੍ਹਾਂ ਵਿੱਚੋਂ ਇੱਕ ਦੀ ਹਾਲਤ ਗੰਭੀਰ ਅਤੇ ਦੂਜੇ ਦੀ ਹਾਲਤ ਦਰਮਿਆਨੀ ਦੱਸੀ ਗਈ।
ਇੱਕ ਹੋਰ ਵਿਅਕਤੀ ਦੀ ਹਾਲਤ ਵੀ ਦਰਮਿਆਨੀ ਸੀ, ਜਦਕਿ ਚਾਰ ਹੋਰਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ। ਇਨ੍ਹਾਂ ਪੰਜਾਂ ਨੂੰ ਹਸਪਤਾਲ ਲਿਜਾਣ ਦੀ ਲੋੜ ਨਹੀਂ ਪਈ।
ਘਟਨਾ ਸਥਾਨ ਦੀਆਂ ਤਸਵੀਰਾਂ ਵਿੱਚ ਨੀਲੇ ਰੰਗ ਦੀ ਇੱਕ ਕਾਰ ਨੂੰ ਕਾਫ਼ੀ ਨੁਕਸਾਨਿਆ ਹੋਇਆ ਦੇਖਿਆ ਗਿਆ ਹੈ। ਕਾਰ ਦੇ ਖੱਬੇ ਪਾਸੇ, ਖਾਸ ਕਰਕੇ ਡਰਾਈਵਰ ਵਾਲਾ ਦਰਵਾਜ਼ਾ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ ਸੀ।
ਮੌਕੇ ’ਤੇ ਆਕਲੈਂਡ ਟਰਾਂਸਪੋਰਟ ਦੀ ਨੰਬਰ 20 ਬੱਸ ਵੀ ਮੌਜੂਦ ਸੀ, ਜੋ ਸੇਂਟ ਲੂਕਸ ਤੋਂ ਵਾਈਨਯਾਰਡ ਕਵਾਰਟਰ ਵੱਲ ਜਾ ਰਹੀ ਸੀ। ਆਕਲੈਂਡ ਟਰਾਂਸਪੋਰਟ ਮੁਤਾਬਕ, ਮੁੱਢਲੀ ਜਾਣਕਾਰੀ ਅਨੁਸਾਰ ਕਾਰ ਬੱਸ ਦੇ ਸਾਹਮਣੇ ਆ ਗਈ, ਜਿਸ ਕਾਰਨ ਟੱਕਰ ਹੋਈ। ਦੱਸਿਆ ਗਿਆ ਕਿ ਬੱਸ ਡਰਾਈਵਰ ਵੀ ਹਾਦਸੇ ਵਿੱਚ ਜ਼ਖਮੀ ਹੋਇਆ ਹੈ।
ਪੁਲਿਸ ਨੇ ਵਾਹਨ ਚਾਲਕਾਂ ਨੂੰ ਇਲਾਕੇ ਤੋਂ ਬਚਣ ਅਤੇ ਟ੍ਰੈਫਿਕ ਵਿੱਚ ਦੇਰੀ ਲਈ ਤਿਆਰ ਰਹਿਣ ਦੀ ਸਲਾਹ ਦਿੱਤੀ ਹੈ।