ਆਕਲੈਂਡ ਵਿੱਚ ਰਹਿੰਦੇ ਇੱਕ ਵਿਅਕਤੀ ਨੂੰ ਮੋਬਾਈਲ ਸਿਮ ਸਵੈਪਿੰਗ ਧੋਖਾਧੜੀ ਦਾ ਸ਼ਿਕਾਰ ਬਣਾਕੇ ਕਰੀਬ 20 ਹਜ਼ਾਰ ਡਾਲਰ ਦੀ ਠੱਗੀ ਕੀਤੀ ਗਈ ਹੈ। ਪੀੜਤ Jade Wang ਨੇ ਦੱਸਿਆ ਕਿ ਉਹ Kogan Mobile ਦੀ ਮੋਬਾਈਲ ਸੇਵਾ ਵਰਤਦਾ ਸੀ, ਜੋ One NZ ਦੇ ਨੈੱਟਵਰਕ ‘ਤੇ ਚੱਲਦੀ ਹੈ। 24 ਅਪ੍ਰੈਲ ਨੂੰ ਦੁਪਹਿਰ ਸਮੇਂ Wang ਨੂੰ ਇੱਕ ਮੈਸੇਜ ਪ੍ਰਾਪਤ ਹੋਇਆ ਜਿਸ ਵਿੱਚ ਜਾਣਕਾਰੀ ਦਿੱਤੀ ਗਈ ਕਿ ਉਸਦਾ ਮੋਬਾਈਲ ਨੰਬਰ ਨਵੀਂ ਸਿਮ ‘ਤੇ ਟ੍ਰਾਂਸਫਰ ਕਰ ਦਿੱਤਾ ਗਿਆ ਹੈ। ਮੈਸੇਜ ਵਿੱਚ ਚਿਤਾਵਨੀ ਵੀ ਦਿੱਤੀ ਗਈ ਸੀ ਕਿ ਜੇ ਇਹ ਕਾਰਵਾਈ ਉਸਨੇ ਨਹੀਂ ਕਰਵਾਈ ਤਾਂ ਤੁਰੰਤ ਕੰਪਨੀ ਨਾਲ ਸੰਪਰਕ ਕੀਤਾ ਜਾਵੇ।
Wang ਨੇ ਫੌਰੀ ਤੌਰ ‘ਤੇ One NZ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਸਨੂੰ ਦੱਸਿਆ ਗਿਆ ਕਿ ਉਸਦਾ ਨੰਬਰ ਉਨ੍ਹਾਂ ਦੇ ਰਿਕਾਰਡ ਵਿੱਚ ਨਹੀਂ ਹੈ। ਕੁਝ ਸਮੇਂ ਬਾਅਦ ਕਾਲ ਵੀ ਕੱਟ ਗਈ, ਜਿਸ ਕਾਰਨ ਉਸਨੇ ਇਸਨੂੰ ਆਮ ਤਕਨੀਕੀ ਗੜਬੜ ਸਮਝਿਆ। ਪਰ ਸ਼ਾਮ ਨੂੰ ਉਸਦਾ ਮੋਬਾਈਲ ਨੈੱਟਵਰਕ ਪੂਰੀ ਤਰ੍ਹਾਂ ਬੰਦ ਹੋ ਗਿਆ। ਇਸ ਤੋਂ ਬਾਅਦ ਉਸਦੀ ਪਤਨੀ ਨੇ ਵੇਖਿਆ ਕਿ ANZ Bank ਦੇ ਜਾਇੰਟ ਖਾਤੇ ਵਿੱਚੋਂ ਦੋ ਲੈਣ-ਦੇਣ ਰਾਹੀਂ 19,300 ਡਾਲਰ ਕੱਢੇ ਜਾ ਚੁੱਕੇ ਸਨ। ਦੋਹਾਂ ਨੇ ਤੁਰੰਤ ਬੈਂਕ ਅਤੇ ਪੁਲਿਸ ਨੂੰ ਜਾਣਕਾਰੀ ਦਿੱਤੀ ਅਤੇ ਆਪਣੇ ਬੈਂਕ ਕਾਰਡ ਬਲਾਕ ਕਰਵਾ ਦਿੱਤੇ।
ਬੈਂਕ ਦੀ ਜਾਂਚ ਵਿੱਚ ਪਤਾ ਲੱਗਾ ਕਿ ਠੱਗ ਨੇ Wang ਦਾ ਇੰਟਰਨੈੱਟ ਬੈਂਕਿੰਗ ਪਾਸਵਰਡ ਰੀਸੈਟ ਕਰਕੇ ਉਸਦੇ ਮੋਬਾਈਲ ਨੰਬਰ ‘ਤੇ ਭੇਜੇ ਗਏ ਸੁਰੱਖਿਆ ਕੋਡ ਦੀ ਵਰਤੋਂ ਕੀਤੀ ਸੀ। ਇਹ ਸਭ ਕੁਝ ਸਿਮ ਸਵੈਪਿੰਗ ਰਾਹੀਂ ਕੀਤਾ ਗਿਆ। ਬੈਂਕ ਨੇ ਇੱਕ ਹੋਰ ਸ਼ੱਕੀ ਟ੍ਰਾਂਜ਼ੈਕਸ਼ਨ ਦੌਰਾਨ ਫੋਨ ‘ਤੇ ਪੁਸ਼ਟੀ ਕਰਨ ਦੀ ਕੋਸ਼ਿਸ਼ ਕੀਤੀ, ਜਿੱਥੇ ਕਿਸੇ ਵਿਅਕਤੀ ਨੇ ਆਪਣੇ ਆਪ ਨੂੰ Wang ਦੱਸਿਆ। ਸ਼ੱਕ ਪੈਣ ‘ਤੇ ਬੈਂਕ ਨੇ ਤੁਰੰਤ ਉਸਦਾ ਆਨਲਾਈਨ ਬੈਂਕਿੰਗ ਖਾਤਾ ਸਸਪੈਂਡ ਕਰ ਦਿੱਤਾ।
ਬਾਅਦ ਵਿੱਚ ਜਿਸ ਬੈਂਕ ਖਾਤੇ ਵਿੱਚ ਰਕਮ ਭੇਜੀ ਗਈ ਸੀ, ਉੱਥੋਂ 19,300 ਡਾਲਰ ਵਾਪਸ ਕਰ ਦਿੱਤੇ ਗਏ। Wang ਨੇ ਕਿਹਾ ਕਿ ਇਸ ਘਟਨਾ ਨੇ ਉਸਨੂੰ ਮਾਨਸਿਕ ਤੌਰ ‘ਤੇ ਕਾਫੀ ਪ੍ਰਭਾਵਿਤ ਕੀਤਾ, ਹਾਲਾਂਕਿ ਪੈਸੇ ਵਾਪਸ ਮਿਲਣ ਨਾਲ ਉਸਨੇ ਰਾਹਤ ਮਹਿਸੂਸ ਕੀਤੀ।