ਨਿਊਜ਼ੀਲੈਂਡ ਵਿੱਚ ਅੰਤਰਰਾਸ਼ਟਰੀ ਪੈਸਾ ਟ੍ਰਾਂਸਫਰ ਨਾਲ ਜੁੜੀਆਂ ਦੋ ਵੱਡੀਆਂ ਘਟਨਾਵਾਂ ਨੇ ਲੋਕਾਂ ਨੂੰ ਚੌਕਸ ਕਰ ਦਿੱਤਾ ਹੈ। ਦਰਅਸਲ ਛੋਟੀ ਜਿਹੀ ਗਲਤੀ ਕਾਰਨ ਲੋਕਾਂ ਦੀ ਜਿੰਦਗੀ ਭਰ ਦੀ ਬਚਤ ਪਲ ਵਿੱਚ ਖਤਮ ਹੋ ਗਈ। Financial Services Complaints Limited (FSCL) ਵੱਲੋਂ ਸਾਹਮਣੇ ਆਏ ਮਾਮਲਿਆਂ ਅਨੁਸਾਰ, ਇਕ ਨੰਬਰ ਦੀ ਗਲਤੀ ਵੀ ਵੱਡਾ ਨੁਕਸਾਨ ਕਰ ਸਕਦੀ ਹੈ।
ਪਹਿਲੇ ਮਾਮਲੇ ਵਿੱਚ ਇੱਕ 90 ਸਾਲਾ ਵਿਅਕਤੀ ਨੇ ਆਪਣੇ ਪੁੱਤਰ ਨੂੰ ਕਰੀਬ 12,000 ਅਮਰੀਕੀ ਡਾਲਰ ਭੇਜਣ ਦੀ ਕੋਸ਼ਿਸ਼ ਕੀਤੀ, ਪਰ ਰਾਊਟਿੰਗ ਨੰਬਰ ਵਿੱਚ ਗਲਤੀ ਹੋਣ ਕਾਰਨ ਰਕਮ ਗਲਤ ਬੈਂਕ ਵਿੱਚ ਚਲੀ ਗਈ। ਪੈਸੇ ਵਾਪਸ ਮੰਗਵਾਉਣ ਵਿੱਚ ਹੋਈ ਦੇਰੀ ਕਾਰਨ ਰਕਮ ਮੁੜ ਨਹੀਂ ਮਿਲ ਸਕੀ। ਹਾਲਾਂਕਿ ਬਜ਼ੁਰਗ ਨੂੰ ਮਾਨਸਿਕ ਤਣਾਅ ਲਈ $1000 ਮੁਆਵਜ਼ਾ ਮਿਲਿਆ, ਪਰ ਮੁੱਖ ਰਕਮ ਹੱਥੋਂ ਨਿਕਲ ਗਈ।
ਦੂਜੇ ਮਾਮਲੇ ਵਿੱਚ ਇੱਕ ਵਿਅਕਤੀ ਨੇ ਆਪਣੇ ਟ੍ਰੈਵਲ ਕਾਰਡ ਵਿੱਚ ਪੈਸੇ ਜਮ੍ਹਾ ਕਰਵਾਉਂਦੇ ਸਮੇਂ ਖਾਤਾ ਨੰਬਰ ਦੇ ਅਖੀਰਲੇ ਦੋ ਅੰਕ ਗਲਤ ਭਰ ਦਿੱਤੇ। ਇਸ ਗਲਤੀ ਨਾਲ ਕਰੀਬ $100,000 ਦੀ ਰਕਮ ਕਿਸੇ ਅਣਜਾਣ ਵਿਅਕਤੀ ਦੇ ਖਾਤੇ ਵਿੱਚ ਚਲੀ ਗਈ, ਜਿਸ ਨੇ ਤੁਰੰਤ ਪੈਸੇ ਕਢਵਾ ਲਏ। ਬਾਅਦ ਵਿੱਚ ਬੈਂਕ ਵੀ ਇਹ ਰਕਮ ਵਾਪਸ ਨਹੀਂ ਲਿਆ ਸਕਿਆ।
ਮਾਹਿਰਾਂ ਨੇ ਲੋਕਾਂ ਨੂੰ ਸਖ਼ਤ ਚਿਤਾਵਨੀ ਦਿੱਤੀ ਹੈ ਕਿ ਪੈਸੇ ਭੇਜਣ ਤੋਂ ਪਹਿਲਾਂ ਖਾਤਾ ਨੰਬਰ ਅਤੇ ਹੋਰ ਵੇਰਵਿਆਂ ਨੂੰ ਦੋ-ਤਿੰਨ ਵਾਰ ਜ਼ਰੂਰ ਚੈੱਕ ਕੀਤਾ ਜਾਵੇ। ਉਹਨਾਂ ਦਾ ਕਹਿਣਾ ਹੈ ਕਿ ਜੇਕਰ ਗਲਤੀ ਹੋ ਜਾਵੇ ਤਾਂ ਤੁਰੰਤ ਬੈਂਕ ਨਾਲ ਸੰਪਰਕ ਕਰਨਾ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਸਮਾਂ ਲੰਘਣ ਨਾਲ ਪੈਸੇ ਵਾਪਸ ਮਿਲਣ ਦੀ ਸੰਭਾਵਨਾ ਬਹੁਤ ਘੱਟ ਰਹਿ ਜਾਂਦੀ ਹੈ।
ਇਹ ਮਾਮਲੇ ਸਪੱਸ਼ਟ ਕਰਦੇ ਹਨ ਕਿ ਡਿਜ਼ਿਟਲ ਲੈਣ-ਦੇਣ ਵਿੱਚ ਇੱਕ ਛੋਟੀ ਲਾਪਰਵਾਹੀ ਵੀ ਵੱਡੇ ਆਰਥਿਕ ਨੁਕਸਾਨ ਦਾ ਕਾਰਨ ਬਣ ਸਕਦੀ ਹੈ।