Auckland ਵਿੱਚ ਅੱਜ ਸਵੇਰੇ ਅਚਾਨਕ ਸਾਰੀਆਂ ਰੇਲ ਸੇਵਾਵਾਂ ਰੁਕ ਗਈਆਂ, ਜਿਸ ਕਾਰਨ ਹਜ਼ਾਰਾਂ ਯਾਤਰੀਆਂ ਨੂੰ ਵੱਡੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਇਹ ਵਿਘਨ “ਨੈੱਟਵਰਕ ਕੰਟਰੋਲ ਸਿਸਟਮ ਫੇਲ੍ਹ” ਹੋਣ ਕਾਰਨ ਪੈਦਾ ਹੋਇਆ ਹੈ।
Auckland Transport ਵੱਲੋਂ ਜਾਰੀ ਕੀਤੀ ਜਾਣਕਾਰੀ ਮੁਤਾਬਕ, ਸਾਰੇ ਟ੍ਰੇਨ ਰੂਟਾਂ ‘ਤੇ ਦੇਰੀਆਂ ਅਤੇ ਰੱਦ ਹੋਣ ਦੀ ਸੰਭਾਵਨਾ ਬਣੀ ਹੋਈ ਹੈ। ਇਸ ਸਮੇਂ ਟ੍ਰੇਨਾਂ ਨੂੰ ਸਟੇਸ਼ਨਾਂ ‘ਤੇ ਹੀ ਰੋਕ ਦਿੱਤਾ ਗਿਆ ਹੈ।
ਸਟੇਸ਼ਨਾਂ ‘ਤੇ ਕੀਤੇ ਜਾ ਰਹੇ ਐਲਾਨਾਂ ਵਿੱਚ ਵੀ ਦੱਸਿਆ ਗਿਆ ਹੈ ਕਿ ਸਿਸਟਮ ਫੇਲ੍ਹ ਹੋਣ ਕਾਰਨ ਟ੍ਰੇਨ ਸੇਵਾਵਾਂ ਅਸਥਾਈ ਤੌਰ ‘ਤੇ ਬੰਦ ਹਨ। ਪ੍ਰਸ਼ਾਸਨ ਵੱਲੋਂ ਵਿਕਲਪ ਵਜੋਂ ਬੱਸਾਂ ਵਿੱਚ ਰੇਲ ਟਿਕਟ ਮਨਜ਼ੂਰ ਕੀਤੀਆਂ ਜਾ ਰਹੀਆਂ ਹਨ, ਪਰ ਇਸਦੇ ਬਾਵਜੂਦ ਯਾਤਰੀਆਂ ਨੂੰ ਕਾਫੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
Orakei ਇਲਾਕੇ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਉਬਰ ਅਤੇ ਹੋਰ ਸਵਾਰੀਆਂ ਦੀ ਉਡੀਕ ਕਰਦੇ ਵੇਖੇ ਗਏ। ਅਧਿਕਾਰੀਆਂ ਨੇ ਯਾਤਰੀਆਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਤਾਜ਼ਾ ਜਾਣਕਾਰੀ ਲਈ AT ਮੋਬਾਈਲ ਐਪ ਚੈੱਕ ਕਰਨ ਅਤੇ ਸੰਭਵ ਹੋਵੇ ਤਾਂ ਵਿਕਲਪਿਕ ਯਾਤਰਾ ਸਾਧਨਾਂ ਦੀ ਵਰਤੋਂ ਕਰਨ।