ਨਿਊਜ਼ੀਲੈਂਡ ਦੇ ਉੱਤਰੀ-ਪੂਰਬੀ ਸਮੁੰਦਰੀ ਖੇਤਰ ਵਿੱਚ ਬੁੱਧਵਾਰ ਸ਼ਾਮ 6.2 ਤੀਬਰਤਾ ਦਾ ਡੂੰਘਾ ਭੂਚਾਲ ਆਇਆ, ਜਿਸ ਦੇ ਝਟਕੇ ਹਜ਼ਾਰਾਂ ਲੋਕਾਂ ਨੇ ਮਹਿਸੂਸ ਕੀਤੇ। ਇਹ ਭੂਚਾਲ ਸ਼ਾਮ 7:43 ਵਜੇ ਕੇਰਮਾਡੇਕ ਟ੍ਰੈਂਚ ਨੇੜੇ, ਵ੍ਹਾਕਾਤਾਨੇ ਤੋਂ ਲਗਭਗ 560 ਕਿਲੋਮੀਟਰ ਉੱਤਰ-ਪੂਰਬ ਅਤੇ 100 ਕਿਲੋਮੀਟਰ ਦੀ ਡੂੰਘਾਈ ‘ਤੇ ਦਰਜ ਕੀਤਾ ਗਿਆ। ਭਾਵੇਂ GeoNet ਦੇ ਆਟੋਮੈਟਿਕ ਸਿਸਟਮ ਨੇ ਇਸ ਨੂੰ “Unnoticeable” (ਨਾ ਮਹਿਸੂਸ ਹੋਣ ਵਾਲਾ) ਸ਼੍ਰੇਣੀ ਵਿੱਚ ਰੱਖਿਆ ਸੀ, ਫਿਰ ਵੀ ਈਸਟ ਕੇਪ ਤੋਂ ਲੈ ਕੇ ਵੈਲਿੰਗਟਨ ਤੱਕ ਕਰੀਬ 3,500 ਲੋਕਾਂ ਨੇ ਇਸ ਦੇ ਝਟਕੇ ਮਹਿਸੂਸ ਹੋਣ ਦੀ ਰਿਪੋਰਟ ਦਿੱਤੀ।
ਭੂਚਾਲ ਤੋਂ ਤਿੰਨ ਮਿੰਟ ਬਾਅਦ GeoNet ਦੇ ਸਿਸਟਮ ਨੇ ਡੈਨੀਵਿਰਕ ਇਲਾਕੇ ਨੇੜੇ 4.6 ਤੀਬਰਤਾ ਦਾ ਇੱਕ ਹੋਰ ਭੂਚਾਲ ਵੀ ਦਰਜ ਕਰ ਦਿੱਤਾ। ਬਾਅਦ ਵਿੱਚ ਵਿਸ਼ਲੇਸ਼ਣ ਤੋਂ ਪਤਾ ਲੱਗਾ ਕਿ ਇਹ ਅਸਲ ਭੂਚਾਲ ਨਹੀਂ ਸੀ, ਸਗੋਂ ਸਿਸਟਮ ਵੱਲੋਂ ਗਲਤੀ ਨਾਲ ਬਣਾਇਆ ਗਿਆ ਇੱਕ “Ghost Quake” ਸੀ, ਜਿਸ ਨੂੰ ਬਾਅਦ ਵਿੱਚ ਰਿਕਾਰਡ ਤੋਂ ਹਟਾ ਦਿੱਤਾ ਗਿਆ।
Earth Sciences NZ ਦੀ ਭੂਚਾਲ ਵਿਗਿਆਨੀ ਕੇਟੀ ਜੈਕਬਸ ਨੇ ਦੱਸਿਆ ਕਿ GeoNet ਦਾ ਆਟੋਮੈਟਿਕ ਸ਼ੇਕਿੰਗ ਟੈਗ ਸਿਰਫ਼ ਭੂਚਾਲ ਦੀ ਤੀਬਰਤਾ ਅਤੇ ਦੂਰੀ ਦੇ ਆਧਾਰ ‘ਤੇ ਤਿਆਰ ਹੁੰਦਾ ਹੈ ਅਤੇ ਲੋਕਾਂ ਵੱਲੋਂ ਆਉਣ ਵਾਲੀਆਂ ਰਿਪੋਰਟਾਂ ਦੇ ਆਧਾਰ ‘ਤੇ ਇਸ ਵਿੱਚ ਤੁਰੰਤ ਕੋਈ ਤਬਦੀਲੀ ਨਹੀਂ ਹੁੰਦੀ। ਉਨ੍ਹਾਂ ਕਿਹਾ ਕਿ ਇਹ ਟੈਗ ਸਿਰਫ਼ GeoNet ਦੀ ਵੈੱਬਸਾਈਟ ਅਤੇ ਐਪ ‘ਤੇ ਭੂਚਾਲਾਂ ਨੂੰ ਤਰਜੀਹ ਦੇਣ ਲਈ ਵਰਤਿਆ ਜਾਂਦਾ ਹੈ, ਨਾ ਕਿ ਐਮਰਜੈਂਸੀ ਪ੍ਰਤੀਕਿਰਿਆ ਲਈ।
ਮਾਹਿਰਾਂ ਮੁਤਾਬਕ ਇਹ ਭੂਚਾਲ ਟੋਂਗਾ-ਕੇਰਮਾਡੇਕ ਟ੍ਰੈਂਚ ਅਤੇ ਪੈਸਿਫਿਕ ਪਲੇਟ ਦੇ ਸਬਡਕਸ਼ਨ ਜ਼ੋਨ ਵਿੱਚ ਆਉਣ ਕਾਰਨ ਇਸ ਦੀ ਊਰਜਾ ਮਜ਼ਬੂਤ ਚੱਟਾਨਾਂ ਰਾਹੀਂ ਕਾਫ਼ੀ ਦੂਰ ਤੱਕ ਪਹੁੰਚੀ। ਇਸੇ ਕਰਕੇ ਆਮ ਉਮੀਦਾਂ ਦੇ ਉਲਟ ਸੈਂਕੜਿਆਂ ਕਿਲੋਮੀਟਰ ਦੂਰ ਰਹਿਣ ਵਾਲੇ ਲੋਕਾਂ ਨੇ ਵੀ ਝਟਕੇ ਮਹਿਸੂਸ ਕੀਤੇ।
GeoNet ਨੇ ਇਹ ਵੀ ਮੰਨਿਆ ਹੈ ਕਿ “Unnoticeable” ਸ਼ਬਦ ਭਰਮ ਪੈਦਾ ਕਰ ਸਕਦਾ ਹੈ, ਕਿਉਂਕਿ ਇਸ ਦਾ ਅਰਥ ਹੈ “ਬਹੁਤ ਘੱਟ ਲੋਕਾਂ ਵੱਲੋਂ ਮਹਿਸੂਸ ਕੀਤਾ ਜਾਣਾ”। ਏਜੰਸੀ ਨੇ ਕਿਹਾ ਹੈ ਕਿ ਇਸ ਸ਼ਬਦਾਵਲੀ ਨੂੰ ਬਦਲਣ ‘ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ ਤਾਂ ਜੋ ਭਵਿੱਖ ਵਿੱਚ ਲੋਕਾਂ ਨੂੰ ਸਹੀ ਜਾਣਕਾਰੀ ਮਿਲ ਸਕੇ।