ਨਿਊਜ਼ੀਲੈਂਡ ਵਿੱਚ ਖਸਰੇ ਦੇ ਦੋ ਨਵੇਂ ਮਾਮਲੇ ਸਾਹਮਣੇ ਆਏ ਹਨ ਅਤੇ ਦੋਵੇਂ ਮਾਮਲੇ ਅੰਤਰਰਾਸ਼ਟਰੀ ਯਾਤਰਾ ਨਾਲ ਜੁੜੇ ਹੋਏ ਹਨ। Health New Zealand ਨੇ ਦੱਸਿਆ ਕਿ ਸੰਭਾਵਿਤ ਸੰਪਰਕ ਵਾਲੀਆਂ ਥਾਵਾਂ ਵਿੱਚ Auckland International Airport ਅਤੇ Waitākere Hospital ਦਾ ਐਮਰਜੈਂਸੀ ਵਿਭਾਗ ਸ਼ਾਮਿਲ ਹਨ। ਸਿਹਤ ਅਧਿਕਾਰੀ ਸਿੰਗਾਪੁਰ ਤੋਂ ਆਈ ਫਲਾਈਟ SQ281 ਦੇ ਯਾਤਰੀਆਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਮੈਡੀਕਲ ਅਫ਼ਸਰ ਆਫ ਹੈਲਥ ਡਾ. Richard Vipond ਨੇ ਕਿਹਾ ਕਿ ਖਸਰਾ ਇੱਕ ਗੰਭੀਰ ਅਤੇ ਬਹੁਤ ਹੀ ਸੰਕਰਾਮਕ ਬਿਮਾਰੀ ਹੈ। ਉਨ੍ਹਾਂ ਨੇ ਸਲਾਹ ਦਿੱਤੀ ਕਿ ਜਿਸ ਕਿਸੇ ਵਿੱਚ ਵੀ ਲੱਛਣ ਦਿਖਾਈ ਦੇਣ, ਉਹ ਸਿੱਧਾ ਹਸਪਤਾਲ ਜਾਂ ਕਲੀਨਿਕ ਨਾ ਪਹੁੰਚੇ, ਸਗੋਂ ਪਹਿਲਾਂ ਫੋਨ ਕਰਕੇ ਸਿਹਤ ਸੇਵਾ ਪ੍ਰਦਾਤਾਵਾਂ ਨਾਲ ਸੰਪਰਕ ਕਰੇ, ਤਾਂ ਜੋ ਬਿਮਾਰੀ ਦੇ ਫੈਲਾਅ ਨੂੰ ਰੋਕਿਆ ਜਾ ਸਕੇ। ਉਨ੍ਹਾਂ ਨੇ ਕਿਹਾ ਕਿ ਖਸਰੇ ਤੋਂ ਬਚਾਅ ਦਾ ਸਭ ਤੋਂ ਵਧੀਆ ਢੰਗ ਐਮਐਮਆਰ ਟੀਕਾ ਹੈ। ਸਿਤੰਬਰ 2025 ਵਿੱਚ ਸ਼ੁਰੂ ਹੋਇਆ ਖਸਰੇ ਦਾ ਪ੍ਰਕੋਪ ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਅਧਿਕਾਰਕ ਤੌਰ ‘ਤੇ ਖਤਮ ਘੋਸ਼ਿਤ ਕੀਤਾ ਗਿਆ ਸੀ, ਪਰ ਸਿਹਤ ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਖਤਰਾ ਅਜੇ ਵੀ ਮੌਜੂਦ ਹੈ।