ਪਿਛਲੇ ਦਿਨੀ ਸਾਊਥ ਆਕਲੈਂਡ ਦੇ ਮੈਨੁਰੇਵਾ ‘ਚ ਇੱਕ ਵਿਸ਼ਾਲ ਨਗਰ ਕੀਰਤਨ ਸਜਾਇਆ ਗਿਆ ਸੀ। ਪਰ ਇਸ ਦੌਰਾਨ Brian Tamaki ਨਾਲ ਜੁੜੇ ਗਰੁੱਪ ਵੱਲੋਂ ਰਸਤੇ ‘ਚ ਆ ਕਿ ਰੁਕਾਵਟ ਪੈਦਾ ਕੀਤੀ ਗਈ ਸੀ। ਇਸ ਦੌਰਾਨ ਮਾਹੌਲ ਵੀ ਤਣਾਅਪੂਰਨ ਬਣ ਗਿਆ ਸੀ। ਦੱਸ ਦੇਈਏ ਇਸ ਦੌਰਾਨ ਆਹਮੋ ਸਾਹਮਣੇ ਵਾਲੀ ਸਥਿੱਤੀ ਵੀ ਬਣ ਗਈ ਸੀ ਜਿਸ ਮਗਰੋਂ ਪੁਲਿਸ ਨੇ ਆਕੇ ਮੌਕਾ ਸੰਭਾਲਿਆ ਸੀ। ਪਰ ਹੁਣ ਨੈਸ਼ਨਲ ਪਾਰਟੀ ਦੀ MP ਰੀਮਾ ਨਖਲੇ, ਕੌਂਸਲਰ Daniel Newman ਨੇ ਅਤੇ Free Speech Union ਨੇ ਵਿਰੋਧ ਕਰਨ ਵਾਲਿਆਂ ਦੀ ਤਿੱਖੀ ਆਲੋਚਨਾ ਕੀਤੀ ਹੈ। “True Patriots of NZ” ਨਾਮਕ ਗਰੁੱਪ ਦੇ ਮੈਂਬਰਾਂ ਨੇ “This is New Zealand, not India” ਲਿਖੇ ਬੈਨਰ ਨਾਲ ਸ਼ਾਂਤਮਈ ਢੰਗ ਨਾਲ ਸਜਾਏ ਗਏ ਨਗਰ ਕੀਰਤਨ ਦਾ ਵਿਰੋਧ ਕੀਤਾ ਸੀ, ਇਸ ਦੌਰਾਨ ਹਾਕਾ ਨਾਚ ਕੀਤਾ ਗਿਆ ਸੀ ਅਤੇ “One true God” ਵਰਗੇ ਨਾਅਰੇ ਲਗਾਏ, ਜਦਕਿ ਪੁਲਿਸ ਨੇ ਦੋਹਾਂ ਪੱਖਾਂ ਨੂੰ ਵੱਖ ਰੱਖਿਆ ਸੀ।
ਹੁਣ ਟਾਕਾਨੀਨੀ ਤੋਂ ਨੈਸ਼ਨਲ MP Rima Nakhle ਨੇ ਇਸ ਘਟਨਾ ‘ਤੇ ਦੁੱਖ ਅਤੇ ਨਿਰਾਸ਼ਾ ਜਤਾਈ। ਉਨ੍ਹਾਂ ਕਿਹਾ ਕਿ ਸਿੱਖ ਭਾਈਚਾਰੇ ਨੇ ਕਾਨੂੰਨੀ ਤੌਰ ‘ਤੇ ਪਰਮਿਸ਼ਨ ਲੈ ਕੇ ਨਗਰ ਕੀਰਤਨ ਸਜਾਇਆ ਗਿਆ ਸੀ ਅਤੇ ਇਸ ਤਰ੍ਹਾਂ ਦੀ ਧਮਕਾਊ ਤੇ ਉਤਪਾਤੀ ਹਰਕਤ ਦੁਖਦਾਈ ਹੈ। Rima Nakhle ਨੇ ਸਿੱਖ ਭਾਈਚਾਰੇ ਦੇ ਨਿਊਜ਼ੀਲੈਂਡ ਲਈ ਯੋਗਦਾਨ ਗਿਣਾਉਂਦੇ ਹੋਏ ਕੋਵਿਡ ਦੌਰਾਨ ਹਜ਼ਾਰਾਂ ਫੂਡ ਪਾਰਸਲਾਂ ਦੀ ਸਹਾਇਤਾ, ਕ੍ਰਾਈਸਟਚਰਚ ਮਸਜਿਦ ਹਮਲੇ ਦੇ ਪੀੜਤਾਂ ਲਈ ਫੰਡਰੇਜ਼ਿੰਗ ਅਤੇ ਕਮਿਊਨਿਟੀ ਪੈਟਰੋਲ ਕਾਰਾਂ ਦੇ ਦਾਨ ਦਾ ਜ਼ਿਕਰ ਕੀਤਾ। ਫ੍ਰੀ ਸਪੀਚ ਯੂਨੀਅਨ ਨੇ ਵੀ ਕਿਹਾ ਕਿ ਸ਼ਾਂਤਮਈ, ਪਰਮਿਟ ਵਾਲੀ ਧਾਰਮਿਕ ਪ੍ਰਕਿਰਿਆ ਵਿੱਚ ਇਸ ਤਰ੍ਹਾਂ ਦੀ ਰੁਕਾਵਟ ਸੱਚਮੁੱਚ ਅਸਹਿਣਯੋਗ ਹੈ। ਪੁਲਿਸ ਨੇ ਦੱਸਿਆ ਕਿ ਉਹ ਘਟਨਾ ਦੀ ਜਾਂਚ ਕਰ ਰਹੇ ਹਨ।