ਸ਼ੁੱਕਰਵਾਰ ਸਵੇਰੇ ਵੈਲਿੰਗਟਨ ਵਿੱਚ ਇੱਕ ਰੇਲਗੱਡੀ ‘ਚ ਤਿੰਨ ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਯਾਤਰੀਆਂ ਦੇ ਫਸਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਕ ਓਵਰਹੈੱਡ ਬਿਜਲੀ ਦੀ ਤਾਰ ਡਿੱਗਣ ਕਾਰਨ ਕਾਪਿਟੀ ਲਾਈਨ ‘ਤੇ ਵੱਡਾ ਵਿਘਨ ਪਿਆ ਸੀ। ਕੀਵੀਰੇਲ ਵੈਲਿੰਗਟਨ ਮੈਟਰੋ ਦੇ ਜੀਐਮ ਐਂਡੀ ਲਿਓਨ ਨੇ ਕਿਹਾ ਕਿ ਵੈਲਿੰਗਟਨ ਨੇੜੇ ਲਾਈਨ ‘ਤੇ ਸਵੇਰੇ 7.50 ਵਜੇ ਇੱਕ ਕੇਬਲ ਡਿੱਗ ਗਈ, ਜਿਸ ਕਾਰਨ ਯਾਤਰੀ ਸੇਵਾਵਾਂ ਨੂੰ ਰੱਦ ਕਰਨਾ ਪਿਆ ਅਤੇ ਬੱਸਾਂ ਰਾਹੀਂ ਬਦਲਣਾ ਪਿਆ। ਉਨ੍ਹਾਂ ਕਿਹਾ ਕਿ, “ਤਿੰਨ ਰੇਲਗੱਡੀਆਂ ਬਿਜਲੀ ਬੰਦ ਹੋਣ ਕਾਰਨ ਰਸਤੇ ‘ਚ ਪਲੇਟਫਾਰਮਾਂ ਤੋਂ ਦੂਰ ਲਾਈਨ ‘ਤੇ ਰੁਕ ਗਈਆਂ ਸੀ।” ਲਿਓਨ ਨੇ ਕਿਹਾ ਕਿ, “ਦੋ ਨੂੰ ਅੱਜ ਸਵੇਰੇ ਪਹਿਲਾਂ ਲਿਜਾਇਆ ਗਿਆ, ਤਾਂ ਜੋ ਲੋਕ ਉਤਰ ਸਕਣ। ਇੱਕ ਡੀਜ਼ਲ ਲੋਕੋਮੋਟਿਵ ਇਸ ਸਮੇਂ ਤੀਜੀ ਸੇਵਾ ਨੂੰ, ਜੋ ਕਿ ਹੱਟ ਰੋਡ ‘ਤੇ ਰੇਲ ਪੁਲ ‘ਤੇ 152 ਯਾਤਰੀਆਂ ਨਾਲ ਰੁਕੀ ਹੋਈ ਸੀ, ਵੈਲਿੰਗਟਨ ਸਟੇਸ਼ਨ ਵੱਲ ਲਿਜਾ ਰਿਹਾ ਹੈ।”
ਲਿਓਨ ਨੇ ਕਿਹਾ ਕਿ ਕੀਵੀਰੇਲ ਨੂੰ ਪਤਾ ਸੀ ਕਿ ਫਸੇ ਹੋਏ ਯਾਤਰੀਆਂ ਲਈ ਇਹ ਮੁਸ਼ਕਿਲ ਸਮਾਂ ਹੈ। “ਪਰ ਅਸੀਂ ਉੱਚ ਵੋਲਟੇਜ ਬਿਜਲੀ ਦੀਆਂ ਤਾਰਾਂ ਨਾਲ ਨਜਿੱਠ ਰਹੇ ਸੀ ਅਤੇ ਸਾਨੂੰ ਸੁਰੱਖਿਆ ਨੂੰ ਯਕੀਨੀ ਬਣਾਉਣਾ ਪਿਆ।” ਲਿਓਨ ਨੇ ਕਿਹਾ ਕਿ ਵੈਲਿੰਗਟਨ ਦਾ ਓਵਰਹੈੱਡ ਬੁਨਿਆਦੀ ਢਾਂਚਾ ਇੰਨਾ ਪੁਰਾਣਾ ਨਹੀਂ ਸੀ ਅਤੇ ਉਨ੍ਹਾਂ ਨੂੰ ਅਜੇ ਤੱਕ ਇਹ ਨਹੀਂ ਪਤਾ ਸੀ ਕਿ ਤਾਰ ਡਿੱਗਣ ਦਾ ਕਾਰਨ ਕੀ ਸੀ। ਉਨ੍ਹਾਂ ਕਿਹਾ ਕਿ, “ਇਸ ਘਟਨਾ ਦੀ ਪੂਰੀ ਜਾਂਚ ਕੀਤੀ ਜਾਵੇਗੀ।” ਮੈਟਲਿੰਕ ਦੇ ਸੀਨੀਅਰ ਮੈਨੇਜਰ ਪਾਲ ਤਾਵਹਾਰੂ ਨੇ ਕਿਹਾ ਕਿ ਫਸੇ ਹੋਏ ਸੇਵਾ ਦੇ ਯਾਤਰੀ ਤਿੰਨ ਘੰਟਿਆਂ ਤੋਂ ਵੱਧ ਸਮੇਂ ਤੋਂ ਖੱਜਲ ਹੋ ਰਹੇ ਸਨ।
ਉਨ੍ਹਾਂ ਅੱਗੇ ਕਿਹਾ ਕਿ, ” ਫਸੇ ਹੋਏ ਯਾਤਰੀਆਂ ਨੂੰ ਟ੍ਰੇਨ ‘ਚ ਐਮਰਜੈਂਸੀ ਟਾਇਲਟ ਸਪਲਾਈ ਮੁਹਈਆ ਕਰਵਾਈ ਗਈ ਸੀ। ਸਟਾਫ ਨੇ ਇਹ ਯਕੀਨੀ ਬਣਾਇਆ ਹੈ ਕਿ ਯਾਤਰੀ ਆਰਾਮਦਾਇਕ ਤਰੀਕੇ ਨਾਲ ਰਹਿਣ। ਪਾਣੀ ਉਪਲਬਧ ਸੀ, ਅਤੇ ਅਸੀਂ ਇਹਨਾਂ ਯਾਤਰੀਆਂ ਨੂੰ ਜਿੰਨੀ ਜਲਦੀ ਹੋ ਸਕੇ ਟ੍ਰੇਨ ਤੋਂ ਉਤਾਰਨ ਲਈ ਕੰਮ ਕੀਤਾ।” ਸੋਸ਼ਲ ਮੀਡੀਆ ‘ਤੇ ਇੱਕ ਵਿਅਕਤੀ ਨੇ ਦਾਅਵਾ ਕੀਤਾ ਕਿ ਲੋਕ “ਪਲਾਸਟਿਕ ਬੈਗਾਂ ਵਿੱਚ ਪਿਸ਼ਾਬ ਕਰਨਾ ਸ਼ੁਰੂ ਕਰ ਰਹੇ ਸਨ”।
ਵੇਲ ਨੇ ਕਿਹਾ ਕਿ ਯਾਤਰੀਆਂ ਨੂੰ ਦੱਸਿਆ ਗਿਆ ਸੀ ਕਿ ਉਹ ਸੁਰੱਖਿਆ ਕਾਰਨਾਂ ਕਰਕੇ ਰੇਲਗੱਡੀ ਤੋਂ ਨਹੀਂ ਉਤਰ ਸਕਦੇ, ਕਿਉਂਕਿ ਬਿਜਲੀ ਅਜੇ ਵੀ ਚਾਲੂ ਸੀ ਤਾਂ ਜੋ ਦੂਜੀਆਂ ਰੇਲਗੱਡੀਆਂ ਨੂੰ ਲਿਜਾਇਆ ਜਾ ਸਕੇ। ਜਿਸ ਕਾਰਨ ਲੋਕਾਂ ਨੂੰ ਕਈ ਦਿੱਕਤਾਂ ਝੱਲਣੀਆਂ ਪਈਆਂ।