ਨਿਊਜ਼ੀਲੈਂਡ ਦੇ ਨਿਊ ਪਲਾਈਮਥ ਵਿੱਚ ਇੱਕ ਸ਼ਰਾਬੀ ਡਰਾਈਵਰ ਵੱਲੋਂ ਘਰ ਵਿੱਚ ਕਾਰ ਦਾਖ਼ਲ ਕਰ ਦੇਣ ਦੇ ਮਾਮਲੇ ਵਿੱਚ ਪੀੜਤਾ ਨੂੰ ਅਦਾਲਤ ਵੱਲੋਂ ਮੁਆਵਜ਼ਾ ਤਾਂ ਮਿਲ ਗਿਆ ਹੈ, ਪਰ ਪੂਰੀ ਰਕਮ ਹਾਸਿਲ ਕਰਨ ਲਈ ਉਸ ਨੂੰ ਕਰੀਬ 22 ਸਾਲ ਉਡੀਕ ਕਰਨੀ ਪਵੇਗੀ। ਅਦਾਲਤ ਨੇ ਦੋਸ਼ੀ ਨੂੰ ਕੁੱਲ 11,300 ਡਾਲਰ ਅਦਾ ਕਰਨ ਦੇ ਹੁਕਮ ਦਿੱਤੇ ਹਨ, ਪਰ ਉਸ ਦੀ ਭੁਗਤਾਨ ਸਮਰੱਥਾ ਨੂੰ ਦੇਖਦੇ ਹੋਏ ਹਫ਼ਤੇ ਦੇ ਸਿਰਫ਼ 10 ਡਾਲਰ ਅਦਾ ਕਰਨ ਲਈ ਕਿਹਾ ਗਿਆ ਹੈ।
ਇਹ ਘਟਨਾ ਪਿਛਲੇ ਸਾਲ ਕ੍ਰਿਸਮਸ ਤੋਂ ਕੁਝ ਦਿਨ ਪਹਿਲਾਂ ਵਾਪਰੀ ਸੀ। ਘਰ ਦੀ ਮਾਲਕਣ ਲੇਸਲੀ ਜੌਨਸਨ ਉਸ ਸਮੇਂ ਘਰ ਤੋਂ ਬਾਹਰ ਸੀ, ਜਦੋਂ ਇੱਕ ਤੇਜ਼ ਰਫ਼ਤਾਰ ਕਾਰ ਦੋ ਵਾੜਾਂ ਨੂੰ ਤੋੜਦੀ ਹੋਈ ਡੈੱਕ ਨੂੰ ਨੁਕਸਾਨ ਪਹੁੰਚਾਉਂਦੀ ਸਿੱਧੀ ਘਰ ਦੇ ਲਿਵਿੰਗ ਰੂਮ ਵਿੱਚ ਜਾ ਵੱਜੀ। ਖੁਸ਼ਕਿਸਮਤੀ ਨਾਲ ਹਾਦਸੇ ਵੇਲੇ ਘਰ ਅੰਦਰ ਕੋਈ ਵੀ ਮੌਜੂਦ ਨਹੀਂ ਸੀ, ਜਿਸ ਕਾਰਨ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।
ਅਦਾਲਤ ਨੇ ਜਾਇਦਾਦ ਦੇ ਨੁਕਸਾਨ ਅਤੇ ਮਾਨਸਿਕ ਪੀੜਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਪੀੜਤਾ ਦੇ ਹੱਕ ਵਿੱਚ 11,300 ਡਾਲਰ ਮੁਆਵਜ਼ਾ ਦੇਣ ਦਾ ਫ਼ੈਸਲਾ ਸੁਣਾਇਆ। ਹਾਲਾਂਕਿ ਦੋਸ਼ੀ ਵੱਲੋਂ ਹਰ ਹਫ਼ਤੇ ਸਿਰਫ਼ 10 ਡਾਲਰ ਦੀ ਅਦਾਇਗੀ ਕਰਨ ਕਰਕੇ ਇਹ ਰਕਮ ਪੂਰੀ ਹੋਣ ਵਿੱਚ ਲਗਭਗ 22 ਸਾਲ ਲੱਗਣਗੇ।
ਲੇਸਲੀ ਜੌਨਸਨ ਦਾ ਕਹਿਣਾ ਹੈ ਕਿ ਅਦਾਲਤ ਦਾ ਫ਼ੈਸਲਾ ਉਸ ਦੇ ਹੱਕ ਵਿੱਚ ਹੋਣ ਦੇ ਬਾਵਜੂਦ ਇੰਨੀ ਲੰਬੀ ਉਡੀਕ ਇਨਸਾਫ਼ ਨੂੰ ਅਧੂਰਾ ਬਣਾ ਦਿੰਦੀ ਹੈ। ਇਸ ਮਾਮਲੇ ਤੋਂ ਬਾਅਦ ਨਿਊਜ਼ੀਲੈਂਡ ਦੀ ਮੁਆਵਜ਼ਾ ਪ੍ਰਣਾਲੀ ਅਤੇ ਪੀੜਤਾਂ ਨੂੰ ਸਮੇਂ ਸਿਰ ਰਾਹਤ ਦੇਣ ਦੇ ਮੁੱਦੇ ‘ਤੇ ਇੱਕ ਵਾਰ ਫਿਰ ਚਰਚਾ ਛਿੜ ਗਈ ਹੈ।