ਆਕਲੈਂਡ ‘ਚ ਬੀਤੀ ਰਾਤ ਇੱਕ ਖ਼ਤਰਨਾਕ ਘਟਨਾ ਸਾਹਮਣੇ ਆਈ, ਜਿੱਥੇ ਇੱਕ ਵਿਅਕਤੀ ਮੋਟਰਵੇ ਦੀ ਗਲਤ ਸਾਈਡ ‘ਤੇ ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾਉਂਦਾ ਫੜਿਆ ਗਿਆ ਹੈ। ਪੁਲਿਸ ਨੇ ਮਾਮਲੇ ਵਿੱਚ 53 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਜਾਣਕਾਰੀ ਅਨੁਸਾਰ, ਸਵੇਰੇ ਕਰੀਬ 3:15 ਵਜੇ ਪੁਲਿਸ ਨੂੰ ਕਈ ਸ਼ਿਕਾਇਤਾਂ ਮਿਲੀਆਂ ਕਿ ਇੱਕ ਵਾਹਨ ਨਾਰਦਰਨ ਮੋਟਰਵੇ ‘ਤੇ ਨਾਰਥਕੋਟ ਨੇੜੇ ਗਲਤ ਦਿਸ਼ਾ ਵਿੱਚ ਦੌੜ ਰਿਹਾ ਹੈ। ਕੈਮਰਿਆਂ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਵਾਹਨ ਓਟੇਹਾ ਵੈਲੀ ਰੋਡ, ਐਲਬਨੀ ਨੇੜੇ 160 ਕਿਲੋਮੀਟਰ ਪ੍ਰਤੀ ਘੰਟਾ ਤੋਂ ਵੱਧ ਦੀ ਰਫ਼ਤਾਰ ਨਾਲ ਚੱਲ ਰਿਹਾ ਸੀ।
ਸੀਨੀਅਰ ਸਰਜੰਟ ਕਾਰਲ ਫੌਲੀ ਦੇ ਮੁਤਾਬਕ, ਪੁਲਿਸ ਟੀਮਾਂ ਤੁਰੰਤ ਮੌਕੇ ‘ਤੇ ਭੇਜੀਆਂ ਗਈਆਂ, ਪਰ ਵਾਹਨ ਦੀ ਬੇਹੱਦ ਤੇਜ਼ ਰਫ਼ਤਾਰ ਦੇ ਮੱਦੇਨਜ਼ਰ ਸਿੱਧੀ ਤੌਰ ‘ਤੇ ਪਿੱਛਾ ਨਹੀਂ ਕੀਤਾ ਗਿਆ। ਪੁਲਿਸ ਵੱਲੋਂ ਸੁਰੱਖਿਅਤ ਦੂਰੀ ਬਣਾਈ ਰੱਖਦੇ ਹੋਏ ਨਿਗਰਾਨੀ ਕੀਤੀ ਗਈ।
ਇਹ ਵਾਹਨ ਸਟੇਟ ਹਾਈਵੇ 1 ਦੇ ਸਾਊਥਬਾਊਂਡ ਲੇਨ ਵਿੱਚ ਰਹਿੰਦੇ ਹੋਏ ਉੱਤਰ ਵੱਲ ਵਧਦਾ ਰਿਹਾ। ਆਖ਼ਿਰਕਾਰ ਪੁਹੋਈ ਆਨ-ਰੈਂਪ ਨੇੜੇ ਬੈਰੀਅਰ ਨਾਲ ਟਕਰਾਉਣ ਤੋਂ ਬਾਅਦ ਵਾਹਨ ਸੜਕ ਤੋਂ ਹੇਠਾਂ ਖੱਡ ਵਿੱਚ ਜਾ ਡਿੱਗਿਆ।
ਮੌਕੇ ‘ਤੇ ਪਹੁੰਚੀ ਪੁਲਿਸ ਨੇ ਡਰਾਈਵਰ ਨੂੰ ਬਿਨਾਂ ਚੋਟਾਂ ਦੇ ਕਾਬੂ ਕਰ ਲਿਆ। ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਨਾਰਥ ਸ਼ੋਰ ਜ਼ਿਲ੍ਹਾ ਅਦਾਲਤ ਵਿੱਚ 13 ਮਈ ਨੂੰ ਪੇਸ਼ ਹੋਣ ਲਈ ਸਮਨ ਜਾਰੀ ਕੀਤਾ ਗਿਆ ਹੈ।
ਪੁਲਿਸ ਨੇ ਕਿਹਾ ਕਿ ਇਹ ਬਹੁਤ ਖੁਸ਼ਕਿਸਮਤੀ ਦੀ ਗੱਲ ਹੈ ਕਿ ਇਸ ਖ਼ਤਰਨਾਕ ਘਟਨਾ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।